طب اعمل فيه ايه

**khaloooda** · 25-08-2011 04:27 AM

دلوني يا جماعة
حد يقولي
اعمل فيه ايه
واحد ابن تيييييييييييييييييييييييت
عمل افتتاح لمحل تحتنا
اخده بدون تراخيص نهائي
لا من الحي
ولا مياه
ولا كهرباء
كله سرقة في سرقة
وفي الاخر بيبلطج علي الشارع ومانع الناس تركن عربياتها ادام المحل بتاعه
وراصص حواجز وطوب وحجارة اد كده
ولما واحد من السكان صمم وركن عربيته ادامه
صحي تاني يوم لقاه نيمه الفردتين اللي ادام
وقاله ده قرصة ودن بس

الغريب ان كله خاف علي عربيته وبعد عنه
الواد من العيال الشبيحة
عرفنا سيرته وسرة اهله
وحاجة بصراحة متتقلش

المهم اتبعنا الطريق القانوني
منفعش
ظباط الشرطة بهوااااااااااات
مش بينزلوا في جرائم سرقة وقتل
هينزلوا في بلطجي عامل اشغال طريق

طب الواحد كان صابر علي قرف الشارع وبلطجة وهمجية الناس وبيحاول يتفاداه
بتقليل النزول بقدر الامكان

لكن ده تحت البيت
وبعدين عيال فعلا مش متربية
والعمارة مليان بنات وحريم طالعة نازلة

حد يشور عليا
انا لو علي العربية انا اركنها بعيد عن البيت خالص مش مهم
لكن ده كل يوم بيتعدي علي حتة اكبر من الشارع وسد مدخل العمارة
وحاجة تقرف

والناس معرفش ليه بقت سلبية اوي كده
محدش فارق معاه حاجة
حتي لو انضرب علي قفاه

مش عارف
لكن الهمجية توصل لحد باب البيت والبلطجة تبقي علني كده
مش هينفع سكوت
مش هينفع

**eng.octooo** · 25-08-2011 04:49 AM

اتصل على رقم الجيش لمكافحة الشغب

**Mohab.Nabil** · 25-08-2011 04:55 AM

حكاية الطوب و القرف ده فعلا حاجة تقرف

و الله اكثر من مرة اشوف واحد عربيته بتتخبط عشان الباشا صاحب المحل حاططله كام طوبة قدام محله ..

كل واحد فاهم ان حتة الشارع اللى قدام محله ديه بتاعت ابوه و مينفعش حد يتعدى عليها .. حاجة تقرف

ممكن حضرتك تكلم الجيش فعلا زى ما استاذ eng.octooo ما قال

**Mzeid** · 25-08-2011 05:05 AM

حاجة من اتنين يا تتصل بالجيش
يا اما تلم الجيران بالعافية و تنزلوا له كدة برابطة المعلم

**maka** · 25-08-2011 06:14 AM

هو مين اللى اجرله المحل ؟؟

كلمكوا مش معه كلمكوا مع اللى اجرله المحل , و مش لوحدك لازم العمارة كلها مع بعض

**M.Alaa92** · 25-08-2011 06:19 AM

انت تحمد ربنا ع محل واحد انا عندى ف الشارع
محل ايجار(واخد 2 مكان قدام المحل)
محل بتاع تلاجات (1 مكان)
- تاع ابواب ( شارع فرعى )
- ميكانيى والشارع اللى جنبى (كل واحد حاجز مكان لعربيته)
بتاع بلاى ستيشن (1 مكان)
كشك معفن مقفول العيال بتلعب قدامو بلياردو (2 مكان)
غير واحد عندو عربيتين دى تطلع التانية تخش
واحج بتاع زجاج (1 مكان)
واحد بتاع الوميتال (1 مكان)

عرفت انت ف رحمة ازاى؟؟؟

**windofchange** · 25-08-2011 01:59 PM

يارب بعد الثورة الحي يقوموا بشغله صح والعقوبات تكون رادعة

**shaddadfalcon1** · 25-08-2011 04:10 PM

طالما بينيم العجل وبيعمل الشغل ده خلاص انتو كمان اشتغلولو في الأزرق

يعني قبل الفجر ولا حاجه مفيش مانع قزاز المحل يتكسر او علبة بويه علي المحل وكلمه مش ظريفه علي الباب وكده يعني وانت وشطارتك وشغل قوي الشر الدفينه وهي هتتلعلع وهتخليه يندم انه فتح محل عندكم

**karim fathy** · 25-08-2011 04:30 PM

المشاركة الأصلية كتبت بواسطة shaddadfalcon1

طالما بينيم العجل وبيعمل الشغل ده خلاص انتو كمان اشتغلولو في الأزرق

يعني قبل الفجر ولا حاجه مفيش مانع قزاز المحل يتكسر او علبة بويه علي المحل وكلمه مش ظريفه علي الباب وكده يعني وانت وشطارتك وشغل قوي الشر الدفينه وهي هتتلعلع وهتخليه يندم انه فتح محل عندكم

+11111111111
و انزل اكسر عود كبريت فى الاقفال و حط امير مش هيتفتحو تانى ابدا :)