الموضوع: مشكلة عاوز رأيكو فيها

فيه مشكلة كده عاوز رأيكو فيها يا جماعة
هي شخصية شوية
المشكلة هي
باختصار ... اخويا
اخويا الصغير حاليا في كلية
ونظرا لدلع والدي ووالدتي فيه من زماااااااان
وانهم عودوه ان احلامه اوامر طالع اتكالي جدا
بقي رااااجل واطول مني ولحد دلوقتي ميعرفش يقضي مشوار ولا يخلص مصلحة
حتي هدومه ميعرفش ينزل يجيبها لوحده
عاوز حد معاه
ميعرفش يشتري حاجة من السوبر ماركت ولا يجيب 2 كيلو لحمة من الجزار
رغم انه لما بيركز في حاجة بيعملها والدليل نجاحه في الكلية مثلا

اتجننت منه .... ده كلها شهور وهيتخرج ولما هيحتك بالحياة هيتصدم
ووالدي ووالدتي ربنا يديهم الصحة وطول العمر يارب مش هيعيشوا ليه علي طول
دي سنة الحياة

هما دلوقتي بيندموا علي دلعهم فيه اللي وصله للدرجة دي
لكن للاسف الندم جه متأخر

المهم حاولت معاه يشتغل في الصيف او يروح اي مكان او يعمل اي حاجة تخليه راجل بجد
يقدر يعتمد علي نفسه ويبقي مستقل
مفيش فايده

شايل همه وهو اطول مني
وهو مش حاسس ان اللي هو فيه ده اكبر غلط
مش شايف عيب في انه راجل ملو هدومه كلها شهور ويتخرج ويشتغل ويمكن يتجوز كمان
وهو ميعرفش يقضي اي مصلحة

لو فردة الاستبن نامت منه في الطريق ممكن يقعد جنيها لحد ما يجيله حد يعملها له
لو اتحط في موقف مش بيعرف يتصرف وبينتهي بيه الحال حاطط ايده علي خده وقاعد مستني حد يجي له يقوله يعمل ايه
حاولت احطه في مواقف تعلمه ازاي يبقي راجل ويعتمد علي نفسه
يا يرفض يا اما يكبر دماغه لانه شايف ان كده هو مستريح
رغم انه كويس ودماغه حلوة - بس لما تشتغل

باختصار - انسان زكي ونبيه لكن الدلع والاتكالية وصله انه بقي "قليل الحيلة"
"مبيعرفش" بكل معني الكلمة
في اي حاجة وفي كل حاجة
وزاد وغطي انه انطوائي شوية
ليه يا دوب صاحب او اتنين
رغم ان سنه بتاع السهر والسفر والفسح والصحوبية اللي بجد
لو كلم بنت - عرضا يعني لاي سبب - وشه يحمر ويبقي حاطط عينه في الارض حتي لو عندها 10 سنين
والله بدون مبالغة 10 سنين

ياريت لو حد ينصحني بحاجة او يشور عليه بمشورة بخصوص الموضوع ده
وليه مني دعاء خاااااالص لوجه الله

مع ملاحظة ان العام الدراسي قرب
يعني مش هقدر اقوله سافر بعيد او اخليه يشتغل او كده اكتر من الشهر اللي فاضل علي ما تبدأ السنة

وشكرا

عادى سيبه بعد الكلية لما ينزل سوق العمل هيتعلم من نفسه متقلقش عليه