أخوتى الاعزاء
السلام عليكم ورحمة الله وبركاته
أتمنى أن تكونوا مستمتعين بشهر رمضان المبارك وأن يعيده الله علينا وعليكم وعلى المسلمين جميعا بالخير واليمن والبركات 0
معلش , واضح انى مابكتبش ليكم إلا فى حالات الحوادث فقط , قدر الله وما شاء فعل
إمبارح نزلت الصبح لقيت العربية مخبوطة جبطة جامدة جدا فى الباب الأيسر الخلفى وهى راكنة ومتغطية تحت البيت , طبعا حضراتكم عارفين الموقف ده مستفز قد إيه خاصة انى باحاول احافظ على العربية بحالتها الزيرو على قد ما أقدر وخاصة انى عرفت بعد كده انى اللى خبطها اثنين شباب كانوا بيتعلموا السواقة فى الشارع الساعة الثالثة فجرا وأنهم خبطوها اكثر من مرة يعنى مرتين على الاقل بدون أدنى إحساس بالمسؤولية او حتى محاولة معرفة من صاحب العربة للإعتذار له على الاقل 0
ما علينا , قدر الله وما شاء فعل 0 فيه واحد زميلى نصحنى برد الباب على البارد فى الحرفيين ووصفلى واحد كويس لأن إصلاح الموضوع ده فى التوكيل ممكن ياخد وقت وفلوس كتير 0 المهم أنى عملتها ورديتها على البارد لأن صاحب الورشة نصحنى انى ماعملهاش على السخن علشان يحافظ على الدهان الاصلى للعربية 0 هو حقيقةعملها كويس بس كان فيه جزء باقى فى اسفل الباب عند العتب ماعرفش يعمله على البارد وقاللى ده خليه كده خسارة اننا نرش العربية 0 طبعا الحمد لله على كل شيئ بس انا مش عاجبنى شكل العربية وفكرت انى اشترى باب جديد 0
يا ترى حد يعرف من الاخوة الافاضل هل باب العربية بيتباع بره التوكيل بمعنى فى التوفيقيى او بورسعيد مثلا وياترى عند مين وتمنه كام ؟ ثانيا يا ترى هل حد يعرف ايه احسن شركة تامين ممكن نتعامل معاها فى موضوعات التامين دى والتامين على العربية بيتكلف كام ؟
اشكركم جدا على وقتكم وكل عام وانتم بخير 0