الموضوع: حد متجوز يفهمنى حاجة مهمة لو سمحتم ......

فيه واحد قاللي حكمة وأنا في الكلية وعن تجربة لقيتها صحيحة 100%

الجواز والبنا ليهم رزقهم

اولا بالنسبة لمصارييف الجواز حضرتك ربنا يتمملك على خير وبعد ما تخلص الفرح وتحسب المبلغ اللي صرفته هتلاقي إنه رقم خرافي ومش هتعرف جبته منين - وقبل ما تتجوز لو حد قالك لغاية ما تخلص الفرح هتصرف مثلا مائة ألف جنيه فعمرك ما هقدم على الخطوة أصلا - لكن تلاقي نفسك بدأت ومعاك عشرة ولا عشرين وكل أمانيك إنك تقدر توفر عشرة تاني وربنا بيكرمك وتتجوز بتكلفة رهيبة ومن حيث لا تحتسب

بعد الجواز تلاقي ربنا وسع في رزقك وحصلت على شغلانة أفضل أو مرتبك زاد

كل ما ربنا يرزقك بمولود تلاقي رزقك زاد


أنا هأقولك عن نفسي

اشتغلت في الإمارات سنة تقريبا ما حوشتش خمسة آلاف جنيه ومن ساعة ما سافرت كنت مقدم على وظيفة حكومية فيها سكن ومرتب أعلى وقبلت فيها وكان فاضل موافقة الفرع الرئيسي في أبو ظبي

فضلت سنة كاملة أتصل عليهم أسألهم وافقوا ولا لأ ويقولولي لسه ما وافقوش

نزلت أخطب وأشوف بنت الحلال يوم الجمعة
كانت مقابلتي معاهم يوم السبت بالليل

يوم السبت الظهر لقيتهم بيتصلوا علي من الإمارات بيقولولي تعالى استلم الشغل

ربنا كرمني بأول مولود نزلت أشوفه ورجعت لقيتهم بيقولولي جت زيادة في المرتب لكل العاملين وكانت تقريبا 600 درهم أو 900 مش فاكر

ربنا رزقني ببنت ونزلت ورجعت لقيت حصل نفس الموقف والله عل ما أقول شهيد

وفي البنت الأخيرة في الحمل ربنا أكرمني واتنقلت من شغلانة في جزية قاحلة رهيبة ( كئيييييييبة بدرجة لا توصف ) ولقيتهم عاوزيني أروج الفرع الرئيسي - طبعا الجزيرة كانت المصارييف فيها عالية جدا

انت بس قول يا رب وابدأ وخلي عندك ثقة في وعد الله ورسوله



حدثنا أبو بكر أحمد بن إسحاق ، أنبأ أبو المثنى العنبري ، ثنا مسدد ، ثنا يحيى بن سعيد ، ثنا ابن عجلان ، عن سعيد المقبري ، عن أبي هريرة - رضي الله عنه - ، عن النبي - صلى الله عليه وآله وسلم - قال : " ثلاثة حق على الله أن يعينهم : المكاتب الذي يريد الأداء ، والمجاهد في سبيل الله ، والناكح يريد أن يستعف " .

هذا حديث صحيح على شرط مسلم ، ولم يخرجاه .

توكل علي الله فهو حسبك

ولو حسبتها بالورقة والقلم ما هاتتحرك من مكانك

شوف ربنا بيقول ايه

{لِيُنفِقْ ذُو سَعَةٍ مِّن سَعَتِهِ وَمَن قُدِرَ عَلَيْهِ رِزْقُهُ فَلْيُنفِقْ مِمَّا آتَاهُ اللَّهُ لَا يُكَلِّفُ اللَّهُ نَفْسًا إِلَّا مَا آتَاهَا سَيَجْعَلُ اللَّهُ َعْدَ عُسْرٍ يُسْرًا}

معاك 100 اصرف من ال 100 معاك 10 هاتصرف من 10

وفيه قاعدة ذهبية جدا

كل واحدة بتيجي برزقها

يعني تلاقي نفسك متجوز وسبحان الله ربنا كرمك بشغلانة مرتبها اعلي

او نفس المرتب بس نفسيتك متظبطة "مش كل حاجة فلوس لعلمك"

كام وازاي ومنين

دي اسئلتك لوحدكم اللي تجاوب عليها مع شريكة حياتك "اومال سموها شريكة ليه؟ لانكم بتتشاركو في كل شئ"

يعني واحد بيحب الخروج والفلوس علي القد هايروح يقف علي الكورنيش ويجيب لب وترمس
واحد الفلوس مستورة معاه ساندوتشات من اي مكان
واحد ربنا مراضيه في الفلوس خروج في مطعم شيك او علي الانيل او او او

وكله بيتفسح وكله بيخرج وكله بياكل

بس مش كله بيعيش ويستحمل ويقدر

توكل علي الله وما تبصش للفلوس علي انها رقم واحد

بص علي انك هاتبني عيلة ودي هيا رقم واحد