رعشة فى الفتيس ورجة فى العربية .. ياترى ايه السبب؟

**khaled_Saga** · 14-08-2011 10:52 PM

السلام عليكم يا اخوانى

من فترة بحس برعشة بسيطة فى الفتيس ورجة فى العربية مش جامدة فى الغيارين الاول والتانى بالذات لما بدى الغيار وادوس بنزين والعربية بتسحب
هل ياترى ده سببه ايه مثلا يكون قواعد موتور ولا ايه بالظبط؟؟
اول لما جبت العربية لحد وقت قريب كان سحب العربية ناعم خالص مش بحس بالرعشة دى بس من فترة بدأت الاحظها ولو انى مش ملاحظ ارتفاع او خبط فى صوت الموتور انما بس هى الرجة دى زى ما تكون العربية بتتنطط وكأن الطريق اللى ماشى عليه مش عدل اوى

ارجو الافادة

**hemaa_82** · 15-08-2011 09:32 AM

علي اول و تاني بس ؟؟؟؟؟

طب علي سرعة معينة و تروح ولا مش علي نفس السرعة؟؟؟؟؟

اصلها لو قواعد هتبقي علي اي تعزيم علي المتور انما منظرها كدة عوجة في جنط او زرجينة في مساعد فبتعمل زي رفه علي سرعة معينة ....

اشرح باستفاضه علشان اللي يقدر يساعدك يساعدك ان شاء الله

**ahmedmoh** · 15-08-2011 10:06 PM

المشاركة الأصلية كتبت بواسطة khaled_saga

السلام عليكم يا اخوانى

من فترة بحس برعشة بسيطة فى الفتيس ورجة فى العربية مش جامدة فى الغيارين الاول والتانى بالذات لما بدى الغيار وادوس بنزين والعربية بتسحب
هل ياترى ده سببه ايه مثلا يكون قواعد موتور ولا ايه بالظبط؟؟
اول لما جبت العربية لحد وقت قريب كان سحب العربية ناعم خالص مش بحس بالرعشة دى بس من فترة بدأت الاحظها ولو انى مش ملاحظ ارتفاع او خبط فى صوت الموتور انما بس هى الرجة دى زى ما تكون العربية بتتنطط وكأن الطريق اللى ماشى عليه مش عدل اوى

ارجو الافادة

حصلت عندي نفس الحكاية خصوصا لما تشد جامد و انت طالع على الاول و التاني و ساعات بتحصل و انا على التاني فقط و ببقى ماشي عادي مش بشد ولا حاجة
بس انا سافرت برا مصر بعد ما حسيت بالمشكلة دي بفترة بسيطة فملحقتش اروح التوكيل ولا اسأل
مع العلم ان العربية لسة ماجابتش ال 3000 كيلو

**khaled_Saga** · 15-08-2011 11:30 PM

والله يا هيما ملهاش سرعة معينة بس هى زى ما احمد قال بحس بيها اوى فى الطلعة والتانى لما اشد اوى واقرص على دواسة البنزين وموجودة على السرعات العالية بس اخف

**khaled_Saga** · 15-08-2011 11:41 PM

معلش سؤال كمان يا هيما

يعنى زرجينة فى مساعد؟ وكمان لو عوجة فى جنط ليها حل؟ انا كده كده هبقى اروح التوكيل بس يمكن بعد رمضان بس حابب اعرف ابعاد الموضوع

شكرا للاهتمام

**elpasha1** · 16-08-2011 12:07 AM

طقم دبرياج

**ahmedmoh** · 16-08-2011 12:31 AM

انا لما كان بيحصل معايا كدة كنت بالحقها بالدبرياج كانت بتتظبط الحكاية دي
اعتقد زي ما اخونا الفاضل قال انها مسألة ليها علاقة بيالدبرياج والله اعلم

**khaled_Saga** · 19-08-2011 09:39 PM

المشاركة الأصلية كتبت بواسطة ahmedmoh

انا لما كان بيحصل معايا كدة كنت بالحقها بالدبرياج كانت بتتظبط الحكاية دي
اعتقد زي ما اخونا الفاضل قال انها مسألة ليها علاقة بيالدبرياج والله اعلم

ممكن يكون كلام حضرتك والاخ مظبوط ولكن اللى اعرفه ان طقم الدبرياج لو فيه مشكلة بيسبب ضعف فى سحب العربية بشكل ملحوظ ولكن انا معنديش الكلام ده ولكن...

من فترة طويلة (قبل ما موضوع الرعشة يحصل) وانا بدور العربية ودايس دبرياج بحس بخبطة فى الدبرياج ملحوظة ولما كنت فى صيانة الالف الاولى قولت للمهندس احمد غريب باشا عليها وهو كبر دماغه فممكن يكون ليها علاقة؟

**mramzy** · 22-08-2011 10:40 AM

اظبط حساس الدبرياج وريح نفسك
1- اضغط على الدبرياج بايدك للاخر
هتلاقى ورا البدال من فوق حاجه شبه مكنه الفرامل شداها فى اتجاه الكابوت هتلاقيها بتعمل صوت تكتكه متخفش شدها للاخر
3- وبعدين سيب دواسو الدبرياج بالراحه هتسمع صوت تتكته برضه بسب ضغط الدواسه على الحساس
4- اطلع جرب العربيه
5- ادعى ليا وللى علمها لى