المشاركة الأصلية كتبت بواسطة ossamaaly
السلام عليكم ورحمة الله،
إنهاردة حطيت السيراتيك، إشتريته من موزع الإسكندرية.. برضه إشتريت إنجكشين كلينر بس مستني لما التنك يفضى شوية عشان أحطه... الأهم بقى أنا عايز أحكي التجربة دي.
أنا معايا رونو كليو 2008 ومن فترة كده ظهرت عندي مشاكل في الباور واصبح تقيييييييييييل أوي ولا كأن في باور
المهم رحت عند ميكانيكي تخصص رونو قام قالي إن إحتمال كبير الطلمبة باظت وعشان يتأكد حيجيب طلمبة سليمة ويجرب بيها..
وتم التغيير لكن للأسف مكانش في أي تحسن.. قام قالي كدة يبقى الإسكاترا باظت ولازم تتغير عشان الطلمبة كمان متبوظش.. المهم الوقت كان إتأخر وسألته عن تمن الإسكاترا قالي الإستعمال تعمل 1200 والجديدة 3000..
وأنا مكانش معايا المبلغ ده..
قلت طب خليها يوم تاني وروحت ودخلت علي اليوتيوب وعملت سيرش علي باور ستيرنج ولقيت ميكانيكي دمه خفيف جدا إسمه سكوتي كليمر وبيتكلم عن نفس المشكلة إللي أنا بعاني منها، وأول حاجة قالها ليه تشتري سكاترا جديدة وغالية في حين إنك ممكن تستخدم منظف لدورة الهيدروليك، وشرح الموضوع ببساطة وكانت النتيجة رائعة..
عجبني الموضوع جدا وقررت إني أعمله بنفسي ، المهم سألت الموزع بتاع الliqui moly عن منظف هيدروليك قالي مفيش وقالي إن الإضافات حتفضل فترة متنزليش عشان الطلب غير عادي على زيوت الموتور.. دورت عنده علي أي بديل وفكرت إني أستخدم engine flush يمكن ينفع،
وفعلا حطيت عبوة 300 مللي وتركت الموتور داير لمدة 30 دقيقة وكل خمس دقايق ألف الدريكسيون شمال ويمين،
وكانت المفاجأة الباور إشتغل،
بقيت مش مصدق بس كنت قلقان من تأثير المنظف علي الإسكاترا والطلمبة لأنه مش خاص بالأجزاء دي أصلا،
فإشتريت عبوة زيت باور وفضيت الزيت والمنظف من دورة الهيدروليك وحطيت الزيت الجديد، وجربت العربية والحمد لله الباور إشتغل وإن كان في تكة عند أقصي اليمين والشمال.. واضح إن لازم أجيب المنظف الخاص بالهيدروليك..
الخلاصة واضح إن فعلا العلم نور وإن الدنيا إتغيرت وممكن بأشياء بسيطة توفر فلوس كتيييييييير وكمان وقت ومجهود،،
بإذن الله حتابع معاكم نتائج السيراتيك ، ومنظف الإنجكشين، وناوي أجيب الإضافة بتاعت الجيربوكس عشان ساعات بحس بتقل في الغيارات وبركاتك يا ليكي مولي