طلمبة البنزين سخنت بدون سبب و العربية كانت هتولع و ربنا ستر برجاء المساعدة

السلام عليكم

استفساري ده لواحد صاحبي زي اخويا بالظبط معاه نيسان صني 2006 ex و ياريت تساعدوني و تساعدوه

اول حاجة العربية عاملة 39 الف كيلو في فقط في ال 6 سنين دول لانها مركونة اغلب الوقت و الصيانة و الزيت في التوكيل و بأنتظام نوع البنزين المستخدم 92

الموضوع بقي : هو ماشي في امان الله و فجأة لقي الكنبة بتطلع دخان كتير جدا و ريحة شياط طبعا ركن العربية و وقف و فك الكنبة و بيبص لقي اسلاك طلمبة البنزين سايحة تماما و الطلمبة سخنة جدا جدا جدا !!
اتصل بمهندس في توكيل نيسان في المنوفية هو علي معرفة بيه قاله اركن العربية لحد ما تجيبها التوكيل و قد كان و العربية دلوقتي في التوكيل في شبين الكوم في المنوفية

انا عارف ان النيسان صني المصري فيها مشكلة في ضفيرة الكهرباء حسب مواضيع الاعضاء هنا و انا بدخل هنا علي منتدي نيسان كتير و متباع كويس للعربية عشان انا كنت بفكر فيها كبديل للانسر اللي معايا لما اجي اغيرها بس هل ممكن الضفيرة تعمل المصيبة دي ؟

تاني حاجة : لو المشكلة دي فعلا من الضفيرة هل من حقة تغييرها علي حساب التوكيل لانه ملوش ذنب بصراحة خالص يعني المفروض ضفيرة الكهرباء دي عمرها اكتر من 20 سنه من 6 سنين و 39 الف كيلو !!

الفنيين في التوكيل قالوله احنا اول مرة نشوف حاجة كده منظر الاسلاك غريب جدا جدا !!

انا قولتله يعمل محضر في القسم و يثبت اللي حصل عشان لو فعلا المشكلة طلعت ضفيرة و عيب تصنيع هو هيقدم شكوي لجهاز حماية المستهلك لان ببساطة العربية كانت هتولع بيه هو و اسرته !!

اتمني اني اجد المشورة منكم لاني بجد محروق دمي و هو كمان متنرفز جدا لان الموضوع غريب من كل النواحي

شكرا لوقتكم

اخر الاخبار :

طبعا بعد ما صاحبي شد العربية بعربية تانية و وداها التوكيل تك فك طلمبة البنزين و النتيجة كالتالي :

اولا تلف كامل لطلمبة البنزين من شدة الحرارة

ثانيا : تلف خراطيم البنزين من شدة الحرارة !!

ثالثا : تلف اسلاك التوصيل الخاصة بطلمبة البنزين


النتيجة : التكلفة 3000 جنية !!! و هي عبارة عن 1500 جنية طلمبة بنزين و 300 جنية لكل خرطوم بنزين و مصناعيات و خلافة من اسلاك !!!!

بجد يا رجالة عايز مشورتكم و هو خلاص قرر يقدم شكوي لجهاز حماية المستهلك خصوصا انه لما شاف حجم الضرر اللي حصل عرف كويس ان كان ممكن لاقدر الله العربية تنفجر بيه هو و اسرته لو الحريقة كانت مسكت في تانك البنزين و هو دلوقتي بيصور القطع بعد ما التوكيل فكها و كلمني و قالي اسأل هنا ايه الوضع في موقف زي ده لانه خاف اساسا من العربية لان اللي حصل ده مش سهل بالمرة ان تبقي راكب عربية المفروض انها ياباني و تلاقي العربية هتنفجر !!!

منتظر اجابتكم و خبرتكم معايا و كل واحد معاه يسان صني بجد يخلي باله لحد ما نشوف العيب ده سببه ايه

هي العربية كده خارج الضمان .. متهيألي حماية المستهلك مش هايعمل حاجة .. بس حاول

هو اولا عيب الضفيره ده مالوش علاقه بطرمبة البنزين لاني شوفتها و هيا بتتغير في السبع و الضفيره دي بتاعة الموتور اللي في الحوض ماشيه في الحوص جنب الموتور و فيها فيش الموبينات و دي اللي بتتغير في الضمان فعلا بسبب زيادة استهلاك البنزين مالهاش علاقه بالطرمبه اللي تحت الكنبه دي خالص
الغريب ان فعلا اول مره نسمع عن اللي حضرتك قولته ده
بس ايه اللي يخاليها تعمل كده و تسخن بالطريقه الفظيعه دي دا حتي لو بيستعمل بنزين 80 مش هاتعمل كده ولا ممكن شوائب البنزين فضلت تزيد لحد مالطربمه اتكتمت ولا ايه
ايه الموضوع الغريب ده فعلا
بس اللي متأكد منه ان التوكيل ليس له اي دخل في الموضوع ده ولا عيب صناعه ولا حاجه علي ما أظن لانها تعتبر مشكله فرديه و ليست عامه مثل المشاكل المعروفه و الله اعلم بردوا نستني بقية الاعضاء و تعليقهم علي الموضوع

شكرا للردود جدا بس فيه حاجات نسيت اقولها

اول حاجة هو بيستعمل بنزين 92

تاني حاجة بيعمل صيانة كل 5000 كيلو في مودرن يا اما المنوفية او ابورواش

بالنسبة للمشكلة اللي حصلت : والله العظيم العربية كانت هتولع نفسي تشوفوا المنظر و بأذن الله هرفع الصور قريب

لما سأل المهندس في التوكيل قال ان فعلا الضفيرة اللي بتتغير ضفيرة الموتور و ان العربية فيها 3 ضفيرة اتنين ورا و واحدة للموتور فهل ممكن ده يكون عيب جديد للضفائر المصرية اللي ورا ؟

ربنا يستر بجد مع كل اللي راكب نيسان من المشكلة دي و ياريت الناس تتابع سخونة الطلمبة و تقول هل فعلا بتسخن ولا ايه النظام لان انا شخصيا شايف ان الطلمبة المفروض متسخنشي لان دي عايمة في البنزين و لو المشكلة دي موجودة ياريت ناخد موقف لان دي مصيبة

بالنسبة لحماية المستهلك : انا رأيي انه لو المشكلة مشكلة في الخامات اللي مصنوع منها الضفيرة فالمفروض يتم تشكيل لجنة من كلية هندسة و هي اللي تحكم و لو فعلا عيب تصنيع بيتغير سواء في الضمان او خارج الضمان

شكرا ليكم تاني و يارب نوصل لنتيجة بأذن الله

مشكلة غاية فى الاهمية ومتابع باهتمام بس ليا شوية اسئلة
1. هل صاحب العربية هو اول مالك لها يعنى من ساعة الزيرو وهى معاه وبيركبها وعارف كل تاريخها ولا مشتريها كسر زيرو لأنى شاكك يكون حد لعب فيها
2. هل صاحب العربية بيفضل ماشى كتير ولمبة البنزين منورة ويفول مرة واحدة كل التانك ولا اول ما تنور يزود بنزين لأن فيه ناس كتير اوى بتقول عشان تبريد الطلمبة بالبنزين لازم التانك يكون تلته مليان ع الاقل ويمكن يكون ده سبب سخونة الطلمبة وسيحان الخراطيم
على فكرة انا بافول كل 3 ايام 40 لتر يعنى بامشى شوية واللمبة منورة
ارجو الرد والافادة

اللي انا اعرفو ان ركنة العربية غلط والغلط الاكبر انك لما تكون راكن العربية فترة كبيرة وفيها بنزين لازم تفضيه لانو بيكون فقد خواص كتير والشوائب عمالة تزيد فيه بالاخص الكبريت وده ممكن يؤدي الى حرار اعلى في عملية الاحتراق وظاهرة التخبيط او النوكنج في الموتور

فاحتمال كبير الركنة وان شاء الله خير

هو اول مالك للعربية من سنة 2006 و هو كان من اوائل الناس اللي اشترتها بعد ما اتقفلت في مصر

و هو عمره ما اللمبة نورت منه اساسا هو بيحافظ علي العربية جدا و ده واضح من خلال عدد الكيلومترات اللي عملها في 5 سنين تقريبا 40 الف يعني 8000 كيلو في السنة و ده رقم بسيط جدا جدا ده غير الصيانة كل 5000 كيلو في التوكيل

الموضوع كله غريب اساسا و هو ذات نفسه مستغرب جدا و المشكلة الاساسية دلوقتي ان الموضوع ممكن يتكرر و في التوكيل قالوله هنديك ضمان 3 شهور او 5000 كيلو !!! طبعا مشكلة زي دي مع خطورتها الضمان المفروض يبقي سنه علي الاقل او 20 الف كيلو لان الموضوع غريب الشكل و الاسباب غير معروفة و منظر الاسلاك يخوف اساسا و تكلفة التصليح غالية جدا ده لو قولنا مفيش خطورة

انا فعلا محتار و هو كمان محتار جدا و هو مش عضو للاسف في نايل موتورز بس هيعمل عضوية و يدخل يتابع المشكلة


شكرا للاهتمام بجد يا رجالة و يارب نوصل لحل

لا العربية مش بتتركن كتير اوي يعني هي بتتركن اقصي حاجة اسبوعين متواصل لكن لازم بتطلع مشاوير بس مشاوير قصيرة و كل فترة مشوار كبير او اتنين

هم في التوكيل قالوله برضة ان فيه جوان لطلمبة البنزين بيبقي حواليها مش موجود !! فهل ده ممكن يكون السبب ؟ هل ممكن جسم الطلمبة يكون اخد سالب من جسم العربية ؟

اقتباس:

---

المشاركة الأصلية كتبت بواسطة mitsukero

لا العربية مش بتتركن كتير اوي يعني هي بتتركن اقصي حاجة اسبوعين متواصل لكن لازم بتطلع مشاوير بس مشاوير قصيرة و كل فترة مشوار كبير او اتنين

هم في التوكيل قالوله برضة ان فيه جوان لطلمبة البنزين بيبقي حواليها مش موجود !! فهل ده ممكن يكون السبب ؟ هل ممكن جسم الطلمبة يكون اخد سالب من جسم العربية ؟

---

مهو انا بقولك اهو احتمال كبير الركنة اكلت الجوان ومش معنى ان العربية بتطلع كل فترة ده حاجة كويسة لازم البنزين يستهلك بعد فترة معينة والا يبدا يحصل عملية شبيهة بالجلفنة وعلى فكرة في بنزين للصيف وبنزين للشتاء معلموة جديدة بس مش متاكد موجودة في مصر ولا لا