مندوبكم حسام حسن من نقطة شرطة المقطم

**R A N A** · 26-11-2008 01:56 PM

انا بجد معجبة جدا بإيجابية حضرتك ورد فعلك على الموقفين دول :k49: وربنا يكتر من امثالك بجد عشان نوقف الناس دي عند حدهم بقي ويبطلوا استهتار .

انا فعلا لما بلاقي ناس ماشية عكس الإتجاه بقول دول حلال فيهم ان حد يخبطهم ويدمرلهم عربياتهم بجد لانها من اخطر الحاجات اللي في الطريق واللي ممكن تؤدي لحوادث ممكن تسبب الوفاه لاقدر الله لانك بتبقي ماشي ومش متوقع ابدا ان في حد جاي في وشك في الاتجاه ده .

بس الصراحة انا مش ايجابية اوي زي حضرتك كده انا لما بلاقي حد ماشي عكسي اقصى حاجة بعملها اقول حسبي الله ونعم الوكيل فيه وفي اللي خلاه يمشي عكسي من غير حساب وممكن اخري يعني لو قفل عليا الطريق بتاعي اصدر دماغي ومراضاش ارجعله ولا سم واحد واقوله انت اللي ترجع ده طريقي انا ، لكن فعلا بيبقي نفسي ابلغ عن كل واحد ماشي عكسي وتطبق عليه عقوبة السجن والإعدام كمان مش الغرامة وبس.

انا مرة بعد مخلصت منزل كوبري اتجاه واحد فقط والناس بتمشي عليه بسرعة لاقيت ميكروباص سوزوكي الصغير ده طالع الكوبري عكسي بجد بقيت مذهولة :k41: ومش مصدقة ازاي في حد بالتخلف والغباء ده وقلت والله لو حد خبطه ووقعه من فوق سور الكوبري يبقي حلال فيه وبجد دعيت عليه لاني تخيلت نفسي وانا نازلة من على الكوبري وماسكة شمال بسرعتي اكيد كان هايخبطني لا محالة ويمكن العربية تتقلب كمان لا قدر الله.
ومرة وانا برده على نفس الكوبري لاقيت عربية مخبوطة خبطة جامدة ووشها في الإتجاه المعاكس ومركونة فوق الكوبري زي ماهية مش عارفة بقي هل ده كان طالع الكوبري عكسي برده فاتخبط بالشكل ده ولا كان ماشي عادي والعربية عومت منه مثلا واتقلب اتجاهها ولا ايه بس الإحتمال الأكبر انه كان طالع عكسي وبصراحة لو كان طلع عكسي يبقي فعلا يستاهل اللي جراله في عربيته .
بجد حسبي الله ونعم الوكيييييييييييل.
وتحية كبيرة جدا لحضرتك على الإيجابية دي بجد :k49:

**Amrrr** · 26-11-2008 03:50 PM

تمام كدة يا باشا تصرفك 100 100 وفكرة ان الواحد ممكنا يتصرف ازاي في المواقف دي لأن انا زي ناس كتير سلبية بكبر دماغي وبالكتير اوي اشتمة شتيمة قذرة تتناسب مع مستواة وكان عندي عربية امريكاني قديمة كان مفيش مانع من الخبط والرزع (كانت عاملة زي الزلطة طبعا) كنت باخد حقي ساعتها وقتي على طول !!!
بس لو ماكنتش لقيت البوكس بالصدفة تفتكر النجدة كانت هتبعتلك دورية مطرع مانت واقف !!!بصراحة انا ماظنش بالذات لو كنت قلتلهم البلاغ اللي انت عايز تعمله!!!دول بيطنشوا في البلاغات بتاعة الحريقة والسرقة والازعاج !!!

**Hossam_Hassan** · 26-11-2008 04:09 PM

المشاركة الأصلية كتبت بواسطة Amrrr

تمام كدة يا باشا تصرفك 100 100 وفكرة ان الواحد ممكنا يتصرف ازاي في المواقف دي لأن انا زي ناس كتير سلبية بكبر دماغي وبالكتير اوي اشتمة شتيمة قذرة تتناسب مع مستواة وكان عندي عربية امريكاني قديمة كان مفيش مانع من الخبط والرزع (كانت عاملة زي الزلطة طبعا) كنت باخد حقي ساعتها وقتي على طول !!!
بس لو ماكنتش لقيت البوكس بالصدفة تفتكر النجدة كانت هتبعتلك دورية مطرع مانت واقف !!!بصراحة انا ماظنش بالذات لو كنت قلتلهم البلاغ اللي انت عايز تعمله!!!دول بيطنشوا في البلاغات بتاعة الحريقة والسرقة والازعاج !!!

انا فى الموضوع بتاع البلدوزر كلمت النجدة و قلتلهم تفاصيل الحكاية و بعد 10 دقايق كلمنى حد من نقطة المقطم و حكيتله تانى و فى خلال 10 دقايق تقريبا كان باعت عربية النجدة اللى عنده و بصراحة فى المرتين كانوا متعاونين و محاولوش حتى يلمحوا ان الموضوع بسيط.

**basemagour** · 26-11-2008 04:43 PM

برافو حسام والله انت مثال لانسان ايجابى حقيقى ولو كلنا بقينا كده هتتغير اشياء كتير وبعدين بالنسبة لموضوع انه ممكن يبعت حد من طرفة يتعرضلك ولا يهمك انت عملت الصح وعملت الى يمليه عليك ضميرك طالما انك متأكد انه غلطان وبالتالى فربنا سبحانة وتعالى لا ينصر فى النهاية ابدا من هوا على باطل

**Osama_soliman** · 11-02-2009 10:15 AM

الله نور عليك يا حسام

**m_elsabah** · 11-02-2009 11:50 AM

تسلم إيدك ودماغك يا حسام . ربنا يكتر من أمثالك يا رب

**yehia** · 11-02-2009 04:52 PM

فين الأخوة اللى بتنادى بالغاء الحبس الاحتياطى فى "جرائم" السير عكس الاتجاه باعتبار ان الحبس بهدلة وقلة قيمة وحرام ....
أنا بس عايز أسأل سؤال .....هو الحبس فى الحالات ديه جى من فراغ؟!!!

نفكر مع بعض شوية وبالعقل...

أما واحد مننا يحصله موقف زى ده.. وما يتصرفش ولا يكون بالايجابية بتاعة الأستاذ صاحب الموضوع... يقوم يجى مخنوق على النت أو فى أى مكان... ويقوللك الناس دى لازم تتحبس.... ولا تتشنق فى ميدان عام ... ولا تتنفى من البلد خالص.... أصلهم بيضروا نفسهم أولا وناس أبرياء ثانيا من اللى ماشيين فى الاتجاه الصحيح اللى ممكن حظهم السئ يخليهم معديين فى نفس اللحظة وهوووووب .... تحصل المصيبة .. وفاة أو شلل لا قدر الله......

للأسف أنا احترت بجد.. مش عارف ايه اللى يرضينا..... لما المخالفات المرورية تبقى مالية الدنيا والقانون لا يطبق.... نزعل ونزعق ونقول لازمة القانون ايه اذا كان لا يعمل به... وأما القانون يطبق خصوصا فى الجرائم المرورية الى آثارها ممكن تبقى مميتة زى السير عكس الاتجاه... نبتدى نتريق ونشتم ونقول خلاص هى الدنيا اتعدلت ما فاضلش إلا "مجرمى" السير عكس الاتجاه اللى يتحبسوا مع القتلة وقاطعى الطرق وأمثالهم؟!!!!!

أيوة يا حضرات... السير عكس الاتجاه أصبح وفقا للتعديل الأخير من "جنح" المرور ولم يعد مخالفة... والنيابة بوصفها أمينة على الدعوى العمومية تملك اتخاذ قرار الحبس الاحتياطى متى رأت لذلك وجها من جسامة الجريمة وظروفها وملابساتها وظروف المتهم نفسه.... واحنا جميعا وأنا أولكم نفسنا أنه يتأصل النظام فينا ونبقى زى شعوب أوروبا وأمريكا فى النظام واحترام القانون ، والدليل على ذلك اننا بنضع صور فوتوغرافية للمقارنة بين حال مرورنا ومرورهم ونرثى ما وصلنا إليه من فوضى .....

وعشان كده.. ونظرا لحالة الشارع والمرور فى بلدنا اللى احنا جميعا شايفينه... لازم نعتبر هذه "الجريمة" من أشد الجرائم ضررا على مرتكبها وغيره... ولازم نتشدد مع مرتكبيها بغض النظر بقى هما مين... بشوات من اللى احنا عارفينهم ولا ناس عاديين... ناس قرأنا عنهم فى الجرائد أم أقرب الناس لنا... ولو ما كنش فى وقفة زى ديه.. ووقفات تانية فى جرائم مرورية أخرى... يبقى بلاش نصدع دماغنا.... وكفاية بقى انتقادات للأحوال السيئة ونسيب كل حاجة غلط زى ما هى ... لأن الواضح ساعتها ان الغلط مش فى أى حد تانى غيرنا احنا......

اللى يعرف الصواب والحق فين و"يصهين" أو ينتقده لمجرد ان "المخطئ" يبقى أخوه ولا والده ولا ابنه ولا جاره ولا صاحبه .. يبقى الغلط نابع منه هو مش من أى حد تانى.....

أنا عارف طبعا انى بكده فتحت النار على نفسى ودخلت حارة سد زى ما بيقولوا...... بس معلش ..... هما كلمتين كان لازم أقولهم.... أصلى مستغرب فعلا من الازدواجية اللى مجتمعنا غارق فيها... لا غياب قانون عاجبنا... ولا تطبيقه عاجبنا.....
أمال احنا عايزين ايه بالضبط ؟!!!