الموضوع: تقرير سريع عن صيانة ال45 الف فى السبع

لدواعى السفر المتكرر وتربيط العفشة من المطبات وتلف الكلاكس اضطريت اروح اعمل صيانة 45.000 كم فى السبع فى رمضان يوم الثلاثاء 16-8 وحجزت ميعاد بعد الافطار وروحت
طبعا مش عاوز اقولكم اللى مش مضطر يروح يعمل صيانات فى رمضان ما يروحش لأن السبع مثلا مقسم الناس كلها على ورديتين وده مأثر على حجم العربيات اللى بتدخل تعمل شغل فى الورشة والتكدس فى الخارج
يعنى انا كان عندى اخرها تاخد ساعة من اول ما وصلت اول ما سلمتها للمهندس اسلام قالى معلش من ساعتين ونص لتلاتة
قولتله الساعة 10 ولسه هارجع والطريق وحش
قالى هاحاول والله غصب عنى
المهم دخلت الورشة بعد ساعة وقعدت جوة ساعة يعنى كله على بعضه ساعتين
وفى الاخر لحظى السيىء فردة الكلاكس الواطى كانت خلصانة فركبلى الفردة العالية بس فى الضمان وقالى اول ما هاتيجى نكلمك او تابع معانا ع التليفون
قولت الحمد لله ومشيت
وبعد يومين على الخميس كنت فى القاهرة الساعة 2 وكلمتهم عرفت ان الكلاكس موجود قومت رايح عشان اركبه بالمرة لأنى مش كل يوم فى القاهرة او هاروح مخصوص عشان فردة كلاكس !!!
وصلت هناك على 3 عصرا تقريبا ودخلت سلمتها وشرحت اللى حصل معايا وان الشغل مش هاياخد اكتر من ربع ساعة ومش عاوز غسيل عشان ما اتأخرش
المهندس مشكورا تفهم انى من خارج القاهرة وعشان الحق الفطار ويوم خميس طبعا مش محتاجة وصف وعمل اللازم
ولقيته مخرجهالى قبل 4 الا ربع
شكرته ومشيت
الحمد لله وصلت البيت 7 الا ربع المغرب
الطريق ما اقولكوش سيىء ازاى والله يكون فى عون اللى قاعدين فى القاهرة او اللى شغالين وراحين جايين كل يوم
قعدت ساعة بحالها لحد اما وصلت لدائرى المعادى !!!