الموضوع: سلسلة سلوكيات القيادة - الحلقة الحادية عشر (استخدام المرايات)

السلام عليكم ورحمة الله وبركاته

اي عربية النهاردة هتلاقيها مجهزة بثلاث مرايات
واحدة في الصالون واثنين علي الجانبين

طبعا اول واحدة معروف هتعمل بيها ايه وهتبص بيها فين، بالظبط كدة هتبص بيها وراك بدل ما تلف دماغك وتبص ورا

طب وتاني واحدة، بتاعة باب السواق، معروفة بردو هبص بيها علي الجمب الشمال من السيارة

وطبعا بالقياس المراية بتاعة الباب اليمين اكيد هبص بيها علي يمين العربية

دة كله كلام سليم 100%

بس للأسف

عندنا في بلدنا الجميلة لحد النهاردة في ناس كتير جدا بلاقيها ماشية من غير مراية يمين واحيانا من غير مرايه شمال
ولو جيت تكلمه يقولك يا عم ، انا ببص علي المراية الي في النص (يقصد مرايه الصالون)

انا معاك ان مراية الصالون احيانا بتبقي الرؤية فيها اوضح من اي مراية اخري بس للأسف دة لأنك مش عارف تستخدم ولا مراية عندك في العربية

يعني الي خلي المرايات الجانبية يكون فيها منطقة عمي (Blind Spot) وهي راكبة فما بالك لو مش راكبة او راكبة ومش بتبص فيهم ؟؟؟؟؟؟؟؟؟؟؟؟؟؟؟؟؟
وللسبب دة كثير من مصنعي السيارات عملوا انظمة تحسس Sense عشان يعوضوا مناطق العمي بتاعة المرايات وطبعا كان اولهم مرسيدس وفولفو

وهوريلكم شوية صور توضح موضوع العمي دة

الصورة دي بتقولك ازاي تظبط مراياتك عشان تقلل شوية من المنطقة العامية (لاحظ في اعلي الصورة هتلاقي ضبط مراية الجانب مع مراية الصالون)


ودي صورة لنظام المرايات الي طورته مرسيدس


والفكرة بتاعة مرسيدس انها تعملك منطقة الخطر ولو في عربية بتقترب من منطقة الخطر هتلاقيها عملتلك علامة حمراء علي المراية بتحظرك من وجود عربية ولو انت حاولت تتجنب العلامة وقربت من المنطقة الخطر هتلاقي العلامة بدأت تدي فلاش (تنور وتطفي) وكمان هتلاقي زنان اشتغل زي الزنان بتاع باب العربية لما يتفتح

شوفت حضرتك ازاي الناس المصنعين بتوع العربيات بيهتموا بالمرايات، واحنا طبعا سواقينا الفهلوية بيستغنوا عنها لأنها بتاعة المبتدئين، يعني حضرتك هتلاقي اهتمام من جانب المصنع انه يعملك المرايات بالكهرباء دة مش نوع من الرفاهية قد ماهو تقدير لأهمية المراية في السواقة والحرص علي انه يطور ويوفر للسائق اعلي معدل للراحة وتسهيل القيادة ومش بس كدة ، لا كمان عملك 3 بروفيل Profile يعني بمعني يعملك للعربية 3 ظبطات ممكن تظبطهم وتسجل ظبطتك عليهم لو بفرض ان في 3 بيركبوا العربية زي حضرتك والسواق والمدام مثلا وبالتالي كل واحد فيكم ليه ظبط مرايات غير التاني بسبب تغيير وضعية الكرسي وطول القامة وكل ظبطة من دوول تظبطلك اوتوماتيك الكرسي والمرايات

انا شخصيا مش بعرف امشي من غير مرايات جانبية ومراية صالون والحمد لله عربيتي الحالية المراية بتاعة الجنب الشمال فيها تقعير بزيادة شوية في طرفها الأخير عشان موضوع منطقة العمي والحمد لله بتساعدني كتير وانا سايق

تعرف حضرتك كمان انهم عملوا احصائيات لقوا ان السيدات بتتسبب في حوادث اكثر من الراجل بسبب انها مش بتعرف تكشف كل الطريق من خلال المرايات ودة بسبب قصر طولها عن الرجل

المرايات يا جماعة موضوع في غاية الأهمية اتمني كلنا نحرص علي استخدامه ونحاول نتعلم كيفية استخدامه

Best Practice

1- لو راجع بضهرك بتركن مثلا حاول استخدام المرايات بدل ما تلف وسطك
2- اول لما تركن العربية حاول تضم المراية الي ناحية الشارع ولما ترجع تركب اوعي تنسي تفردها تاني
3- اول لما تركب العربية افتكر تبص في جميع مراياتك وحاول تعيد ظبطها حتي لو انت كنت اخر واحد ركبت العربية او حتي لو انت الوحيد الي بتركب العربية

والله المستعان
،
،

أقرأ ايضاً
http://www.nilemotors.net/Nile/23842...post3873720813
http://www.nilemotors.net/Nile/23688...post3873704363
http://www.nilemotors.net/Nile/23618...post3873695189
http://www.nilemotors.net/Nile/23553...post3873686975
http://www.nilemotors.net/Nile/23553...post3873686912