انطباعى بعد صيانة الـ 1000 كلم
السلام عليكم
الاخوة الافاضل زيى ماوعدتكم انى هاعمل موضوع عن تقييمى للعربية و التوكيل بعد صيانة الـ 1000 اليكم اللى حصل من الصبح لحد لما روحت
- توجهت الى التوكيل الساعة 7.05 صباحا و كنت اول عربية دخلت
- استلموا منى العربية الساعة 9 صباح و دى مواعيد عملهم الرسمية و كان مهندس الاستقبال راجل ذوق جدا و تفهم كل المشاكل اللى قولتهاله ووعد بحلها ان شاء الله
حلو الكلام لحد كده و طلعنا الاستراحة و اتعرفت على ملاك للعربية الجين -2 و غيرها من العربيات و موش هاتكلم على المساخر اللى حكوهالى علشان ده موش موضوعنا و ان كان الكل اتفق على فى مهندس واحد اسمه احمد محمدى هو اللى كان مريح العملاء و لما مشى الدنيا باظت شوية وانا طبعا ماعرفش مين المهندس ده و لا شوفته قبل كده
الاستراحة كان مستوى النظافة فيها على قده لحد لما قفشت ولد من بتوع النظافة و خليته ينظف المكان و اكيد اللى بهدل الدنيا العملاء طبعا موش العاملين بالتوكيل
فى شاشة بلازما محترمة و قناة شغالة كرهتها من كتر الوقت اللى قضيته باتفرج عليها
- دخلت للبهوات فى الصيانة خلسة كده لقيت عربيتى مرمية بره المهم قابلت مهندس جوه بدون ذكر اسمه علشان ماحدش يزعل منه و اتكلمت معاه فى مشاكل عربيتى
اولا موضوع الفتيس : هو قالى ان الفتيس بيقشر ده عادى و عيب فى التصنيع و العربيات الاوتوماتيك كلها كده رديت عليه و قولتله طيب ليه ماتكلمتوش مع الشركة الماليزية قالى ( ماحدش اشتكى قبل كده ) عرفت ان الحوار هايمشى معاه بالدق على دماغه و ده اللى حصل
ثانيا موضوع التكييف قالى موضوع تدفق الهواء ده حاجة فى التصميم و مايقدرش يلعب فيها و لما كلمته على الصوت جابلى المهندس بتاع الاستقبال و قالى هو هايتابع معاك و فعلا المهندس اقر بان صوت التكييف موش طبيعى و ماردش عليا فى موضوع سرعة فصل و تشغيل التكييف
ثالثا موضوع المالتى فنكشن : قالى احنا جربناه و شغال كويس
رابعا موضوع استهلاك البنزين : قالى العربية مافيهاش حاجة بس هانعيد على ظبط الموتور تانى
- دخلتلهم 3 مرات بعدها و قالولى احنا شغالين فيها و انا شايف العربية واقفة جوه محدش بيعمل فيها حاجة
و النتيجة : كلمونى الساعة 6.30 مساء و كل ده انا قاعد فى الاستراحة و قالولى العربية خلصت نزلت الاستقبال قالولى ادفع الفاتورة طبعا سمعت المهندس اللى قالى كده اديته كلمتين و قولتله انا لو كنت شوفت عيب فى العربية من قبل ما استلمها ماكنتش اخدتها انا عايز اجرب العربية الاول و اشوفها خلصت و لا لأ بعد جدال بسيط الراجل قالى اتفضل الورشة و جرب مع المهندس اللى استلم منك العربية و النتيجة كالتالى :
- تم تغيير الزيت و الفلتر
- الحدفة اللى كانت موجودة يمين اتعمل لها زوايا
- ظبط الموتور اتعمل
- الاصوات اللى كانت فى الشنطة اتعملت و اتعاد على تقفيل الابواب و الشنطة
- تم ظبط الانوار الامامية
فى اعتقادى و انا كنت اول عربية تدخل الورشة الكلام ده كبيره اوى يخلص على الساعة 12 ظهرا موش 6.30 مساء
- صوت التزييق اللى كان موجود مع الفرامل اتقالى انه عادى
- المالتى فنكشن ماتغريتش
-التكييف ماتعملش فيه حاجة خالص
- عصاية الفتيس زيى ماهى مقشرة
- العربية اتعكت موش اتغسلت و كانت قذرة من جوه
طبعا شافوا بقى الوش التانى و قابلت مدير الورشة راجل طبعا محترم جدا
المهندس الفاضل طلب مهندس الاستقبال اللى قابلنى فى الاول و طلب منه امر الصيانة و روحنا على العربية جربنها
- قاله عصاية الفتيس تتغير لانه بيعمل صيانة الـ 1000 موش الـ 20000
- التكييف عندى حق فيه و هايفك التابلوه و يغير الثرموستات علشان سرعة الفصل و التشغيل موش صح و علشان برضه يحاول يشوف الصوت ده جاى منين و يظبط التكييف لانه بيعمل رجة خفيفة فى العربية لما بيشتغل وقالى هاجيبله العربية فى يوم من اول النهار و المفروض تبات عنده بس نظرا لاستيائى الشديد هايعملها فى يوم واحد و استلمها اخر النهار ( طبعا انتم متخيلين مدى القرف اللى انا فيه رايح اعمل اول صيانة يتقالى هايتفك التابلوه )
- المالتى فنكشن قعد يجرب فيه بنفسه لحد لما علق معاه فعلا و قالى هايتغير بمجرد وصول قطع الغيار
ده بمنتهى الاختصار و بدون ما ازود الحبشتكنات بتاعى اللى ممكن تخليكوا تكرهوا العربية و التوكيل فى يوم واحد
انا دفعت ثمن الطبة اللى طارت اول يوم لانهم مالقولهاش حل غير انها اتسرقت منى او انا اللى ضيعتها باهمالى فى العربية و المهندس مدير الورشة حاول يشيلهالى فعلا بس مالاقاش المدير المسئول علشان خاطر يلغيها و قالى هانعوضها فى حاجة تانية و انا قولتله الموضوع موش فلوس الموضوع انها عيب تقفيل
انا مشيت من التوكيل الساعة 7
اداء العربية كما هو ممتاز بالضافة الى ان الاصوات اللى كنت باشتكى منها راحت و الاستهلاك بتاع البنزين بقى معقول الى حد كبير
طبعا على قد ما افتكرت قلتلكم و فى سلبيات كتير انا شايفها بس موش حابب انى اذكرها لانها عادى فى بلدنا المحروسة
فى انتظار ردودكم و تعليقاتكم
