الموضوع: مواضيع فادى مجمعه(جوان وش الأسبراتير-جوان وش التاكيهات-تنظيف البوابة-ترموستات الكوعه)

السلام عليكم ورحمه الله ....
- اول حاجه هوريكم منظر السقف عندي كان عامل ازاي ودي انظف حته فيه واللي عنده عيال صغيره هيعرف معني كلامي


-هنقول باسم الله ونفك الشماسات اللي قدامك ليها جزئين جزء ماسك الشماسه نفسها بمسمارين والاخر اللي بتركب عليه الشماسه وراكب بمسمار من تحت كده زي الصوره, مد ايدك ورا لمبه الصالون هتلاقيها راكب فيها فيشتين رفيعين يمين وشمال اسحبهم وفكهم ولما ينزل السقف فك الشاشه المضيئه وقاعده اللمبه والفرام الصاج بتاعها هتلاقي الموضوع سهل جدا.


-بعد كده هنفك المقابض اللي في السقف (المساكات) كل مقبض ليه مسمارين اتخن شويه من مسامير الشماسات ,خلي بالك ان المسامير مختبئه تحت بلستكه كده هنرفعها ببوز المفك هتلاقي المسمار واضح فكه بالجي ام وبص ع الصور ياباشا


-لو بصيت ورا خالص هتلاقي السقف متثبت ب3كلبسات ضغط هتطلعهم بره ببوز المفك بالراحه علشان ترجع تستخدمهم تاني .


-دلوقتي السقف متعلق فقط علي ال6 قوايم الفبر ,فك ال2 اللي قدام خالص وال4 التانيين هويهم بس علشان نسحب السقف من تحتهم ,القوايم الفبر متثبتين في جسم العربيه بفيشرات (كلبسات) ماعليك الا انك تشد الفبره لبره علشان تخلص الكلبس من مكانه وترجعه تاني بالضغط عليه



-هتخرج السقف ازاي بره العربيه؟؟ هيخرج من بابك هتلفه 90 درجه ناحيه الشمال وانت بتشد لبره هيخرج معاك .
- هتشيل القماش القديم وتنظف مكان الاسفنج اللي هتلاقيه ناشف كويس قوي ,لو فركته بايدك هيقع .. نسيت اتكلم عن القماش .. هو اسمه (استوفه) عباره عن الطبقه اللي انت بتشوفها دي ولازق فيها اسفنج سمك 3 ملي انا جبت متر ونصف سعر المتر 30ج من عند اللي بيبيع حاجه السروجيه بس اتاكد انه نفس اللون بالضبط ,الفرش عندنا لونه ترابي مش رمادي خلي بالك وتجيب فرشه دهان 2 بوصه وعلبتين لزق اسفنج احنا بنسميه (اجو) ماتجيبش غير نوع مصري اسمه الشعله الذهبيه والعلبه لونها ذهبي ب8ج ده احسن حاجه ..
- نيجي لاهم حاجه اولا بعد ما نظفنا السقف هنلاحظ انه مصنوع من الورق المقوي وبداخله نسيج فيبر جلاس علشان كده هنديله وش بالاجو علشان نسد مسام الورق ولما نيجي نلزق بعد كده ما يشربش اللجو والقماش يفك .تقريبا السقف هياخد اول علبه .ماشي سيبهه ينشف براحته وبعد كده هنبدا نفرد الاجو ونسيبه دقيقه ونلزقه .خلي بالك من الاتي ..
*ابدا اللصق من منتصف السقف وبعدين اتجه للاطراف
*هتفرد الاجو علي شكل سطور عرضيه بعرض 20 سم تقريبا وبعد ماتنشف نعمل اللي بعدها
*ماتزودش الاجو علشان القماش ما ينقعش ويبقع
*وانت ماشي شد القماش كويس براحه ايدك علشان تخرج الهوا
....ممكن تقص حته قماش فاضله وتدرب نفسك في لزقها علي ظهر السقف قبل ما تشتغل علي وشه وتشمشي ايدك علشان ماتغلطش .
*بعد ماينشف خالص سيب دايرمايدور 2سم واتنيهم لوره علي السقف
.
-كده كله تمام قوي ركب لمبه الصالون تاني ودخل السقف داخل العربيه زي ماطلعناه واسنده بس علي الفبرتين اللي ورا خالص علي بال ماتركب الشماسات وهكذا..نسيت حاجه كمان ...قبل مااركب السقف اشتريت عازل حراري زي الفوم كده بالمتر سمكه 5 ملي وقصيته وحطيته قبل مااركب السقف علشان الحراره ماتوصلش للسقف وتظبطنا في الحر .

....*المحصله النهائيه ان الحمد لله السقف طالع زي المصنع بالظبط ونفس الخامه واللون والجلاله هتاخدني وفي اقرب فرصه هغير فرش الابواب برده بنفس الطريقه ودي صوره السقف بعد العمليه ..

الموضوع سهل جدا بس عاوز بال رايق وصبر وحس فني .ربنا يوفق الجميع وعاوز اعرف رايكم ؟