ليلة من المغامرات مع فكترا 97 2000 سى سى

**lancerevolution** · 28-08-2011 05:35 AM

مساء الفل
ربنا يعودها علينا أيام مباركة

واحد جارى جاب عربية أوبل فكترا موديل 97 أوتوماتيك 2000 سى سى المكنة السودا واضح إن صاحبها كان بيعزها قوى و كان مطلع عينها شوية
المهم جارى قالى تعالى شوفها كدا و لو فيها حاجة تعالى نروح نعملها انا قلتله مافيش أى مشكلة نزلت قبل العصر كدا عديت عليه
التكيف مش شغال بس مش مشكلة قوى
العربية فابريقة برة و جوة و مافيش لعب فى المكنة أو كهربة المكنة
اللعب بقى كله جوة الصالون كاست مش أصلى السماعات متشالة و قاطع فى الصاج الى ورا و مركب سماعات لحد هنا حلو
دور العربية و خدنا لفه كدا صوت المكنة حلو
السحب حلو
بس الحرارة هوب هوب هوب بقت 90 المراوح لسة ما إشتغلتش 100 لسة بردوا 110 إشتغلت
قلتله دا يا عيب ثرموستات يا كتاوت بعد الفطار نشوف كهربائى يبص عليها
العفشة عايزة تتربط
الفرامل عايزة تترجلش

بعد الفطار كلمنى و قالى فى أى وقت تحب انا جاهز قلتله نصلى التراويح و أكلمك
راح هو كام مشوار كدا و عدا عليا فى القهوة
لقيته بيقولى العربية بتقطع على 40 قلتله إزاى يعنى قلى إركب و شوف
ركبت العربية بتقطع تقطيعة أنا عرفها كويس إنها تقطيع الطرنبة مؤشر البنزين كان على 10 لتر قلتله يبقى نروح نمون قالى مافيش مشكلة

و إحنا فى الطريق فى مطب كدا العربية مطلعتش عليه سلانسية كان لازم أزود و طول الطريق عمالة تقطع جت قبل البنزينة ب 200 متر و بركت أدور مافيش صوت مارش
البطارية سافرت و البنزين كمان فى نفس واحد
كتر خيره عسكرى المرور وقف الطريق و سابنا نركن شوية لحد ما نشوف هنعمل إيه
المهم هى طلعت أصيلة وكانت عطلانة جمب كهربائى زقيناها لحد الكهربائى و ندور بتدى مارش بس قاطعة قالى انا هنا أعجز عن عمل أى حاجة قلتله هاتلى مفك و لمبة
فكيت خرطوم البنزين لقيت فيه بنزين بس بردوا مش راضية تدور
المهم لعبت فى طتاوت الطرنبة بدور دارت

كان فى واحد معنا راح كدا لوحده جاب كهربائى معرفة قعد يفتى فتى جامد
أول حاجة غير الكتاوت
بكام يا برنس ب20 جنية
قلتله أصلى قالى أيوة ألمانى نوعه إيه ألمانى طيب
لحسن الحظ الى كان هيجيبه منه كان قافل
مشكلة المراوح ياباشا دى واخدة هوا قلتله دى كتاوت المروحة
قالى هاخدلك الهوا و نشوف قلتله ماشى المهم خد الهوا
و دور العربية و إستنى المراوح لحد لما دارت و فصلت قالى بص على الحرارة كدا لقيتها 90 قلتله دى 90 يا معلم قالى ما هى كدا و إستنى لما تدور تانى
إستنيت دارت المراوح لقيتها على 110 إتريقت عليه شوية راح ملبسها فى ثرموستات الكوعة و قالك شيله و إلغيه قلتله ماشى بس دا شل ميكانيكى قالى أه قلتله إشطة انا هروحله بكرة و هجيلك
و انا ماشى من عنده لقيت مسمار فى العجلة الى كانت مريحة و محدش كان واخد باله منها

معلش طولت عليكوا بس كان يوم غريب

**eska** · 28-08-2011 05:20 PM

ايه اللي خلى صاحبك يشتري حاجة حالتها وحشة ....مكشفش عليها كمبيوتر؟؟

**sniperfox** · 28-08-2011 05:45 PM

فى ناش مبيبقاش عندها خبره فى الكشف على العربيه وبيبقا فرحان انه اشترا عربيه حتوديه وتجيبه و ترحمه من المواصلات

**lancerevolution** · 28-08-2011 07:39 PM

العربية ما فيهاش أى حاجة خالص غير ساعة الحرارة و كتاوت طرنبة البنزين و شوية خراطيم
غير كدا كله تمام الحمد لله
فى شغل فى العفشة بس بسيط و العربية الحالة العامة جيد