ما بعد عملية الانزلاق الغضروفى

انا اسمى احمد أبوزيد من الاسكندرية و عندى 39 سنة انا من سنة 2007 و انا باعانى من انزلاق غضروفى قطنى بين الفقرة الرابعة و الخامسة
و روحت لاكتر من دكتور بدون ذكر اسماء و معظمهم اقر بان الموضوع بسيط و مش محتاج غير شوية مسكنات و جلسلت علاج طبيعى
المهم عملت يجى سنة و نص علاج طبيعى لحد لما زهقت و فى الاخر بطلت و كنت متعايش مع الانزلاق بقدر الامكان الى ان فى شهر يناير 2011 حسيت بالم جامد جدا غير محتمل فى الرجل اليسار من اول الفخد من فوق الى مشط القدم و تنميل جامد جدا فى الرجل باكملها و طبعا من شدة الالم ذهبت لاكتر من دكتور و فى هذه المرة كلهم اجمعوا بضرورة اجراء تدخل جراحى و فى واحد قاللى ان عندى سقوط فى مشط القدم و لو لم اقم باجراء العملية فى اقرب وقت فى خلال شهر حيحصل حاجات احنا فى غنى عنها المهم دخلت المستشفى يوم 5 يناير 2011 و اجريت العملية يوم 9 يناير 2011 و اللى فهمته من الدكتور بعد العملية انه تم قرقضة الغضروف فقط على حد علمى و لكن كان عندى الم شديد جدا بعد العملية استمر معايا لمدة شهر تقريبا و هو نفس الالام اللى كانت قبل العملية لدرجة انى روحت للدكتور و قلت له انت ما عملتليش العملية و كانت قصة و كان عندى شوية حاجات زيادة كمان بعد العملية زى تنميل شديد فى المنطقة السفلية بين الفخدين لدرجة انى ماكنتش بحس بالمياة اثناء دخول الحمام و كانت نفسيتى زى الزفت .
المهم روحت لدكتور تانى قالى اعمللى اشعة عادية المهم بعد ما شافها طلب منى اشعة رنين بالصبغة لانه كان شايف حاجة غريبة فى الاشعة العادية و بعد ما عملتها روحتله قاللى انت عندك تليفات على العصب نتيجة لتعامل الدكتور بعنف مع العصب اثناء العملية و قالى علاجك حيحتاج لسنة تقريبا مع حقن نيوروروبين و ثايوتاسيد 600 و شوية حاجات تانية المهم الالم اللى فى رجلى الحمد لله دلوقتى مفيش و لكن باحس ان عندى الم مستمر فى الفخد اليمين من فوق لتحت كدة مؤلم جدا
و يمين و شمال فى نفس مكان العملية الم بعد اى مجهود حتى و لو طفيف و روحت للدكتور مرة تانية قاللى لازم تعمل علاج طبيعى المهم روحت عملت علاج طبيعى و كنت بادخل الجلسة و انا تقريبا زى الفل و فى نهاية الجلسة ماكنتش بقدر اقوم من على الشازلونج من شدة الالم و اكتشفت ساعتها انى لو نمت على بطنى لمدة 5 دقائق و اجى اقوم احس ان ظهرى مقسوم نصين و مش قادر اتحرك
بصراحة مش عارف اعمل ايه
و انا طبيعة عملى تحتاج لمجهود شاق و محدش بيرحم زى ما حضراتكم عارفين كله عاوز مصلحته تتم و خلاص و مش عارف اعمل ايه
ارجو حد يدلنى على اى علاج يمكننى على الاقل من ممارسة عملى باقل الم محتمل .
و اسف جدا على الاطالة على حضراتكم
و لسيادتكم جزيل الشكر .