الموضوع: مندوبكم حسام حسن من نقطة شرطة المقطم

أولا انا اسف جدا لعدم تكمنى من حضور المقابلة، عندى ظروف ملخبطة و محتاج دعواتكم.

المهم، النهاردة الصبح الساعة 9:30 كنت نازل اشترى حاجات من السيدة، عند اول منزل المقطم من فوق عند تقاطع المنزل مع مدخل UPTown Cairo الاقى عربية نقل نصر قديمة كبيرة شايلة طوب احمر طالعة عكس الأتجاه، ربنا ستر و تفاديته بصعوبة علشان الأخ كان موسطن نفسه و المنزل ما يساعدش على الفرملة بكفائة 100%، طب الحمد لله، بس اسيبه؟ و لو سيبته و حد غيرى حصله حاجة بسببه، ياترى انا هكون شريك فى الجريمة دى؟

كل الأفكار دى دارت فى دماغى فى ثوانى، خدت قرارى و من اول ملف رجعت و حصلته بعد ما كان وصل او المقطم و رجع فى الأتجاه الصح، وقفت قدامه ووقفته و من غير ما اتكلم معاه طلبت بوليس النجدة، طبعا الأخ جر ناعم فى الأول و يا باشا و يا بيه و انا مبردش عليه فراح ابتدى يبين الوش التانى بتاع اعمل اللى عاوزه وورينى هتعمل ايه و احنا ميهمناش و الخ الخ الخ و اللى يضحك ان معاه عيل بتاع 12 سنة عمال يكرر الكلام

لحسن الحظ لقيت بوكس فى الأتجاه التانى، وقفته، كان فيه امين شرطة بس، شرحتله الحكاية، قال للسواق كنت طالع عكس ليه؟ رد و قال ان فى عربية بمقطورة عطلانة على المطلع و راكنة بزاوية متخلهوش تعدى، فقاله هات الرخص، راح مطلع رخصة العربية، فين رخصتك يا ابنى، معنديش رخصة يا باشا، أمين الشرطة راح واخدنى على جنب و كان عاوزنى افوت الموضوع غالبا علشان لقى الحكاية داخلة فى سكة شغل كتير ووجع دماغ أو لأسباب تانية، المهم انا رفضت تماما و فى خلال كلامنا جه السواق و قالنا بكل ثقة انا صاحب العربية هيخلص الحكاية مهما عملتوا فياريت متتعبوش نفسكم، الأمين سمع كده وراح منفجر فيه و رصله وصلة شتيمة عمولة و حلف انه مش هيسيبه حتى لو انا سكت.

خد رخصة عربيته و بطاقته و مشينا ورا بعض لحد النقطة و فى اول شارع النقطة ركن الأخ و قال ايه الشارع ضيق مش هتدخل و جه على رجله، دخلنا النقطة كان فيها اتنين امناء شرطة، الأمين بتاع البوكس شرح الموضوع و مشى، والأخ السواق رجع لأسلوب معلش دى عليها اقساط و بقالها اسبوعين واقفة و صاحبها بقدرة قادر بقى راجل غلبان و ابوس ايدك و ابوس رجلك و صدقونى كل ما احاول اقنع نفسى انه غلبان، الاقى نظرة التمثيل فى عينيه و كمان كان بيلمح بالتهديد المبطن بكل وضوح لدرجة ان امناء الشرطة لم يحاولوا تصفية الموقف على الأطلاق مع انى عارف ان عندهم ميل دائم لحل الأمور بدل عمل محاضر لتقليل ضغط الشغل.

قبل ما نعمل المحضر الأمين راح معاه علشان يدخلوا العربية من شارع تانى فملقوهاش، رجعوا و خدتهم و رحنا جبناها من عند تاجر مواد البناء اللى عند نادى الشرق للتأمين و اتضح ان العيل اللى معاه هو اللى خدها و مشى، المهم جبناها و رجعنا النقطة و اتعمل محضر بينى و بينه للمشى عكس الأتجاه و اللى يجنن بقى انه محاولش ينكر و معتبر تصرفه طبيعى جدا و ميستاهلش المحاسبة، و عملوا له محضر تانى علشان معندوش رخصة و اتحفظوا عليه و على العربية، خدت ارقام المحاضر و مشيت

كام نقطة بقى توضح الصورة:

- الأخ عنده 23 سنة و صرح فى دفاعه عن نفسه انه سواق قدير بيسوق من 10 سنين و مطلعش رخصة علشان اجراءاتها تتطلب شهادة محو امية و هو ملوش فى العلام، اللى يجنن انه مبصمش على المحضر، لا، مضى امضاء بتاع واحد بيعرف يكتب

- لما سألوه فين صاحب العربية قال شغال على العربية التانية و عنده نقلة فى البدرشين، يعنى على الأقل عندهم عربيتين نقل، ربنا يكرم عبيده، بس لو شفتوه و هو بيعمل تمثيلية انا غلبان و صاحب العربية معدم و مفيش شغل و مفيش فلوس، والله ممكن قلبك يحن و تبقى عاوز تديله فلوس من جيبك، و ده يخلى اى واحد مننا ميخليش عواطفه تتدخل فى المواقف المصيرية اللى زى دى.

بأمانة ربنا يا اخوانى فى خلال الموضوع انا دماغى كانت مليانة بافكار من نوعية "طب مهوا ممكن السواق ده او حد من طرفه يتعرضلى او يعمل حاجة فى عربيتى"، خصوصا ان عنوانى اتكتب فى المحضر و لغاية دلوقتى فى نسبة قلق، بس اللى مخلينى مقتنع تماما باللى عملته انى ممكن اكون سبب فى نجاة حد من موقف زى ده، و ربنا يسترها و يكون قلقى مش صحيح.

بس المهم انى اتحركت و صدقونى ان شاء الله مش هتكون اخر مرة، انا زهقت من السكوت و سكوتنا على حاجات صغيرة هو اللى خلانا مش قادرين نتحرك فى الحاجات الكبيرة، بس خلاص، واحدة واحدة هدرب نفسى انى اتحرك، لأننا خلاص، ضهرنا قرب قوى يبقى للبحر.