حركة غريبة للوجان بعد استخدام 22 شهر

امبارح اللوجان عملت حركة غريبة

هي بسيطة بس الموقف نفسي كان حيموتني من الخضة

راجع من الجامعة الامريكية من الامتحان النهائي ومش نايم كويس

نازل على نفق الازهر من ميدان الاوبرا

وفي منزل النفق ارتفع ال RPM على نحو غير مسبوق الى 6000 لفة

اول مرة اشوف عربيتي وهي على 6000 لفة

بدور حواليا ادور مين العربية اللي صوتها عالي وفي الاخر لقيت اني انا

العربية كانت على المور عشان كده العربية منطتش

بكل انتباه وخبرة السواقة, رجليا على الدبرياج, ايديا على الفتيس وضغطت على مفتاح فلاشر الانتظار

العربية اخدت اندفاعها وبعد حوالي كيلو وقفت داخل النفق قبل الجزء اللي عاملينه للطواريء بحوالي 20 متر

طفيت العربية ودورتها ثاني نفس الموضوع

اتأكدت ان مفيش دواسة زانقة على دواسة البنزين

رفعت دواسة البنزين برجلي مرتين نفس الحكاية

طفيت العربية ثاني ونزلت زقيتها لجزء الطواريء داخل النفق

دا كان اكتر جزء مرعب بالنسبة لي لان جسمي خارج بره الباب يادوبك على خط المنتصف في النفق والعربيات من ورايا تحدف شمال بسرعة لاني للأسف كنت على ملف

طبعا اللي عارفيني منكم عارفين ان جسمي ياخد حارة لوحده في النفق

رجعت لمحاولة اخيرة ودورت العربية وإذا بها تنتظم وتدور عادي والار بي ام زي الفل


مشيت بالعربية وعادي والحمد لله

كلمت 16202 واللي رد عليا قعد يهديني ويقولي حمد الله على السلامة لان صوتي كان مفزوع

طلبت اني اروح التوكيل فورا والراجل ممانعش بس بعد كده طلبت اني اروح بكره لاني كنت تعبان جدا



وعلى مدخل محور الشهيد في مدينة نصر عملتها ثاني وبرضه كنت على المور

المرة الثانية كنت متحفز ليها وبسرعة كاركت الدواسة لتعود فورا ويرجع ال RPM للطبيعي

انا رايح لهم بكره التوكيل حشوف بيعملوا ايه لاني مش حكتفي بزييت الدواسة لان العربية كانت على السالانسيه في الحالتين

هل هي دواسة ؟؟
هل هو حساس الدواسة (لو فيه حاجه اصلا اسمها حساس الدواسة) ؟؟
هل هو حساس الايدل؟؟؟
ولا سوستة الدواسة والموضوع كله تشحيم ؟؟؟؟

ونصيحة اخيرة :

خللي مسافة بينك وبين اللي ادامك لاني محترف ركوب على ظهر اللي ادامي بس ربنا ستر

لو حصل الكلام ده ثاني بسرعة تمور العربية وتكارك على الدواسة وتروح التوكيل اللي انا اشهد انه اكتر توكيل محترم اتعاملت معاه وتعمل اللي انا حعمله بكره !!!

وربنا يحفظنا جميعا :penguin4::penguin4::penguin4:

موضوع غريب جدا حمد لله على السلامة ولازم نتابع الموضوع ده باهتمام

حصل خير الحمد لله
اعتقد انه حساس الايدل

متابع باهتمام

حمد الله على السلامة يادكتور........ابقى طمنا عملت ايه

حصلت معايا كتير
وقولتلهم عليها في التوكيل
يقولولي دي بوابة الانجكشن
واحنا ظبطنهالك

وتتكرر حتي الان
ابقي قولنا عملت ايه

المشكلة دى المفروض ميتقلش عليها غريبة دى يتقال عليها خطيرة جدا لان ربنا سترها معاك ومجاش حد خبطك من وره ونتا بتاحول تزق العربية والحمد لله

وبما ان فى زميل تانى حصلتله نفس المشكلة دى يبقى ممكن يكون ده عيب بيظهر فى ظروف معينة ( وضع المور) انا شايف ان انك تروح التوكيل فورا وياريت بعد ما يسلموك العربية تحاول تطلع بيها على طريق سفر وتشوف الموضوع ده هيتكرر تانى ولا لو حصل وتكرر تانى انصحك تخاطب الشركة بره فورا لان العمر مش بعزقة .
ربنا سترها معاك وهداك انك تتصرف بحكمة ممكن واحد تانى بديها غيار وياعالم ايه الى ممكن يحصل

ياريت تطمنا وتفهم من المهندسين فى التوكيل ايه سبب المشكلة دى فنيا اهو الواحد يبقى فاهم برده احسن ما يتفاجأ بالموضوع ده

والف حمد الله على سلامتك

حمدا لله على سلامتك يا دكتور وطمنا عملت إيه في التوكيل.

حمد الله على سلامتك يا دكتور احمد

انا عارف احساسك لما تبقى بتزق العربية في حتة خطر زي دي لأني جربتها قبل كدة للاسف

ان شاء الله خير و هكلمك اطمن عليك ان شاء الله

حمد لله على سلامتك يا دكتور العربية واضح انها كانت مسطولة:)
فيه أكثر من سبب للمشكلة ديه :
1-مش عارف نظام الاكسليراتور في العربية ايه بس لو بوابة كهرباء كما يطلق عليها هتكون تقريبا البوابة او بدال الاكسليراتور الكهرابئي فيهم مشكلة.
2-لو البوابة على واير إحتمال يكون حصل تعليق وفضلت فاتحة ناتجة عن مشكلة في البوابة نفسها او في السوسته او الواير ومساره.
3-حساس الإيدل او حساس السلنسيه او مجموعة الفاكيوم الخاصة بالبوابة وده معتقدش انه يوصل ال rpm للرقم ده.
4- تخريف بسبب كونترول العربية.

عموما طالما في الضمان لا تقلق وبإذن الله بسيطة وطمنا عليك

ده واير البنزين

حمدالله على سلامتك بس انت عرضت نفسك للخطر من الخضة كان ممكن بدل ما تطفى العربية و تزقها تسيبها دايرة و تعشق و تحمل دبرياج خفيف و ما تقلقش كانت هتمشى معاك بالراحة و تركنها بامان

الله يسلمكم جميعا

انا الان في العبور وعلى حسب كلام مهندس خالد (من أكفأ مهندسي رينو) ان العيب في حساس البوابة


سيتم تنظيف البوابة والحساس وعلى تجربة واذا تكررت سيتم تغيير البوابة كاملة في الضمان
لان الحساس مبيجيش لوحده

وفي انتظار خروج السيارة

حد عنده اقتراحات

ربنا يستر

الف سلامه و طمنا حصل ايه فى التوكيل و بعد ما مشيت بيها.

الحمد لله رجعت من التوكيل ((مرضي)) كالعادة

استقبال جيد جدا جايز عشان بقيت معرفة, جايز عشان بطلب الحاجه بهدوء وذوق, جايز توفيق من ربنا, الله أعلم

استلمت السيارة الساعة 2:30 في الميعاد المحدد

ما تم عمله:
1. تنظيف البوابة وحساس البوابة
2. تزييت دواسة البنزين وسلكة الدواسة
3. تزييت الدبرياج (دي منهم انا مطلبتهاش)

خرج مهندس خالد لتجربتها

النتيجة::

1. العربية بقت طلقة كأنها فاقت ورجعت زيرو من اقل ضغطة بنزين ال rpm يطلع في ثانية

2. السحب زاد جدا على الطريق

3. دواسة البنزين بقت زي الملبن تحت رجلي واضح اني حخليهم يزيتوها كل مرة او حشتري سليكون اسبراي وازيتها انا

4. عندي احساس ان صوت الموتور زايد بس ممكن دا يكون من ان اقل ضغطة بنزين بترفع ال rpm جامد اعلى من اللي انا متعود عليه

5. استهلاك البنزين كما هو واضح من كمبيوتر الرحلات

6. وأخيرا::: (وهي دي اللي مرجعاني مرضي) معايا شهادة جودة ممضية من مهندس خدمة العملاء انه سيتم تغيير البوابة في حالة تكرار المشكلة

7. نصيحة اخيرة من المهندس خالد: اللي سبق وكررتها لو حصل الموضوع ده مع اني حد يكارك بنزين بسرعة والموضوع حيخلص في ثواني (وهو ده اللي حصل معايا فعلا) وبعدين يطلع على التوكيل


شكرا توكيل رينو

وعلى الله انها متتكررش ثاني في مناطق بايخة (في نص كوبري الجامعة مثلا وهما بيفتحوه ولا حاجه) ولا على شريط القطر والقطر جاي من بعيد

حمد الله على سلامتك يا باشا و على سلامة لوجي =)))

حمداً لله على سلامتك و كان المفروض تعشق و تحمل على الدبرياج مسافة ال 20 متر دول على ما تركن.

خد بقى العربية كام لفة حلوين بكرة كده و الدنيا رايقة و شوف أيه الأخبار.....و لو لا قدر الله حصلت يبقى تطلع بيها السبت على التوكيل تانى.

بس أنا فى رأيي الشخصى أنهم كانو المفروض معملوش كده.

يعنى هما عملوا 4 حاجات ليها علاقة بالمشكلة....البوابة...حساس البوابة....الدواسة.....السلك.

المشكلة لو أتحلت أنت مش هتعرف أيهم كان سببها.

المفروض فى الحالة دى و خصوصاً انهما مشكلة خطيرة على اللى فى العربية كانوا يطلبوا العربية تبات كذا يوم و يتم عمل الحاجات دى على مراحل و تجربة العربية بعد كل مرحلة......ده الصح اللى كان المفروض يتعمل.

اقتباس:

---

المشاركة الأصلية كتبت بواسطة gebreel

حمد الله على سلامتك يا باشا و على سلامة لوجي =)))

---

الله يسلمك يا محمود باشا

اقتباس:

---

المشاركة الأصلية كتبت بواسطة ahmed a.maksoud

حمداً لله على سلامتك و كان المفروض تعشق و تحمل على الدبرياج مسافة ال 20 متر دول على ما تركن.

خد بقى العربية كام لفة حلوين بكرة كده و الدنيا رايقة و شوف أيه الأخبار.....و لو لا قدر الله حصلت يبقى تطلع بيها السبت على التوكيل تانى.

بس أنا فى رأيي الشخصى أنهم كانو المفروض معملوش كده.

يعنى هما عملوا 4 حاجات ليها علاقة بالمشكلة....البوابة...حساس البوابة....الدواسة.....السلك.

المشكلة لو أتحلت أنت مش هتعرف أيهم كان سببها.

المفروض فى الحالة دى و خصوصاً انهما مشكلة خطيرة على اللى فى العربية كانوا يطلبوا العربية تبات كذا يوم و يتم عمل الحاجات دى على مراحل و تجربة العربية بعد كل مرحلة......ده الصح اللى كان المفروض يتعمل.

---

مجاليش قلب بصراحة لاني كنت عايز اخلص من المشكلة باي طريقة
وبعدين انا مشيت بالعربية قبل ما اروح التوكيل كتير وبالليل كمان ومعملتهاش ثاني
فكان حيبقى صعب تحديد العيب

بس ايه رأيك هل فعلا صوت الموتور علي عندي ولا انا اللي بيتهيألي

حاجه ثانية: ساعات بحس ان لما بشيل رجلي من على البنزين بينزل المؤشر بتاع rpm بسرعة زي عادته القديمة بس بييجي عند الواحد ويقف شوية ثانيتين كده وبعدين ببطء لحاد النص زي زمان

ايه الحكاية

هل المفروض الار بي ام ينزل بسرعة لغاية نص الواحد ولا ينزل ببطء ولا ايه ؟؟؟

دواسة البنزين على واير بمخرج صغير طالع لبره شكله مش مريحنى كأنهم خرمين خرم بمفك
ما علينا
حمد لله على سلامتك والحمد لله انها جت على قد كده

الله يسلمك يا باشا

المهم انت بخير والعربية سليمة والمشكلة اتحلت ، وابقى طمنا لو حصلت تانى

ولك ارق تحية
اسمى اسفل مشاركتى

المهم انت بخير والعربية سليمة والمشكلة اتحلت ، وابقى طمنا لو حصلت تانى

ولك ارق تحية
اسمى اسفل مشاركتى

حمد الله على سلامتك و على سلامة لوجي

قدر الله وما شاء فعل والحمد لله على سلامتك
مش المشكلة ده شبيه بإلى حصل لفضيحة تويوتا الشهيرة فى أمريكا من حوالى سنة بتاعة الدواسات

الف حمدالله على السلامة

حمدا لله على سلامتك يا دكتور وربنا يسهل والعيب ده ما يتكررش.

حمد لله على سلامتك
طمنا ايه الاخبار دلوفتى

حمدالله على سلامة حضرتك يادكتور وان شاء الله تكون المشكلة اتحلت
بس بعد اذنك يعنى ايه يكارك بنزين ؟؟

اقتباس:

---

المشاركة الأصلية كتبت بواسطة hobby10

حمدالله على سلامة حضرتك يادكتور وان شاء الله تكون المشكلة اتحلت
بس بعد اذنك يعنى ايه يكارك بنزين ؟؟

---

يعنى يضغط على دواسه البنزين اكتر من مره ورا بعض

للاسف انا معايا لوجان فول 2010 عامله 43الف
المشكله حصلت معايا من شهر ونص كانت العربية بتبطل لوحدها وانا ماشى اول مرة كنت فى صلاح سالم وبصراحة اتضخظيط جامد جدا وقعدت تبطل طول اليوم لما روحت التوكيل بصراحة ماعرفش عمل ايه بس العربية بعدها بقت كويسه من مده وانا ماشى لاقيت الار بى ام على لوحده جامد وانا مكنتش دايس بنزين بس للاسف من امبارح العربيه كل 5 دقايق تبطل ومش عارف اعمل ايه بقيت ملشى ابص على التابلوه مستنى اللمض تطفى علشان ادور تانى ربنا يستر بكره الاحد هاروح التوكيل فرع المقطم ادعولى

الف سلامة وطمنا

الحمد لله على سلامتك ...

الف سلامة وشكرا على الإيضاح بتاع تكرك البنزين فى لحظة المشكلة دى.
وانا عملت بحث كدة فى موقع هندى عندهم اللوجان برضة وواحد حاطط صورة للمشكلة وحلها. هاحاول اطلع الصورة.

دة كلامة اللى اكتشفة

اقتباس:

---

The Air Inlet Manifold unit is made of plastic. The flange that attached the unit to the engine body was broken. This allowed the inlet manifold unit to rotate a few degrees clockwise. This resulted in the butterfly valve axis being off so when the accelerator wire pulls and rotates the valve it was not able to go back to idle position.

---

ودى الصورة الموضحة لوحوش الميكانيكا يفهمونااا
http://i47.servimg.com/u/f47/12/17/44/51/logan10.jpg

اتمنى الإفادة اية هى الحتة البلاستيك اللى بتتكسر دى ؟
الراجل دة فى النهاية غيرولة ال Intake Mainfold assemply كلة على بعضة فى الضمان.

في توكيل العبور تم تغيير البوابة كلها في الضمان

تمنها معدي الالف جنيه واختفت المشكلة نهائيا والحمد لله

شكرا توكيل رينو

حصلت قبل كدة مع والدي بس معرفش هل بسببه ولا بسبب العربية :(

حمد الله على سلامتك يا دكتور وبقى طمنا عملت ايه مع التوكيل

يا جماعة لو المشكلة دى متكررة يبقى لازم نكلم الشركة الام عشان كده ممكن الrpm يزيد وهى على غيار وتحصل بعد كده مصيبة ايه رايكم عشان مصلحتنا كلنا وارجو الرد من جميع ملاك اللوجان لان انا لسه جايبها من اسبوع وبالتقسيط ومش حمل خدش بس يحصلى مش كارثة زى دى
انا فى انتظار ردودكم