قمت بتغيير العفشة الأمامية للريجاتا

**sab3aawy** · 11-05-2008 10:40 AM

فى الفترة اللى فاتت كانت عفشة الريجاتا على وشك الإنهيار حيث كانت علبة الديريكسيون بتعزف وصلة درامز فى كل مطب ، اما المساعد اليمين فقد اصابته السكتة القلبية واصبح قطعة حديد لا لزوم لها ، والمساعد الشمال جاله اكتئاب نتيجة لوفاه صديق عمره المساعد اليمين ، اما المقصات فقد اصابها انزلاق غضروفى ادى الى انزلاق الجلب الى خارج الكاوتشات مما اسفر عن حالة عومان مستمر للسيارة

المهم نزلت وسط البلد ، الى معرض هشام لهيطة بشارع زكى ، وهو متخصص فى قطع غيار فيات وفى نفس الوقت موزع معتمد لمونرو، وانا اتعمالت معاه اكثر من مرة قبل كدة

سألت على علبة الديريكسيون ، قال لى فيه تركى ب 310 وايطالى ب500 والمانى ب600 انا قلت خلينا فى التركى على قدنا

وجبت لها مساعدين مونرو امامى، الجوز ب 440 جنيه بضمان سنة، وكاوتشتين تراب للمساعدين الواحدة بعشرين جنيه

وجبت لها مقصين اوكاب ايطالى ،الجوز ب 130 جنيه ،وطقم كاوتش مقص ب 20 جنيه

و2 تيش(بيض) ديريكسيون اوكاب برضه ، الجوز ب 80 جنيه

وبطاحين مساعدين ، ب 70 جنيه للجوز

تم التركيب يوم الخميس عند الميكانيكى ، ومن ثم ضبط الزوايا ، والحمد لله النتيجة رائعة، العفشة اتزبطت زى الفل ، والعومان راح، وطبعا الهبد والخبط والتزييق كله راح والحمد لله

**hazem_khidr** · 11-05-2008 11:10 AM

الف مبروك يا هندسه
انت كده احييت العربيه من اول و جديد.
احب انا شغل العفشه دا اكتر من اي شغل تاني في العربيه :)

**eng_mkhalaf** · 11-05-2008 11:15 AM

مبروك يا باشا

**hamedo0** · 11-05-2008 11:28 AM

مبروك يا بشمهندس سبعاوى

**NaderNabil** · 11-05-2008 11:42 AM

ألف مبروك...

فعلا روح الفيات في عفشتها اللي قدام....بتفرق فرق شاسع في ركوب العربية...سواء نعومة أو صوت...و ساعات بحس انها بتفرق في سحب العربية (نفسيا:))

انا عملت زيك كده في ال127 من سنة...و فعلا حسيت ان العربية كانت محملة علي عامودين خرسانة مسلحة....و شيلتهم و حطيت مخدتين ريش:)