الموضوع: مواضيع فادى مجمعه

المشاركة الأصلية كتبت بواسطة فادى محمد

بسم الله الرحمن الرحيم ..

الترموستات..
هي عباره عن شكل مخروطي من النحاس(لانه يكتسب الحراره بسرعه ويفقدها ببطيء) وله بوابتين للفتح والغلق(التحكم في معدل سريان مياه التبريد) وتحت كل بوابه سوسته لارجاع البوابه مكانها وفق درجات حراره الموتوركما هو مبين بالشكل .



مكانها..
ناحيه الشمال هتلاقي كوع انتيمون وراكب عليه خرطوم تخين يربط بين المانفولد والرادياتير ,الترموستات داخل هذا الكوع

وظيفتها..
وظيفتها الاساسيه تسخين الموتور صباحا والمحافظه علي درجه حراره التشغيل الطبيعيه.
اليه عملها..
هي طبعا فكره عبقريه في انها تقفل علي الميه السخنه اللي داخل الموتور للحفاظ علي درجه حراره التشغيل ,وفي نفس الوقت تسمح للجزء الاخر من مياه التبريد واللي موجود في مواسير الرادياتير انه يبرد من خلال مواجهته للهوا المصطدم بالسياره الي ان تصل درجه حراره الموتور ل 82د(مكتوب علي الترموستات) تبدا بوابتين الترموستات يتحركوا في مواجهه بعض علشان يسمحوا للميه اللي بردت انها تحل محل الميه السخنه اللي كانت جوه الموتور في عمليه ريبلاسمنت او ازاحه وهلما جره للحفاظ علي الحراره في معدل التشغيل المناسب .
كيف تعمل؟؟
لما الميه بتسخن وتوصل لدرجه الحراره المطلوبه في بنز في نهايه الترموستات بيتمدد رافعا البوابه الكبيره لاعلي وخافضا البوابه الصغيره لاسفل وبكده يسمحوا للميه انها تتدفق ولما درجه الحراره بتقل بينكمش البنز غالقا البوابتين لحبس الميه وهكذا وطبعا السوستتين هما اللي بيساعدوا البوابات انها ترجع مكانها .
تجربه عمليه..
عملت تجربه في البيت علشان اوريكم ازاي البوابه بتفتح وتقفل ..
اولا ...دي صوره الترموستات وهتلاحظم ان البوابه الكبيره قافله تماما(تحت سن القلم)


ثانيا...حطيت اناء علي النار فيه ميه بتغلي ونزلت فيه الترموستات وطلعتها بعد دقايق ..هتلاحظ ان البوابه اللي كانت قافله لتحت فتحت لفوق (سن القلم نزل تحتها) ولما بردت الترمو.رجعت البوابه لمكانها


اضرار عدم وجودها ..
بعض الميكانيكيه (العباقره) بيعتقدوا ان وجود الترمو.بيسخن الموتور وبيشيلوها وده غلط طبعا لان بكده مياه التبريد بتكون اما كلها سخنه جدا (اثناء السير في الزحمه او الصيف) او بارده جدا(في السير الطوالي والشتاء) وبكده هتلاقي الموتور بينتش وسحبه ضعيف الصبح لانه مابيسخنش ويستهلك بنزين اكتر +في ضرر علي وش السلندر نتيجه تعرضه لحراره عاليه ثم بروده اثناء السير .عن تجربه شخصيه اثناء تحضير الموضوع ده ,سافرت بدون ترموستات (شيلتها علشان اصورها) امبير الحراره كان علي الازرق واستهلاك البنزين زاد بنسبه 13% ولما رجعتها مكانها حسيت بالفرق .يارب الموضوع يعجبكم وماتنسونيش في الدعاء .

خاص بنايل موتورز وممنوع النقل او الاقتباس

جميل جدا .شكرا على التوضيح

استاذ فادي عندي سؤال عن ثرموستات الكوع عشان انا الميكانيكي فصلهالي من غير مايقولي عشان كانت افشت فجأه وسخنت و كل الفبر الي في دايره التبريد ضرب طبعا (بوابه دخول السخن للتكييف و شجره الميه و علب الرادياتير) و لما لقيتها علي طول بارده كلمته قاللي انه لغاها و عملهالي مفاجأه
انا دلوقتي عايز اجيبها و اركبها عربيتي كورسا 2005 ينفع اعملها ولا اشتريها و اروحله يعملهالي
و اجبها نوع ايه و منين. انا بنزل التوفيقيه و الحرفيين ماعنديش مشكله اروح اي حته يعني

ياريت تقولنا جيبتها بكام

شكرا يا استاذ فادي.. انا قلت الحق استفاد من الاجازه واعملها. و انا بحب اعمل حاجات كتير بايدي بس لما بتبقي كبيره بخاف الصراحه. واخر حاجه عملتها تنضيف الايدل بعد ماشفت مواضيعك الجميله و طبعا نزل هباب و حسيت اوي بنضافته. المهم انا اشتريت الترموستات و بتتباع في كل حته كامله بالكوع مش لوحدها و جبت اسعارها من اكتر من مكان وكلهم زي بعض و جبت GM من محل اسمه الغنيمي في عباس العقاد
Gm 225 جنيه
Wehler 200جنيه
اتحاد اوروبي و حاجات تانيه 140
و جبت رادياتير هندي 490 جنيه
وهركب النهارده ان شاء الله