الاستثمار فى الذهب وخبرات الاعضاء

**kaz08** · 09-09-2011 02:38 AM

هل نسيتم انه منذ حوالي 9 سنوات كان سعر الذهب متدنيا ، إن لم تخني الذاكرة كان قد هبط الى الثلاتينات للجرام.

وظهرت تحليلات ودراسات وقتها ان الذهب قد فقد قيمته كمخزن للقيمة وكغطاء للعملة .
كما اذيع ان البنك الدولي قد اعترض على بيع بريطانيا ( او ربما روسيا) لمقدار 80 طنا من الذهب مرة واحدة لكي لا تنخفض قيمته اكثر من كذلك، او بالاحرى لكي لاتهبط قيمته بمعدل عالي قد يؤثر على استقرار الاقتصاد العالمي. وغيرها من التعليقات والدراسات.

ثم جاءت حرب افغانستان ومن بعدها العراق واصبح العالم غير مستقر سياسيا ، فلجأ الناس إلى الذهب مرة اخرى وبالتالي ارتفع سعر مجددا. وزادت فترة التقلبات وزاد التوتر السياسي في العالم فعاد لالتصاق الناس بالذهب كملاذ آمن وكمخزن لقيمة العملة.

حتى وصلنا الى ما نحن فيه هذه الايام
والله وحده يعلم ماذا سيحدث فيها.

هنا نقطة جدلية مهمة: هل لو كان الاستقرار العالمي النسبي السابق على الحروب والثورات واحداث 11سبتمبر مستمرا هل كان الذهب سيهبط اكثر واكثر حتى يلحق بالفضة، كما تنبأت بعض الدراسات ذاك الوقت؟؟؟؟؟؟؟؟؟؟؟؟

لا اعتقد ان عندي من العلم ما يؤهلني للرد بالسلب او الايجاب على هذا التساؤل.

النقطة الثانية:

لماذا اهملتم حساب الزكاة الواجبة على الذهب ، وهي لمن لا يعلم من غير المسلمين 2ونص في المئة تدفع كل عام .

وطبعا هذه النسبة ستكون حسب بسعر الذهب وقت البيع وليس بسعر الشراء.

يعني ربما تصبح العملية كلها خاسرة من الناحية التجارية البحتة، اذا انخفض سعر الذهب.

طبعا ثواب الزكاة كبير عند ربنا ، وهي من اركان الاسلام الاساسية

لكني هنا اتكلم على الحساب المادي من ناحية الربح والخسارة.

للمناقشة مع الاخوة الاعزاء ادام الله عزكم.

**hugan** · 09-09-2011 02:48 AM

انا كنت شاري الشبكه ب28 جنيه سنه 98

**faragebraheem** · 10-09-2011 12:54 AM

الصديق العزيز الذى يتحدث عن الزكاة انما هى زكاة المال وليست الذهب وهى بمقدار 85جرام من الذهب الخالص عيار 24ولها شروط وهى ان يحول عليا الحول وهو عام هجرى كامل وان تكون هذه الاموال زائدة عن الحاجة بحث لايكون الفرد مستعملا لها كأن يكون مدخرها للحج او العمرة او لزواج ابنه او ابنته او لاجراء عملية جراحية او ما شابه ذلك بمعنى اننا اليوم مثلا سعر جرام الذهب ال24بكذا لو معايا فلوس تجيب 85 جرام ذهب ومش مستعملها مثلا وضعها فى بنك لما يمر عليها سنة هجرية لو الفلوس زادت بطلع على الفلوس كلها 2ونصف فى المائه يعنى 25 جنية من كل الف جنية اما لو انا عندى ذهب شريه ذهب مش ثمن الذهب اى ذهب مع زوجتى للزينة ليس فيه زكاة بس مش يكون زائد عن الحد يعنى واحد جايب لزوجتة كيلو ذهب او شارى ذهب علشان يستثمر فلوسة فيه ده فيه زكاة

**cameeron** · 10-09-2011 02:02 AM

انما لو الواحد معاه جنيهات دهب سهل يبيعها فى اى وقت و عند اى محل و الا مش هيرضوا يشتروها على اساس ان عندهم ازمة فى البيع بسبب غلو الاسعار

**Sharky** · 16-09-2011 10:28 PM

المشاركة الأصلية كتبت بواسطة bunsh_fox

ياااااااجماعة الله انا اعرفة ان افضل انواع ذهب فى مصر ايجى جولد ولازوردى (وتتأكد انها مختومة على فاتورة وبتبقى محفورة ف ذهب) بس عموما ابعد عن فصوص لأنها بتخسر من تمن ذهب ,, والافضل انك تشترى جنيهات ذهب او غوايش او اطقم كاملة ....

الأفضل الان فى مصر لازوردى فقط لكن ايجبت جولد قلل جدا من انتاجه و العمالة فى المصنع بعد الثورة

**szaalouk** · 16-09-2011 11:27 PM

متابع بأهتمام

**yousef1978** · 17-09-2011 12:19 AM

الاستثمار في الدهب من أفضل الاستثمار وأضمنه

لآو صعب إن الدهب سعره ينزل نزول جامد يعني

لو نزل نسبة بسيطه بيطلع تاني

وفيه عوامل كتير لكده أهمها قوة الإقتصاد الصيني والهندي واتجاههم بقوة نحو تخزين الدهب وطبعا الدول بتكون حريصه على عدم إنهيار قيمة المخزون بتاعها فمش هتسيب سعر الدهب ينهار

وثانيا إن نسبة أرتفاع سعر الذهب بالنسبة للمواد التانية زي البترول والمواد الأولية وأسعار المواد الغذائية منذ فك أرتباط الدولار بالدهب في أمريكا - يتعتبر الدهب مازال سعره أقل نسبيا لو قارناه بأسعار ذلك الوقت والحين مع باقي المواد

الاستثمار في الدهب بيكون بطريقتين وبداية واحدة

تروح حضرتك توصي أحد المعارف اللي عندهم محلات دهب إنه يشتريلك دهب مستعمل لصالحك
هو كصاحب محل دهب لما بيكون سعر الدهب العالمي للعيار الواحد وعشرين مثلا 310 فهو بيشتريه أقل جنيه او إتنين جنيه وبدون مصنعية يعني قول بسعر 308 وبعد خصم وزن الفصوص ونسبة ضئيييييلة للأوساخ التي على الدهب

وبعدين بيبيعه لتاجر الدهب الأكبر بعد ما يضيف عليه جنيه من سعر شراءه بسعر 309
فهو هيبيعهولك أنت أزيد جنيه عن التاجر الكبير يعني تاخده منه بسعر 310 وهو سعر المنتج في البورصة بدون مصنعية نهائي

أما لو اشتريت جنيهات دهب فهتدفع عليها مصنعية وختم تقريبا أربعة خمسة جنيه في الجرام غير تمنه وطبعا بيكون جرام 24 فمش عارف سعره كام

نيجي بعد كده للخطوة التانية

1- إنك تخزنه لغاية ما يغلى وتحتاج فلوس فتروح بايعه

2- إنك تكون عارف أحد أصحاب محل الذهب وواثق فيه جدا جدا جدا ومالي إيدك منه ومن كمان إمكانياته علشان لا قدر الله لو اتعرض لهجوم مسلح ولا حد ثبته بالدهب في الشارع واتسرق منه ما يقولكش أعملك إيه ؟؟؟

تديله الدهب ده يشغلهولك

هو لما واحدة تكون عاوزه تبيع دهبها ويكون حالته كويسه بيشتريه من غير مصنعية وبعدين ينضفه وممكن يلمعه ويعرضه تاني للبيع ولو هو أمين بيقول للمشتري إن الدهب ده مستعمل استعمال نضيف وبدل ما هآخد من حضرتك عشرين جنيه في الجرام هآخد سته سبعة جنيه فقط

ييجي في آخر الشهر يحسبلك المكسب ويديلك نسبتك

أعرف ناس عندنا في البلد اتعاملت معاهم كان ممكن يديني على المائة جرام في الشهر ثلاثمائة جنيه أو خمسمائة
والدهب زي ما هو لو حبيت تاخده بتاخده علطول وتبيعه لو حبيت

تحياتي

**نور القمر** · 17-09-2011 12:38 AM

انا عرفت موضوع الدهب المستعمل ده من المنتدى هنا بس للاسف كنت اشتريت قبلها
وروحت مع اختي تشتري خواتم وسألنا على المستعمل بس عند ثقة
خواتم تحفة لازوردي وطيبة متفرقش حاجة عن الجديد
حسب المصنعية للازوردي 8 جنيه للجرام بعد فصال على 10 جنيه
وطبعا اللازوردي معروف انك تقدر تبيعه في اي مكان في العالم بفصوصه
والطيبة مخدتش مصنعية عليه مقابل انه فيه فصوص
طبعا الجديد مصنعيته اعلى بكتير انا كنت شارية من شهرين على 25 للجرام من نفس الراجل ومكارمني
هو بيشتري اي جي كمان بفصوصه بس مش متأكدة الكل كدة ولا ايه النظام
طبعا الكسر بيفرق كتير في المصنعية لانها ب1 جنيه للجرام

**Sh_sunsea** · 20-09-2011 12:38 PM

أنا بفكر أشتري كام جنيه ذهب - قرأت المشاركات السابقة وماوصلتش لنتيجة بصراحة

انا معرفش محلات ذهب - ولا عايز أستثمر في الذهب - كل الحكاية عايز بدل ما أحط الفلوس في بنك وأقعد أشوف قيمة الجنيه بتنزل أسرع من فائدة البنك - أحفظ لابني حاجة على شكل جنيه ذهب

سؤالي - هل الجنيه الذهب فيه فصال - ولا سعره زي ما الجرنان بيقول -
ثانيا - تفرق أشتري جنيه ذهب - ولا أشتري نصين "نصف ونصف" جنيه ذهب علشان التصرف فيهم يبقى أسهل ..؟؟؟