الموضوع: مواقف ما لهاش حل في (الإعتكاف)

السلام عليكم
بداية لا اقصد بهذا الموضوع الكوميدي الاستهزاء من عبادة أو سنة، لكن بتحصل بجد مواقف كوميدية معايا كل ما افتكرها لازم أضحك وعايز اضحكم معايا.
انا الحمد لله بعتكف سنويا في المسجد اللي جنب بيتنا في البلد في العشر الأواخر من رمضان. وأجمل حاجة في الاعتكاف صلاة التهجد من الساعة 12 للسحور. لكن بيتخللها حاجات جميلة جدا ومضحكة جدا وعفوية، بتحصل معايا ومع أصحابي
أبدأ بأول موقف:
طبعا بين كل ركعتين بنستريح حوالي 5 دقائق، وأحيانا الشيخ بيقول كلمة إيمانية في الوقت ده، المهم جنبي راجل كبير اسمه عمي عمر وده راجل فلاح وكبير في السن وبيتكلم بعفوية وتلقائية، الشيخ كان بيوصف الجنة ونعيمها، وعمي عمر طول ما هو قاعد مش بيقول غير (يا صلاة النبي يا صلاة النبي) لحد ما الشيخ وصل لوصف الحور العين والموضوع عجب عمي عمر أوي راح قايل بصوت عالي وهو الشيخ بيتكلم عن الحور العين (اللهم اجعلنا منهم).ههههههههههههه. انا ما قدرتش أمسك نفسي روحت قايم على دورة المياة وقعدت اضحك ييجي عشر دقائق.
موقف تاني:
قولتلكم إن البلد عندنا فلاحين شوية، الشيخ في آخر ركعتين وبيدعي وطول جدا في الدعاء ومنسجم أوي، رجل من الناس اللي وراه قاله بصوت عالي ما تخلص بقى يا شيخ عزت عايزين نتسحر.هههههههههههه
موقف تالت:
الشيخ بيدعي وجه عند الحتة (فإنه لا يذل من واليت ولا يعز من عاديت) الشيخ اتلخبط وقال (فإنه لا يذل من عاديت )وبعدين رجع تاني وراح مصلحها، راجل من اللي وراه قاله: إيه يا شيخ ما انت بتقولها كل يوم اشمعنى النهاردة بتغلط فيها. هههههههههههههههههه
موقف رابع:
طبعا النوم في الاعتكاف بيكون قليل، والصلاة طويلة، لو واحد مش ماسك نفسه ممكن ينام أثناء الصلاة، الشيخ في اليوم ده صلى بأكثر من 3 أجزاء المهم علاء صاحبي واقف جنبي، تقريبا نعس راح واقع على الأرض واتقلب على ظهره، وما قامش كأنه هاينام، اللي جنبه أسامة جارنا بيحسبه مات، الشيخ لما ركع وأسامة ركع بيبص لعلاء لقيه مبحلق عينيه، راح أسامة سايب الصلاة وطلع جري برة الجامع. هههههههههههههههههه
فيه مواقف كتير جدا هاحكيلكم عنها. انتظرونا