الموضوع: هو فيه ايه؟

هو ما ينفعش الواحد اللي لسه بيتعلم سواقة او في أول سواقته يمشي في الشارع؟.. طيب امال يمشي فين؟

النهاردة سايقة في الشارع و طبعا لسه في بدايات سواقتي فواخدة يمين و ماشية على مهلي.. ألاقي اللي لازق ورايا و مصر إني أسرع.. طيب ما الشارع واسع و ممكن حضرتك تعدي بسهولة.. و لا هي غتاتة و خلاص؟ و طبعا لزما و حتما و لا بد اللي يبقى عايزني أسرع و انا ما سرعتش و يقرر في الآخر انه يعدي من وريا لاااااااااازم لما ييجي جنبي يقوم باصص لي شذرا او مشوح بإيده أو مزعق او شاتم.. لازم دي كل مرة تحصل لدرجة اني بدأت أعتقد اعتقاد راسخ انه ممكن يشيل ذنب لو جه جنبي و ما عملش اي حاجة من اللي قلتها دي.. او ممكن يروح النار.. حاجة زي كده

و لما اللي بتعلمني السواقة تكون راكبة جنبي و حد يلاحظ انها بتعدلي الدركسيون و لا حاجة، ألاقيه يزعق لها و يقول لها حرام عليكي بتعلميها السواقة هنا؟.. و هنا دي غالبا بيكون شارع كورنيش النيل.. بس هو ما اقترحش عليها انها ممكن تعلمني السواقة فين؟.. حتة هادية مثلا و مافيهاش عربيات خالص و بعدين تسيبني في الشارع مع البشر دول من غير ما أتعلم في شوارع عادية.. تطلقني عليهم عشان أطلع عينيهم :o

واحد امبارح لازق في قفايا و عمال يكلكس عشان أنجز.. انا واخدة شمال عشان هالف شمال و مدية إشارة من بدري.. و ده آآآآآآآآآآآبدا.. شغال بالكلاكس لما زهقني.. طيب انا واحدة رخمة و بطيئة و مملة.. إبعد عني يا أخي

انا عندي سؤال: همه ليه الناس مش مدركين ان فيه بشر ممكن يكونوا لسه في أول سواقتهم؟ يعني مش زيهم طبعا نازلين من بطن الماما بتاعتهم سويقة :p

سؤال كمان: همه الناس مستعجلين اوي كده على ايه؟