عرض للطباعة
بسم الله الرحمن الرحيم
يا جماعه انا نويت ان شاء الله اشتري عربيه جيب شيروكي موديل 95 اربعه سليندر 2500 سي سي
يا ريت يا جماعه اي مساعده ف الموضوع ده من حيث :
اولا رأي الاعضاء الكرام ف العربيه و مزاياها و عيوبها
ثانيا ازاي اعرف اشتري واحده حالتها نضيفه
ثالثا اسعارها و اسعار قطع الغيار و الزيوت و الصيانات الدوريه و استهلاك البنزين
رابعا الفرق بينها و بين موديل 98
شكرا جدا
حضرتك الجيب شيروكى ال4 سلندر ما يميزها
انها اقتصادية فى البنزين مقارنة بال6 سلندر
حيث ان استهلاكها للبنزين كالاتى:
الطرق السريع 11.8 ليتر لكل 100 كم
جوة البلد 13.8 ليتر لكل 100 كم
ثانيا العربية عالية عن الارض ودة المطلوب يعنى شيل من دماغك المطبات مهما كانت عالية
ثالثا هتمشى فى وسط الشارع مش هتقلق من ميكروباص او اى شىء من هذا القبيل
الجيب شيروكى عامة بريستيج فى الركوبة
ما يعيبها
قطع غيارها اغلى من قطع غيار ال6 سلندر ولكن مش غالية بمعنى الكلمة ولكن مقارنة بفئتها مش غالية
لو انت كنت راكب عربية سيدان هتحس بان العفشة ناشفة شوية ولكن دة لانها مصممة للطرق الوعرة والغير معبدة
الكنبة الخلفية ضيقة شوية
بالنسبة للموتور
ال4 سلندر موتور 2500 سى سى
130 حصان
عزم 203 نيوتن
ابالنسبة للموتور
ال6 سلندر موتور 4000 سى سى
190 حصان
عزم 305 نيوتن
الفرق بينها وبين موديل 1998
الشيروكى من 1984 الى 1997 شكل
والشيروكى من 1998 الى 2001 شكل
دة شكل الموديل من 1998 الى 2001
http://www8.0zz0.com/2011/08/14/17/495964396.jpg
ودة شكل الموديل من 1984 الى 1997
http://www13.0zz0.com/2011/08/14/17/161622448.jpg
الاختلافان من حيث الشكل حضرتك هتلاحظها
هتلاقى الفانوس الخلفى فى الموديل من 1998 فى كرف بسيط
نفس الحال فى المرايات فيها كرف فى الموديل من 1998
فانوس الاشارة الخلفى فى الموديل من 1998 فى جسم العربية من الجنب
دة بالنسبة للشكل ودة اللى اقدر افيد حضرتك فية
لو حضرتك تقدر تجيب من موديل 1998 وما فوق يبقى احسن على الاقل تستفيد بالشكل الجديد
اهم حاجة فى الجيب شيروكى عامة تخلى بالك منها العربية ممكن تمشيها بقرش او بعشرة
قطع الغيار الاصلية الى حد ما غالية زى مقلنا بس هتنساها ومعمرة جدا جدا
وحضرتك بتشترى خلى بالك من الفتيسين والكوارين متخدش عربية فيها فتيس فى حاجة
عشان متتعبش وتصرف عليها
خالى بالك من السقف بتاع العربية عشان فى ناس ساعات بتبقى مطلعة عين العربية
واخيرا ضريبة العربية 1160 جنية لان عدى عليها 10 سنين
ربنا يوفق حضرتك وتنضم لقسم جيب معانا ان شاء اللة
واى استفسار انا تحت امرك
واللة اعلى واعلم فيما قلت
اسف على الاطالة
افادكم الله معلومات قيمه تسلم ايدك ورمضان كريم
يا باشا الف الف الف شكر لحضرتك و بجد عااااااجز عن الشكر و بإذن الله ف القريب العاجل هنضم للقسم المحترم
بس يا ريت لو حد يقدر يقولي اكشف علي العربيه فين ؟؟ او ازاي يعني اقدر اعرف حالة الفيتيسين و الكوارين ؟
يا جماعه لو حد عنده واحد حالتها حلوه ياريت يدلني
ادخل حضرتك على كونتاكت كار وان شاء اللة
هتلاقى اللى حضرتك عايزة
معلومات قيمة و جميلة بارك الله فيك