مشورة في تصليح وصيانة الاوبترا

**khaloooda** · 19-08-2011 02:36 AM

استفسار ضروري يا جماعة
انا معايا اوبترا 2010
عملت بيها حادثة مروعة
العربية ادشملت
لدرجة اني جبت سكمري يشوفها قالي دي تصرف سمكرة بس 8000 جنيه

المهم انا سؤالي عن حاجتين

اولا : اصلحها في التوكيل ولا بره
انا عاوز ارجعها كأنها جديده دي لسه مكملتش سنة
عاوز صنيعية اساتذه لان العربية فعلا في الضيااااع -الحمد لله
وايه ظروف التوكيل من حيث الاسعار والكفاءة والمواااااااااااااعيد

ثانيا : لو قررت اروح توكيل - مين احسن مركز وعنوانه ايه
واللي فيكو جرب تصليح حادثة - لاقدر الله وربنا ما يكتبها علي حد
بس اللي جرب
خدت وقت اد ايه
هل قطع الغيار جاهزة عندهم ولا بيركني علي ما يجيبها
الدنيا زحمة بحيث العربية تقعد شهر واتنين ولا اسبوع عشر ايام وتخلص

وربنا يكفينا شر الطريق والحوادث
امين

**abou-yahia** · 19-08-2011 03:40 AM

حمدلله علي سلامتك
ربنا يعوض عليك بأذن الله
بص التوكيلا في اغلبها شعلها عك وغاليه
جرب تروح لسمكري متجرب احسن
وانا انصحك ب ورشه المنتدي
واكيد حيعملوا معاك واجب
http://www.nilemotors.net/Nile/bnnr.php?do=z&id=22
وشكرا

**Haitham10** · 19-08-2011 07:24 PM

8000 سمكرة بس ؟
عمري ما سمعت التمن دة ولا حتي في توكيل تمن مصنعية سمكرة فقط لا غير
سمكرة بالصاج وقطع الغيار ممكن
ممكن تعمل مقايسه في التوكيل وتريح دماغك عشان محدش هيفتيلك او تحط صور علي الاقل
و في ورش تبع اعضاء بيشكروا فيها في المنتدى زي ابو اياد و العقيد خالد

**khaloooda** · 19-08-2011 08:51 PM

ايوه يا باشا
ما هو يقصد 8000 سمكرة بقطع الغيار الخاصة باعمال السمكرة
من اكصدام امامي وخلفي وبابين جنب يمين وسقف وشبكة امامية
ده الظاهر بس لحد دلوقتي
دع غير اصلاحات الميكانيكا
ودي محدش قادر يحكم عليها الا لما العربية تتفك طبعا
خااااااااااااااصة وان المكنة ساقطة لتحت والفتيس احتمال يتغير هو كمان
يا رب استر

**Haitham10** · 20-08-2011 12:04 AM

معلش ربنا يعوضك ان شاء الله
بس نصيحة مني
عاين واحسب وحدد براحتك التكلفة وكله قبل ما تبدأ شغل فيها علي قد ما تقدر بشكل منظم وخلي معاك دايما ورقة وقلم
وتشوف سمكري واتنين وتلاته وتسمع الاسعار والمدة وجدية الموضوع وقارن ... متروحش ترمي نفسك علي صنايعي هيخرب بيتك والله وهيعطلك ويرميك لحبايبه يتقاسموا السبوبة

واكتب كل حاجه العربيه محتاجاه في ورقة وانزل اسال عليه بنفسك ولف في الحرفيين

معلش هي دوخة شوية بس عاوزك تخرج من المود الي انت فيه دلوقت وتفوق شوية وتنظم خطواتك الجايه وتعاملاتك

والنصيحة عن تجارب وربنا يبعدك عن كل شر او سوء

**ahmed643** · 20-08-2011 02:49 PM

اولا ربنا يعوض عليك وقضى اخف من قضى

اما عن العربيه انا عملت حادثه من سنه ونص وكانت كلام فارف يعنى جزء الفانوس اليمين دخل لجوه واتكسرت حته من الشنب واطبقت على فلتر الهوا والاكصداك كان اتكسر والرفرف والمكبوت كانو ادمرو وعربيه كانت لزقه فيا من الشمال من ورا والعضم داخل لجوه شويه وبس السمكرى اخد من 1500 جنيه مع انه مستعدلش اى حاجه يعنى الرفرف والكبوت انا جايبهم على حسابى جداد وكذلك الاكصدامات جبتهم استيرار
فطبعا المصنعيع بتختلف من صنيعى للتانى المهم لما تستلم تحس ان العربيه متلعبش فيها
وحضرتك بتوصف عربيتك على انها شبه مدمره فطبعا دا لو صنيعى كويس هطلب كتييير
بردو وريها لاكتر من واحد وربنا عينك

**Usama Nagi** · 20-08-2011 02:56 PM

معلش حطلنا صورة العربية عشان نقدر نساعدك و نعرف محتاجة ايه
التوكيل غالي جدا في اسعار السمكرة و الدوكو في ناس كويسة في الحرفيين ممكن يظبطلك العربية و هناك علي ما اظن هتلاقي قطع الغيار