افراج معوقين

**rzeiny** · 20-08-2011 06:00 PM

افيدوني ياجماعة من اسبوع واحد صاحبي راح بورسعيد ودفع فلوس في عربية نوبيرا 1 مانيوال مو 98 ب 33000جم ومستني عمل قومسيون طبي للي حتيجي العربية باسمه وحتفضل لمدة 5 سنين وانا قلتله انها مخاطرة علشان المرور والمخالفة و......الخ فهل السعر ده مناسب وهل في مخاطرة فعلا (هو واخد ايصال امانة على الراجل المعوق) وكيف يضمن حقه في حالة الوفاة ؟

**mustafavet** · 20-08-2011 06:36 PM

الموضوع دا حرام وغلط لانك بتاخد حق مش حقك وبتتحايل علي القانون اللي حاميني وحاميك وبتستغل فقر البعض من اجل مصالح زائلة
بالاضافة هو اشتراها بالمبلغ دا وهيروح يرفع قضيه علشان يجيب ليها افراج ب 9 الاف جنيه كمان اللي هو اصلا 9 علي ال 33 الي دفعهم كانوا يجبولك عربيه مستريحة عادية
لو مرفعش القضية واظن دا اللي بتفكر فيه واستني ال 5 سنين والعربية وقفت في كمين هتتاخد منه ومش هترجعله تاني لان اول حاجه بيبصوا عليها التجهيزات اللي انت اكيد شايلها ومش هتقدر تغير من هويه السيارة لانها موجوده بالرخصة
اتقوا الله في المال العام.....................
د.مصطفي

**elpasha1** · 20-08-2011 07:12 PM

للاسف مفيش اى ضمانات

**essamenen** · 20-08-2011 09:42 PM

سعرها غالى انا كنت فى بور سعيد فبل رمضان كان اعلى سعر لنوبيرا اتوماتك كامله 29 الغ من بقه بدون فصال

**fooz843** · 20-08-2011 11:27 PM

السعر ده مبالغ اوي نوبيرا 1 اخرها 22 ده لو هي بحاله جامده اوي و المعاق دلوقتي بياخد 6.5 او 7 مش عارف السعر اللي بتقول عليه ده بالمعاق ولا لا
وفي ورق كتير بتاخده علي المعاق بس كله ضعيف قانونيا والسياره لو انت ملكش حد في المرور حيبقي صعب لان في ناس معينه بتشتري العربيات دي من المعاقين وكلاء نيابه وضباط عشان يعرفوا يمشوا بالعربيات بدون مضايقات المرور
وكلمه بسيطه للناس اللي بتقول حرام يا حضرات المعاق هو اللي بيدور علي حد عشان ياخد جواب الكومسيون محدش بيضربه علي ايده وده مخالف للقانون وليس للشرع لا الفلوس حرام ولاحد ضرب المعاق علي ايده ده بيبقي في غايه السعاده لانه بيجيلوا فلوس من الهوا لانه عمره محيقدر يركب عربيه فبيلاقي مصلحه فيه
6000 ج من الهوا وشكرا وياريت رجل دين هو اللي يفتي مش اي حد

**mo3tazanas** · 20-08-2011 11:56 PM

موضوع المعاقين دة موضوع شائك ومن الاخر ما بيركبش العربيات دى غير وكلاء النيابة والضباط الجيش والشرطة علشان يعرفوا يمشوا بيها عدا زلك لو اتعكشت هتتاخد منك العربية وباي باى كمبورة (خازوق)

**mahmoudysf** · 21-08-2011 02:10 AM

المشاركة الأصلية كتبت بواسطة fooz843

السعر ده مبالغ اوي نوبيرا 1 اخرها 22 ده لو هي بحاله جامده اوي و المعاق دلوقتي بياخد 6.5 او 7 مش عارف السعر اللي بتقول عليه ده بالمعاق ولا لا
وفي ورق كتير بتاخده علي المعاق بس كله ضعيف قانونيا والسياره لو انت ملكش حد في المرور حيبقي صعب لان في ناس معينه بتشتري العربيات دي من المعاقين وكلاء نيابه وضباط عشان يعرفوا يمشوا بالعربيات بدون مضايقات المرور
وكلمه بسيطه للناس اللي بتقول حرام يا حضرات المعاق هو اللي بيدور علي حد عشان ياخد جواب الكومسيون محدش بيضربه علي ايده وده مخالف للقانون وليس للشرع لا الفلوس حرام ولاحد ضرب المعاق علي ايده ده بيبقي في غايه السعاده لانه بيجيلوا فلوس من الهوا لانه عمره محيقدر يركب عربيه فبيلاقي مصلحه فيه
6000 ج من الهوا وشكرا وياريت رجل دين هو اللي يفتي مش اي حد

+11111

العربية دي بالكتير متزدش عن 22 الف

المشاركة الأصلية كتبت بواسطة mustafavet

استاذ fooz843
انا مش بفتي وما زلت متمسك برايي
انت وهو بتتحبلوا علي القانون
انت بتستغل فقره وبتديله شوية فلوس
اي حاجة بتعملها وانت خايف تبقي غلط

انا عايز اعرف هو خسر المعاق ايه
وبعدين هو القانون بقى دين دلوقتي بقينا نفتي بيه
على فكرة كتير اوي من القاونين مخافة للشرع والدين اساسا
يا ترى في الحالة دي هتتبع انهي قانون القانون اللي من صنع البشر والا اللي من صنع الله
اخطر الحاجة هي التعرض للفتوى بدون علم

**rahmanboud** · 22-08-2011 12:40 AM

الموضوع من بدايته حرام لإستغلال ظروف الناس والتحايل على القانون ومتاجرة المعوق بإعاقته اللى هى إبتلاء من الله سبحانه وتعالى

بالنسبه للضمانات مفيش أى ضمانات حتى لو كاتب عليه وصل أمانه لأن الإنسان لا يحق له بيع ما لا يملكه والعربيه بيكون عليها حظر بيع فهى غير مملوكه له 100 فى 100 الا بعد رفع حظر البيع يعنى بعد خمس سنين

أما فى حالة موت المعوق يبقى يعوض عليك ربنا فى كل حاجة