الموضوع: نريد تقييم أصحاب الجين 2 فقط

انا بس حبيت اقول كلمتين ان انا حبيت جين 2 عشان خاطر كلام الاستاذ توت عنخ امون عن السياره و اد ايه هو بيحبها و بيدافع ضد اي هجوم عليها
تاني حاجه من زمان عاوز اقوله ان بحب التوقيع بتاعه جدا بس انت زودت الماتركس مش فاهم قصدك ايه
وبعدين انا عاوزك تقولي الماركه بتفرق جامد يعني بروتون مش معروفه زي بيجو اوبل
هل بتفرق معاك اسم الماركه لانها فارقه معايا جدا لان اسم ماركه مثلا زي البيجو ليها تاريخ و سمعه و عربيات اعتماديتها عاليه جدا لكن البروتون مين بس اللي سمع عنها
تقبل تحياتي ليك

الاخ ASD peugeot
طبعا الماركات اللى انت بتتكلم عنها و خاصة البيجو ليها احترامها و اعتماديتها بس حط فى اعتبارك ان بروتون فى سنوات قليلة عملت عربيات محترمة جدا و لسه بتاخد فرصتها و ان كانت اثبتت بجدارة انها هايكون لها باع طويل جدا فى مجال صناعة السيارات

الاخ ahmedmokhtar

الف مبروك يا ابو حميد و ربنا يكرمك ان شاء الله
انا بس مستغرب كلامك على موضوع التليين لان الاخ اللى سلمنى العربية قالى اعمل اللى نفسك فيه العربية متلينة و جاهزة على الشغل العالى
و مع ذلك انا ماقرصتش خالص على العربية بس استدخمت التكييف عادى و طبعا مع الاستخدام ظهر العيوب اللى فيه و ده الكلام اللى قاله الراجل بتاع المبيعات
قالى استخدم التكييف و العربية عادى جدا علشان و انت بتعمل صيانة الـ 1000 تقدر تراجع المشاكل اللى فى عربيتك زيى مايكون الراجل كان قلبه حاسس
عموما اى حد و هو بيبيع هايبقى حلو و شيك جدا بس و انت بتعمل الصيانة هتلاقى حاجة تانية و نصيحة يا ابن الحلال ابقى حمرلهم عنيك شوية علشان حقك مايروحش
و ان شاء الله العربية تطلع زيى الفل زيك كده و تروح تعمل صيانة الـ 1000 العادية بدون ملاحظات

الاخ توت

انا فعلا هاستنى لحد لما اعمل صيانة الـ 5000 و اقيم العربية من اول و جديد و تقريبا انا موش هاصوت بس انا هاصوت و الم الناس كلها

المشاركة الأصلية كتبت بواسطة ASD peugeot

انا بس حبيت اقول كلمتين ان انا حبيت جين 2 عشان خاطر كلام الاستاذ توت عنخ امون عن السياره و اد ايه هو بيحبها و بيدافع ضد اي هجوم عليها
تاني حاجه من زمان عاوز اقوله ان بحب التوقيع بتاعه جدا بس انت زودت الماتركس مش فاهم قصدك ايه
وبعدين انا عاوزك تقولي الماركه بتفرق جامد يعني بروتون مش معروفه زي بيجو اوبل
هل بتفرق معاك اسم الماركه لانها فارقه معايا جدا لان اسم ماركه مثلا زي البيجو ليها تاريخ و سمعه و عربيات اعتماديتها عاليه جدا لكن البروتون مين بس اللي سمع عنها
تقبل تحياتي ليك

أسد البيجو ............. منور و تحياتي لك
و الحمد لله إن حضرتك حبيت العربية بسبب كلامي ..بس هي تستاهل تتحب
و بالنسبة لتوقيعي ...... الماتركس دي يا سيدي هي : -
عارف فيلم ماتركس ......... بتاع الدكتور مورفيوس و البت ترينتي و الواد نيو ......... و نيو ده هو بطل الفيلم
و لو عايز تفاصيل أكتر ........ أقولك بس أكيد حضرتك أفتكرت الفيلم .... صح ؟
بالنسبة للماركات
بص يا أسد باشا
ماركة بيجو لها صولات و جولات في مصر و بتصنع سيارات ممتازة
و لكن هل موقعهم في السوق دلوقتي زي موقعهم في السوق في السبعينيات و الثمانينات ؟؟؟
طبعا لا
تعالى نرجع شوية سنين لورا
في الثمانينات و السبعينيات
مكنش فيه حاجة أسمها ياباني ........ و الناس كانت بتعتبره ورق و عربيات أي كلام
و بعدين دخل الكوري ....... و نفس القصة لم يكن له أي أسم
تعالى شوف دلوقتي
الياباني و الكوري مسيطيرين سيطرة تامة على سوق السيارات في مصر
و لو الناس مكنتش أديتها فرصة في الأول و جربت تشتري مكنتش هتلاقي حد في المنتدى هنا بيقول الكلمة المشهورة
دي ياباني ؟؟؟
و لو مشينا بالتاريخ بس
يبقى مش هاتلاقي في مصر غير فيات و بيجو ...... و اللي مقتدر هايجيب مرسيدس
و خلص الكلام
إنما علشان الناس بتجرب و تشوف الجديد بتلاقي حاجات جديدة بتظهر و بتثبت كفائتها و بتثبت إعتماديتها أو بتنافس في فئة سعرية كويسة و بتجذب الناس لها
نيجي بقى لبروتون
بروتون ماركة ماليزية تم بناء المصنع و بداية الإنتاج تقريبا عام 1981 أو 1983
المهم بدأ الإنتاج بعقد شراكة مع ميتسوبيشي اليابانية بعد أن تم تأسيس الشركة اليابانية عام 1973 و مكنش الفرق كبير بينهم فأشتركت ميتسوبيشي لتقديم موديلات تحت إسم بروتون و بتعاون كامل من ميتسوبيشي
و بدأ الإنتاج و كانت إتفاقية التعاون بين بروتون و ميتسوبيشي أنه لا يُسمح لليابانية بتصدير إي سيارة ميتسوبيشي إلى ماليزيا حتى يتسنى للمنتج الجديد المنافسة في السوق الماليزي المحلي
و مكان هذا التعاون مفيد جدا لبروتون خصوصا إن ميتسوبيشي شركة جديدة في عالم السيارات و لكن لها إمكانيات ضخمة و خبرة كبيرة في عالم الميكانيكا حيث أنها كانت أحد الصناعيني الأساسيين للطائرات الحربية للجيش الياباني في الحرب العالمية الثانية
و في بدايات الإنتاج كان يتم إستيراد كافة القطع و المكونات من اليابان و تدريجيا كان يتم إستبدال المكونات الياباني بمكونات ماليزي حتى تم ذلك في وقت قصير جدا و هو حوالي 8 سنوات
و أصبحت ماليزيا ( بروتون ) تنتج سيارات ميتسوبيشي تحت إسم مختلف و خاص ببروتون و مكونات ماليزية تماما
و جاءت لحظة الإنفصال عن ميتسوبيشي و لكن هذا الإنفصال لم يلاحقه إنفصال في التعاون التكنولوجي و استمر التعاون بينهم لمدة طويلة إلى أن أشترت بروتون شركة لوتس الإنجليزية لتصنيع المحركات الرياضية و السيارات الرياضية بوجه عام
و خرجت أول سيارة من تصميم بروتون بالتعاون مع لوتس و كانت الواجا و لكنهم كانوا في منتصف الطريق لصناعة محرك
فقاموا بشراء تصميم محرك من ميتسوبيشي و هو المحرك الخاص باللانسر
و طبعا أداء السيارة مختلف عن أداء اللانسر لأنها أثقل منها و صاجها أقوى
المهم و بعد إنهاء العمل في المحرك كامبروا مع لوتس الإنجليزية تم إنتاج و تصميم ثاني سيارة من بروتون و هي جين 2 و تم تقديم أول سيارة ماليزية بالكامل
و يتم بيع الإنتاج الماليزي من بروتون في المملكة المتحدة ( بريطانيا ) و أثبتت شركة بروتون جودة إنتاجها و عدم وجود أعطال ميكانيكية في سيارتها إطلاقا
فلم أسمع و لا شكوى واحدة من ناحية المحركات
و أنحصرت كل الشكاوى في التقفيل و ليس الصناعة
و لذلك هذه الماركة تستاهل و أنا بصراحة فرحان بهم جدا لسببين
أولا بينتجوا إنتاج كويس و لما بتشتريه مش بترمي فلوسك في الأرض
و ثانيا هما مسلمين و هي أول شركة إسلامية تقدم إنتاج سيارة من دولة إسلامية بالكامل و تعتبر الماركة الإسلامية الوحيدة الموجودة على وجه الكرة الأرضية و هذا بخلاف المصانع الموجودة في الدول الأخرى التي تقوم بالتجميع أو اعادة تقفيل سيارات قديمة الموديل مثل إيران و تركيا
و طبعا مصر و الدول العربية ........... إنسى يا عمرو ( على رأي اعلان جهينة )
و بالنسبة لسؤال حضرتك الأخير
هي البروتون بس مين اللي سمع عنها ؟؟
أنا هاجوبك
سنة 1990 ...... كان مين بس اللي سمع عن هيونداي و كيا و دايو

و أوائل الثمانيات ... هو كان مين اللي سمع عن الياباني كله ؟؟

و برضة في أوائل الثمانيات .... هو كان فيه حد بيثق في أوبل أو أي ماركة أوروبية غير .......... فيات و بيجو و مرسيدس و ممكن فولفو ............

و تدور عجلة الزمان ................. أخوك توت

المشاركة الأصلية كتبت بواسطة ahmedsiyam

الاخ توت

انا فعلا هاستنى لحد لما اعمل صيانة الـ 5000 و اقيم العربية من اول و جديد و تقريبا انا موش هاصوت بس انا هاصوت و الم الناس كلها

ألوم عليك يا أستاذ أحمد الإنصياع وراء كلام الأخوة في معرض عز العرب
ازاي يعني العربية متلينة جاهز

في كتالوج السيارة ....... إذا حضرتك راجعته
هتلاقيهم كاتبين ......... فترة التليين هي أول 1000 كم
و كاتبين السرعات التي يجب أن تسير عليها و يجب عدم تجاوزها

المهم الحمد لله ............ و حصل خير
و إن شاء الله العربية تبقى زي الفل و متخافش
و النبي لما تيجي تصوت ......... أبقى صوت براحة .........

و تحياتي الحارة لك يا باشا

المشاركة الأصلية كتبت بواسطة ahmedmokhtar

هى العربية بالظبط مكنتش عاملة غير 1.8 كيلو والراجل قالى بالظبط حرفيا متعديش 100 كيلو خالص لحد معاد صيانة الالف وقالى متشغلش التكييف نهائى لحد صيانة الالف بس لو حابب تشغله وانت مسافر عادى جدا جدا قالى عيش حياتك بيه فى طريق السفر اما متشغلوش خالص جوة البلد عشان الوقوف كل شوية
انا كل اللى بتخنق منه الفتيس ناشف اوى وفعلا زى ماتوت بيقول المكان المخصص للنقلات ضيق شوية بس هى محتاجه تعود شوية

متسمعش كلامهم
و متشغلش التكييف خالص لغاية لما تعدي ال 1000 كم الأولى......... دي ناس مش فاهمة حاجة
أسمع الكلام اللي موجود في الكتالوج
و ثانيا بالنسبة للفتيس
مكتوب في الكتالوج أنه بيكون تقيل في الأول
و لما تيجي تدي غيار و حسيت أنه تقيل
مور العربية و بعدين دوس دبرياج تاني و بعدين حاول تغير
و ده لغاية لما تعدي أول ألف كيلومتر على خير إن شاء الله

دايمان اجاباتك مقنعه و في محلها و فعلا كلامك مظبوط
مقدرش اقول ليك غير شكرا و ربنا يحفظهالك و يستر طريقك

الاخ ASD peugeot

انت اخ فاضل و محترم و فاهم و بتتقن الحوار فعلا

الاخ توت

انا ماقرصتش بس شغلت التكييف و انا فعلا قعدت قرأت المانيوال بالكامل يوم ما استلمت العربية و كلامك مظبوط و انا ماتجاوزتش السرعات المقررة اللى موجود فى الكاتالوج بس كنت مشغل التكييف بس و ربنا يستر

ادى يا سيدى توكيل عز العرب و اللى بيجى منه