الموضوع: الاستثمار فى الذهب وخبرات الاعضاء

المشاركة الأصلية كتبت بواسطة sh_sunsea

أنا بفكر أشتري كام جنيه ذهب - قرأت المشاركات السابقة وماوصلتش لنتيجة بصراحة

انا معرفش محلات ذهب - ولا عايز أستثمر في الذهب - كل الحكاية عايز بدل ما أحط الفلوس في بنك وأقعد أشوف قيمة الجنيه بتنزل أسرع من فائدة البنك - أحفظ لابني حاجة على شكل جنيه ذهب

سؤالي - هل الجنيه الذهب فيه فصال - ولا سعره زي ما الجرنان بيقول -
ثانيا - تفرق أشتري جنيه ذهب - ولا أشتري نصين "نصف ونصف" جنيه ذهب علشان التصرف فيهم يبقى أسهل ..؟؟؟

مش لازم تشتري جنيهات ممكن تشتري سبيكة مائة أوخمسين أو خمسة وعشرين جرام هتقع عليك أرخص

وساعتها تسأل التاجر

لو هيبيعلك السبيكة بمصنعية ثابته كقطعة بغض النظر عن وزنها
يعني هيقولك دي أو دي مصنعيتها مثلا مائة جنيه
فأنت ساعتها يكون الأفضل ليك تشتري السبيكة الأكبر وزنا علشان هتبقى مصنعية الجرام فيها أقل لأنك لو حبيت تبيعها هتخسر المصنعية

لكن لو هيديلك المصنعية على الوزن يعني مثلا يقولك خد اللي يعجبك والمصنعية اتنين جنيه على الجرام مثلا
فانت الأفضل تاخد السبايك الأقل من الخمسة وعشرة جرام وانت طالع
علشان لما تحب تبيع دهب شوية شوية تقدر بسهولة







بخصوص الزكاة

حسب علمي العلماء اختلفوا في زكاة الذهب المعد للزينة
1 - منهم اللي قال طالما بلغ النصاب يزكى عليه - ولهم أدلتهم - واعتبر بعضهم أن الذهب طالما زاد عن النصاب فقد أصبح الواضح فيه الإكناز وخرج عن نطاق الزينة ولذلك وجب عليه الزكاة

2 - منهم اللي قال طالما معد للزينه وتلبسه المرأة فلا زكاة عليه مهما كان وزنه - ولهم أدلتهم

3 - ومنهم من قال إذا بلغ النصاب وكان للزينة ولكن كان أقل من إمكانيات المرأة الطبيعي فإنه يعد كله للزينة ولا زكاة عليه، وإن كان مبالغ فيه وزائد عن إمكانيات المرأة فهذا يزكى عنه - مثال إن واحدة متوسطة الحال ومشترية كيلو دهب لكن حتى لو بتلبسه فهو بالنسبة لإمكانياتها فيه إكناز أكثر من كونه زينة
لكن واحدة مليونيرة وعندها كيلو دهب جايباه للزينة فده بالنسبة لها طبيعي - وطبعا لأصحاب هذا الرأي أدلتهم وهم يجمعون بين أدلة الرأيين السابقين

أما الذهب الذي يخزن ( يكنز ) بغرض تحويشه للزمن أو حتى ارتفاع سعره
فحسب علمي أنه إذا مر عليه الحول وكان بالغا للنصاب وجب عليه الزكاة وهي 2.5% - ولا خلاف في ذلك

والذهب الذي يتاجر به في المحلات فيدخل في باب عروض التجارة وهذه لها احكام أخرى

لكن بصفة عامة المفروض أي واحد عنده ذهب أو مال أو تجارة إنه يفتح على الأقل كتاب فقه السنة باب الزكاة وفي خلال ربع ساعة إن شاء الله هيعرف ما له وما عليه
لأن الإنسان لا يعذر بالجهل في كل شئ

وطبعا لما تقرأ هتقدر تحدد بكل بساطة أي الآراء حجته أقوى وتلتزم برأيه