تصدق أصحاب المعارض ولا لأ؟

**rady** · 11-05-2008 06:43 PM

لاحظت في خلال جولتي الأخيرة لشراء سيارة ، ان أصحاب المعارض يرغبون العميل في سيارة معينة ونفرونه من أخرى ، حتى اذا كانت هذه الأخرى موجودة لديه في العرض ، والغريب أن كامة أصحاب المعارض تختلف من فرع الى اخر في نفس المعرض ، كما ان بعضهم يحذر من أنواع مشهورة جدا وأعتقد انها أثبتت كفاءة ، فمثلا قال لي أحدهم : اوعى تجيب سيفيك لأنك هتحتاس بيها ومش هتلاقي قطع غيارها وكمان قطع الغيار غالية جدا و و و..... الى اخر هذا الكلام ، وقيل لي كلام مشابه حول الميجان / من نوعية أنها فبر وان قطع الغيار غالية ومش موجودة ... الخ الخ الخ

في الحقيقة أنا محتار ، وهذا ما يدعوني للتساؤل ،هل من الممكن ان يكون المعرض يعمل على الترويج لسيارة معينة لأنه مثلا مرتبط بصاجب توكيل هذه السيارة ، أم ما هو السبب تحديدا؟ ... خاصة وأن هذا حدث معي في اثنين من أكبر شركات السيارات في مصر والتي تتميز بتعدد الفروع ...

**معاذ الشرباصى** · 11-05-2008 06:47 PM

المشاركة الأصلية كتبت بواسطة rady

لاحظت في خلال جولتي الأخيرة لشراء سيارة ، ان أصحاب المعارض يرغبون العميل في سيارة معينة ونفرونه من أخرى ، حتى اذا كانت هذه الأخرى موجودة لديه في العرض ، والغريب أن كامة أصحاب المعارض تختلف من فرع الى اخر في نفس المعرض ، كما ان بعضهم يحذر من أنواع مشهورة جدا وأعتقد انها أثبتت كفاءة ، فمثلا قال لي أحدهم : اوعى تجيب سيفيك لأنك هتحتاس بيها ومش هتلاقي قطع غيارها وكمان قطع الغيار غالية جدا و و و..... الى اخر هذا الكلام ، وقيل لي كلام مشابه حول الميجان / من نوعية أنها فبر وان قطع الغيار غالية ومش موجودة ... الخ الخ الخ

في الحقيقة أنا محتار ، وهذا ما يدعوني للتساؤل ،هل من الممكن ان يكون المعرض يعمل على الترويج لسيارة معينة لأنه مثلا مرتبط بصاجب توكيل هذه السيارة ، أم ما هو السبب تحديدا؟ ... خاصة وأن هذا حدث معي في اثنين من أكبر شركات السيارات في مصر والتي تتميز بتعدد الفروع ...

حضرتك العميل هو اللى بيفرق

يعنى لو هو جاله عميل عاوز عربية معينة, هيفضل يقول فيها شعر للصبح, لأنه عارف ان اللى قدامه عارف هو عاوز ايه

اما لو العميل مهزوز, او مش مقرر لسه, ساعتها بيوجهه للحاجات اللى مكسبها اكتر بالنسبة له, يعنى الحاجات اللى هامش الربح يبقى اعلى فيها, او مربط مع وكيلها او اى حاجة من الحاجات دى (يعنى من الاخر مصلحته هو مش العميل)

**أبو عبدالله** · 11-05-2008 06:55 PM

رؤية كل شخص من خلال تجاربه وثقافته بتختلف طبعا من شخص لأخر

التاجر دائما هدفه الحاجه اللي متخسر وتكون خسائرها اقل ما يمكن
ده تفكير اي تاجر

اما الحاجات التانيه زي الركوبه والأوبشن والحاجات دي
هو بينظرلها انها حاجات هتدفع فيها فلوس في الشراء وفي الصيانه والعمليه غير مربحه

فنظرة صاحب المعرض للسيارة نظرة سوق بيع وشراء

اما نظرة المشتري للسيارة بتختلف حسب احتياجاته

في واحد متفرقشي معاه كماليات ولكن يركب اسم
وفيه العكس
في واحد متفرقشي معاه اعادة البيع المهم يركب اللي هو عاوزه
ممكن واحد يكونشايف ان العربيه الواسعه جدا اين كان سعرها وسوقها مش هتفرق معاه

يعني من الاخر انت اللي هتفرق معاك
انت اللي هتدفع
انت اللي هتركب
انت اللي هتسوق
انت اللي هتعمل صيانه كل شويه
انت اللي هتبيعها

يعني الموضوع عليك انت في الاخر

**dr_3eshoo** · 11-05-2008 07:55 PM

ده اسمه اختلاف الازواق و القرار يرجع للعميل

**Ghamrawy** · 11-05-2008 08:14 PM

فعلا اصحاب المعارض لو حسوا ان الزبون مهزوز زى ما قال اخونا معاذ بيبتدوا يلعبوا فى دماغه على اساس العربية اللى فيها مكسب يعنى مثلا الشهلا اللى فات كانت أخت صاحبى بتدولر على عربية فى الحدود من 85000 ل 100000 و رحنا عند طارق اسماعيل فى كارفور اسكندرية و قعدنا مع المندوب الموجود فى المعرض و هى شافت الجراند بونتو و السويفت الجديدة و اللانسر الشكل القديم المهم وسط القعدة رحت سالوا على البروتون الجديد لقيته بيقولى دى زى الزفت دى الكهربه بتاعتها بتعمل قفلة كل شوية و مش عارف ايه بيتحرق دا الانذار بيشتغل لوحده و العربية واقفة جوا المعرض و مافيش حد حواليها معقول برضه حد ينزل عربية فيها كل الامكانيات دى و يبقى سعرها كدا ؟ علشان كدا كل شوية الكهربا بتاعتها تبوظ ،طيب يا عم البونتو ايه اخبارها ؟؟؟ و الله هو الموتور مش قوى اوى يعنى العربية تقيلة على الموتور بتاعها دا 77 حصان بس و 1400 سى سى على كل الجسم دا و بعدين مركز الصيانة بتاعها تعبان ،طيب السويفت ؟؟ اه دى عربية 100 % موتور مش عارف ايه و كاسيت ام بى ثرى و ستيب ترونيك و موتور قوى على جسم صغير و واسعة من جوا و فرش جلد و يابانى 100 % و هكذا و فى الاخر رسيت على اللانسر الشكل القديم .
الخلاصة ان صاحب المعرض بيبص لهامش ربحه فى العربية و بس

**Ahmed Hassan** · 11-05-2008 08:15 PM

سيادتك ملكش دعوه بكلام البياع اللي في المعرض.. و لا حتى اللي في التوكيل. انت تشوف متطلباتك ايه في العربيه.. و بعدين تبتدي تعمل بحث على النت.. و تحصر اختياراتك في عربيتين او تلاته. بعد كده يقتصر دور المعرض على الفرجه فقط.... م تسألش حد هناك لأن كلامهم كله غلط و هدفه مصلحتهم الشخصيه و ليس مصلحتك.. ده غير جهلهم الفعلي بمواصفات و قدرات السياره.

**rady** · 11-05-2008 08:21 PM

ألف شكر ليكم كلكم يا جماعة ... ده برده كان رأيي انهم بيدوروا على مصلحتهم خصوصا زي ما انتكم قلتم أنا فعلا خيرتهم بين 4 أو 5 حاجت (وكنت مهزوز فعلا !!!!) لكن عامة الواحد يحصر خياراته ان شاء الله بناء على تقييم أعضاء المنتدى للسيارات المختلفة ...

**tutankhamoun** · 11-05-2008 08:53 PM

السلام عليكم و رحمة الله و بركاته

بتوع المعارض دول نصابين و آفاقين و همهم الوحيد البيع فقط لا غير و لا يُفكرون إلا في مصلحتهم فقط
أما العميل فهو بالنسبة لهم ........... شكارة فلوس ليس أكثر
و بعد ما يتشري .......... محدش بيعرفه و لا عايز يعرفه من المعرض

و ممكن تلاقي صاحب معرض يقولك شعر في عربية علشان هو كسبان فيها أكتر ........... و كمان الشعر بالكدب و التأليف

طيب أنا مرة أتصلت بمعرض و بسأله على عربية معينة .......... و لقيته بيقولي دي عربية وحشة جدا وواطية على الأرض ..... و موتورها ضعيف
و الذي منه
و لقيته بيعرض عليا عربية تانية خالص و مش في دماغي أصلا
على طول رحت قافل السكة و قلتله شكر ... هابقى أتصل بيك بعدين

...... و تحيا المهلبية .......
و أنا في انجلترا لما كنت أروح معرض عربيات و أسأل على عربية
الراجل أول حاجة يسألني .... أنت عايز أيه ؟؟؟

أقولك أنا عايز كذا
يبدأ يشرح العربية و بكل أحترافية و ميرشحش حاجة غير اللي سألتها غير لو سألته على حاجة تانية غيرها
و هكذا
.........................
و هو ده الفرق بين الناس اللي عندها ضمير و ما بتكلش مهلبية
و بين المهلبية و البالوظة

و شكرا

**Chicco** · 11-05-2008 09:21 PM

للاسف الشديد المعارض و التوكيلات مليانة ناس لا إما جهلة لا إما مغرضين و طبعا الطبع المصري الأصيل بتاع الفهلوة و ما فيش حاجة اسمها ما أعرفش لازم يفتي و خلاص
من الأخر عايز تسأل على عربية إسأل كذا حد ما لوش مصلحة