أخيرا وبعد انتظار شهرين


عملت ولله الحمد الصيانة النهاردة...

بعد عذاب اسبوع بحاول احجز لحد ميوكو حلهالي الحمدلله

مرورا بالطريق اللي بردوا يوكو شرحهولي وبردوا تهت فيه...من الساعه 11 تقريبا ونا تيهة عند المطار ومش عارفة اوصل جسر السويس لحد مبقت 12 وربع

آخر مزهقت كلمت واحد من هناك وفضل معايا بالتليفون لحد موصلت تقريبا

بجد مشوار علقة...طول عمري بسمع عن آخر الدنيا بس النهاردة روحتها بنفسي
روحت هناك وفين وفين لما اتلطعت علي ما استلموا مني العربية كانت واحدة ونص تقريبا... وناس كتير كانوا ملطوعين بردوا.... مع ان الكل حاجز .لا ولما المهندس بسلامته جه يستملها قالي مش هعمل غير الصيانة بس لاني انا كنت ريحة اكشف علي كذا حاجة

اللوك بتاع الكبوت بايظ من ساعة مجبتها

عداد السرعة وتانك البنزين بيعلقوا كتير معايا

في صوت خبط فلعربية من تحت لما بدوس فرامل علسلانسيه

صوت صفير بشع طالع ملطنابير اللي قدام يمين

كنت عوزة اغير زيت...وكمان عندي عواكس مكسورة

طنش كل دا وفين وفين بعد الحاح قرر يبص علي صوت الصفير اللي ملفردة اليمين قدام دا...وقالي بعد العيد اجي احجز معاد تاني لان فاضلهم ساعه ويمشوا ومش هيلحق يبص علي كل دا...

سكتت واستسلمت وقلت اطلع اترمي فلستراحة لحد ميخلصوا

لسه هطلع..فجأة لقيت عربية بتفرمل جامد ونازل واحد جري يقول اسعاف..حد يطلب الاسعاف...انا طبعا جه ف بالي ان حد ملعمال اتعور ولا حاجة

ومحدش عارف يعمل حاجة...والولد ياعيني عمال يزعق ويقولهم طب حد ييجي يوديني مستشفي طيب....ووالناس اتلمت وكان مولد...فجأة لقيت الموظف بيتطوع ويقولي..طب يادكتور شوفي في ايه

دكتور؟؟؟؟؟؟؟؟؟؟؟؟؟ لقيت الناس كلها متنحنلي تتنيحة الجماهير لابو تريكة وهو بيشوط ضربة جزاء علي جون الزمالك

رحت لقيت واحد مرمي جوا العربية رجلية الاتنين متقطعين ياعيني بمطاوي

ايوة مطاوي...مع اوماترا مش هتلحق تغممض عينيك

لقيت جروح جامدة جدا ف رجليه الاتنين وواحدة راكبة ورا بتصوت ف ودني

خليت حد جبلي قطن...وشاش ولقيت نفسي مستربعةفوق التارة فلعربية معرفش ازاي

وربطهمله عشان النزيف كان جامد لحد ميودوه مستشفي...طلع ياعيني بلطجية طلعوا عليه فلدائري وبهدلوه بالمطوة...

بعدها واحد ركب معاهم يوصلهم المستشفي ..نزلت لقيت لقطن مغرقني ومالي وشي وهدومي وايدي ياماشاء الله بينقطوا دم....

هلت البشاير يا أوماترا بجد

فضلت متنحة مش مركزة بصراحة لحد ملمهندس جالي تاني خلصوا ف ساعه تقريبا.....وبصراحة صوت الصفير اللي فلفردة دي اختفي تماما قالي كان فعلا في حديدتين قريبين من بعض جدا وعاملين صوت الصفير دا...

والعواكس عملي طلب شرا لان اليمين هو المكسور وهم معندهمش غير شمال _حجج فارغة _

وومشيت علي 3 تقريبا ونا بغني..آه ياني ياني ياني...مش هرجع هنا تاني