سؤال عن الماروتى

**shimoshosho** · 08-05-2008 11:59 PM

انا عايزة اشترى ماروتى مستعملة بس عايزة افهم حاجة
هى واقفى على ايه كابالن ولا شاسية ياريت الافاده وتتحمل فى المشاوير
وممكن اغير الماتور بتعها بواحد قوته اكبر
الف شكر

**Nader** · 09-05-2008 12:28 AM

انا مش فاهم يعني اية هي واقفة على اية؟؟!

اي عربية لازم يكون لها شاسية، الشاسية دة زي الهيكل العظمي

للانسان، الانسان هيكلة مكسي لحم، اما العربية هيكلها او الشاسية

بتاعها مكسي صاج.

اما بالنسبة للكبالن فالماروتي بكبالن لانها جر امامي وليست

دفع خلفي.

**engahmed29** · 09-05-2008 12:33 AM

السلام عليكم

الماروتى يا سيدى على كبالن ، و الشاسيه ده فى عربيات معينة زى المرسيدس و اللادا و الفولفو ، بس عيبه انه بيتقل العربية
و هى عربية كويسة و بتتحمل ماشاء الله تمام ، بس بتفتح بقها بعد 6 سنين كدة على الاقل

**furp** · 09-05-2008 12:34 AM

اختي العزيزه

واضح انك لسه زي حالاتي لسه بتعرفي في العربيات
وزي ماقال اخويا نادر بالظبط

تخيلي العربيه عماره والعماره دي واقفه علي عمدان وسقف
وهو ده الشاسيه

وبعد كده العماره بيبنوا فيها حوائط وهو ده الصاج وبعدين بيعملوا المحاره
وهو ده شغل السمكري

وبعد كده بتدهني الشقه وهو ده شغل البوهيجي

اما موضوع الكبالن ولا كارونه ده اختلاف انظمة الجر والماروتي زي 128 جر امامي يعني علي كبالن

اتمني اكون وضحتلك الصوره

**shimoshosho** · 09-05-2008 12:35 AM

الف شكر بس انا اعرف ان 128 و 127 على كبالن وبتكون ضعيفه

انا عايزة اعرف هى تتحمل

والعجل الخلفى واقف على سوست

والف شكر

**Nader** · 09-05-2008 12:40 AM

المشاركة الأصلية كتبت بواسطة shimoshosho

الف شكر بس انا اعرف ان 128 و 127 على كبالن وبتكون ضعيفه

المشاركة الأصلية كتبت بواسطة shimoshosho

انا عايزة اعرف هى تتحمل

والعجل الخلفى واقف على سوست

والف شكر

على فكرة الـ133 مثلاً دفع خلفي والفلانشة اكتر حاجة بتبوظ فيها وتشل

حركة العربية، فالناس بيغيروها بكبالن 127 ... فمهياش قاعدة.

و99.9% من العربيات اللي في الدنيا اللي الموتور بتاعها محطوط بالعرض

شغالة على كبالن عادي جداً ... دي عربيات جر امامي.

العربيات الدفع الخلفي اللي موتورها بالطول بتتقلب الاية وبتبقى كرونة او فلنشة

او على حسب العربية.

حكاية السوست دي فكل العربيات اللي في الدنيا برضة فيها 4 سوست

و4 مساعدين.

خدي جولة في القسم التعليمي علشان توضح لكي بعض المفاهيم الاساسية

في دنيا السيارات.

**SEATLOVER** · 09-05-2008 01:49 AM

كلام نادر كلة مظبوط طبعاً
اية يا جماعة احنا هانتكلم فى اولى عربيات

**Nader** · 09-05-2008 02:12 AM

هو واضح ان الاخ او الاخت لسة معندهاش خبرة

في السيارات وسمع/ت كلام غلط من الناس او صح بس

متفهمش كويس.

وفي الحالة دي بابتدي بالتفكير في السيارة التي تناسبني

وتلبي احتياجاتي.

1-يعني مثلاً السيارة هتعلم عليها.

2- السيارة للاستخدام الفردي وليس العائلي.

3- السيارة غير مطلوبة لاغراض السفر كثيراً.

4- مطلوب سهولة في الصيانة ورخص قطع الغيار.

5- مطلوب سيارة اقتصادية في استهلاك الوقود.

7- استخدام السيارة في طرق ممهدة وليست مدقات مثلاً.

كل ما سبق مثلاً تحققة الماروتي زات الـ3 سلندرات والـ850 cc.

اما لإذا اختلفت احتياجاتي سيختلف معها اختياري لسيارتي.