الموضوع: صنى سوبر صالون ولا تيدا بيزيك

المشاركة الأصلية كتبت بواسطة ahmed.tv

* المقارنة والكلام بين التيدا والصنى لازم يكون من زواية معينة

اولا من الناحية المادية القليلة
لو حد امكانياته متزدش عن مبلغ الصنى وبيقارن بين الاتنين .. يبقا ارشحله الصنى طبعا

ثانيا من الناحية المادية المرتفعة
وبيقارن بين الاتنين .. يبقا بدون اى تفكير التيدا .. لان فرق ال12 الف جنيه بين مثلا الهاى لاين صنى والتيدا سيدان اول فئة حياخد بيه كتير جدا جدا من امكانيات وحاجات كتير فى العربية

12الاف الفرق دول حتاخد بيهم ايه :- عد معايا .. بس الناس اللى تعد تكون فاهمة الكلام اللى بقوله وتكون جربته فى عربيات اخرى عشان تحس بالفرق ...... يعنى بلاش الناس اللى بتفتى ترد

- التيدا قطع غيارها بره التوكيل بقة زى الرز وزى الصنى بالظبط .. وقريب جدا فى موضوع نازل بعد العيد عن قطع غيار التيدا خارج التوكيل اللى حتتصدموا فيه بان اسعارها تكاد زى اسعار الصنى خارج التوكيل

- تقفيل التيدا افضل بمراحل من الصنى من ناحية الخامات المستخدمة فى العربية من كل شى

- ماتور التيدا افضل واحدث واقوى من الصنى واخف كمان ومعمول من الانتيمنيوم مش زهر

- استهلاك التيدا فى البنزين افضل من الصنى ومفيش اى مشكلة فى ضفاير كهرباء ولا يحزنون

- مشاكل التيدا الميكانيكية اقل بكتير من الصنى

- عزل الاصوات جيد جدا .. ولا صوت الماتور مسموع ولا صوت خارجى ولا داخلى ولا اى شى

- صوت الماتور فى التيدا اهدا من الصنى وحتى لما بتسمعه بعد ال130 مش بيكون مزعج

- العزل اللى مرشوش تحت العربية فى التيدا اكبر واوسع .. يعنى مرشوش عزل فى اماكن كتير من تحت العربية عكس الصنى .. فى بعض الاجزاء .. مش زى التيدا .. وده شوفته بعينى وورهونى المهندس فى السبع

- الباور فى التيدا افضل بمراحل فى الصنى .. باور كهرباء وبيتقل على سرعات ..بعد ال120 .. ومفيش مشكلة فى ولا بيعمل مشاكل ولا الكلام بتاع الاشاعات ده ..

- تسارع وعزم التيدا اقوى من الصنى فى السحب

- البوجيهات اللى فى التيدا بلاتنيوم .. بتعطى عزم زيادة للعربية واستهلاك بنزين افضل .. وطبعا ده مش موجود فى الصنى

- فرق اول فئة فى التيدا عن الصنى السوبر صالون فى الكماليات .. الابانوس والجنوط والمخادع اللى قدام وورا وده كله لصالح الصنى.. ولكن الابانوس فى الصنى شكله بشهادة الناس مش قد كدا .. والجنوط امرها سهل .. ممكن تجيبها من بره .. والمخادع بردوا امرها سهل

- التيدا فيها الكاسيت دبل دن وشكله محترم وشكل الطابلوه افخم


- التيدا العربية اوسع من الصنى واريح فى القعدة فى الكنبة وبالاخص من ناحية الارجل لانك بتقعد مرتاح جدا


- التيدا كرسيها تنجيدها اعلى بمراحل من الصنى وده حتحس بيه بعد فترة وبالاخص على مسافات طويلة وانت سايق الصنى وطالع منها تعبان .. واللى حيقول لا من ملاكها يجى ويسوق التيدا عشان يتاكد


- ده غير الشنطة فيها لمبة بتنور لما بتفتح الشنطة


- ده غير اول فئة فى التيدا بقا فيها اتنين ايرباجز يعنى زيها زى الصنى السوبر صالون او الهاى لاين ..


- ده غير ان فيها فوجات فى كل فئات التيدا حاليا

- الحاجة الاخيرة لصالح الصنى فقط حاجتين .. الاولى وهى الثبات على سرعات عالية فوق ال140 .. وكمان الفوانيس الاسموك والفامية فى الهاى لاين فى الصنى اللى مثبوتين على الرخصة ..
وكل ده ممكن تتغلب عليها فى التيدا بجنوط 16 ولكن الفامية هو اللى صعب تتغلب عليه الا لو انت ظابط شرطة بقا

*هاااااااااااااااااااا نقول كمان ولا كفاية .. وكل ده بفرق حوالى 12 الف على السعر الرسمى بين التيدا اول فئة والصنى الهاى لاين .. والله يا بلاش

* وخالى بالكم كمان .. ان التيدا حيكون فى خصومات عليها الفترة الجاية على موديلات 2011 ممكن توصل الى 5000 جنيه
وفى الاخر يكون الفرق بينها وبين الهاى لاين 7000 ..

* وبخصوص الصنى والتيدا الشكل الجديد 2012 لسه على السنة الجاية فى اخرها باذن الله

تحياتى



انا مكنتش عايز اعمل مقارنة عشان مزعلش ملاك الصنى منى

انا على كدة حضرتك أدورى على جراج أركن فيه العربية بتاعتى

لا يا باشا للأسف مش انا:((
بس انا عموماً ميال للتيدا بس إنت عارف التردد بقى