صداع شراء سيارة مستعملة في مصر - معلش حاسس الموضوع معقد شوية
يا جماعة انا جديد معاكم هنا وعندى شوية اسئلة بخصوص نقل الملكية و الترخيص لانى الحمد لله ابيض فى الكلام ده :))
الموضوع انى باشترى دلوقتى عربية موديل 2007 بس تبع محافظة تانية و الرخصة فاضل فيها لسه سنتين و انا ان شاء الله هاعمل عقد بيع مسجل فى الشهر العقارى و امضى مشترى لانى مش باحب اعمل حاجة ناقصة
دلوقتى عندى شوية اسئلة :
1- ايه خطوات نقل الملكية و الترخيص باسمى فى المرور ؟
2- السيارة اكيد مدفوع ضريبتها و رسومها و تأمينها للسنتين اللى فاضلين فى الرخصة فهل هادفعهم تانى لو هارخص سنتين بس ( اللى هم اصلا فاضلين فى الرخصة ) ملحوظة ان موقع وزارة الداخلية بيقول انى المفروض ادفع بس رسوم النماذج الرسوم والمبالغ المطلوبة
"فى حالة سريان الضرائب والرسوم للمركبة المنقول قيدها ويتم سداد رسوم النماذج فى الجهة المنقول إليها المركبة فقط ."
3- العربية فيها زجاج فاميه فابريكة مثبت على الرخصة فهل هيتنقل عادى للرخصة الجديدة ولا هيغلسو ؟؟
4- السيارة تبع محافظة تانية و البائع هيجيبلى هو شهادة المخالفات بمعرفته فالسؤال هل ضرورى اروح المرور الاصلى اللى فى المحافظة دى بنفسى ؟؟ و ازاى اتأكد ان السيارة فعلا اوراقها سليمة؟؟
انا عارف دوشتكم شوية بس دى اول مرة ليا و عارف انكم مش هتخذلونى ان شاء الله