أعتقد ان البيرسونا عملت بأصلها معايا و الحمد لله

**hadota_masreya** · 30-08-2011 10:27 AM

عملا بمبدأ مايحسد المال الا اصحابه فهبدأ بكلمة بسم الله ماشاء الله - الله أكبر العربية عملت بأصلها معايا

اول امبارح كنت راجع من اسكندرية و يادوبك كنت معدى كارتة اسكندرية الصحراوى و فى اتجاهى على القاهرة و المغرب أذن - المهم فطرت على زجاجة عصير و اتكلت على الله و كانت معايا المدام.

المهم انا كنت ماشى على سرعة مابين 120 - 150 و بتحرك بينهم و بعدين عديت الرست و بعد الرست بحوالى 5 كيلو و قبل مدينة السادات اتفاجأت ان فى عربية نصف نقل واقفه على الشمال و ايفها من بعيد و عادى يعنى واقفه و انا مش مديها اهتمام و كانت جنب الحاجز الخرصانى اللى على الشمال و انا ماشى فى تانى حاره من على الشمال.

المهم طبعا الدنيا كانت خلاص ضلمت و كنت على سرعة 140 تقريبا و يادوبك قربت من العربية النص نقل و اتفاجأت انه حاطط حجاره فى نصف الحارة اللى انا ماشى فيها و داخله على نص العربية حاولت اتفاداها و لكن للاسف لان الدنيا كانت ضلمة فأنا مخدتش بالى منها غير لما كنت قربت على الحجارة زيادة عن اللزوم المهم كسرت على قد ماقدر و راح الكاوتش القدمانى شمال خبط فى الحجارة و كنت وقتها تقريبا على الـ 130 راح الكاوتش مفرقع طبعا من الخضة رجلى كانت هاتدوس على الفرامل بشكل قوى لكن خوفى انهم يكونوا قطاع طريق مرضيتش ادول على بدال الفرامل و رحت مكمل على سرعتها.

طبعا كان فى تفاصيل كتير بقى من قلق و كده لكن مش ده اللى بتكلم عنه دلوقت لكن انا بتكلم عن العربية ان الكاوتش اول مافرقع انا طبعا فضلت ماشى على الجانط بتاع العربية و الغريب ان ماحسيتش ان العربية عامت منى (و الحمد لله) طبعا انا مسكت الدريكسيون بايدى الاتنين لكن الحمد لله ماحسيتش انى هاتقلب ولا حسيت انى بعوم و فضلت ماشى على القصور الذاتى لحد ماجابت ال60 و بعدين وقفت و تقريبا كنت على بعد 800 متر من العربية النصف نقل.

الفضل و الشكر أولا و أخير لله رب العالمين ثم ينسب لجزء من هذا الشكر للعربية.
و طبعا أنا بدعى لناس كتير وقفوا معايا الصراحة فى المشكله دى و الحمد لله رب العالمين و قدر الله و ما شاء فعل

**alaa7sh** · 30-08-2011 11:34 AM

قضاء أخف بكتيييير من قضاء تاني
الحمد لله . أكيد كانوا قطاع طرق. وربنا يخليلنا بروتون :)

**tutankhamoun** · 30-08-2011 12:22 PM

حمد لله على السلامة يا باشا ....
البروتون في الثبات ما شاء الله .

============
بس مش كتير 140 ؟ ........... ربنا يستر طريقك
============

بمناسبة الناس اللي بتعطل و تركن مكان ما هي واقفة لا يُقال عليهم غير أنهم شوية $$$$%%%%%%%&&&&&

و حسبي الله و نعم الوكيل .

**rajina** · 30-08-2011 02:11 PM

الف حمد الله على السلامة ... معلش الى حصل معاك ممكن يكون شال حاجة تانية ... قدر الله و ما شاء فعل

**hadota_masreya** · 30-08-2011 06:03 PM

الحمد لله.
أنا الحمد لله راضى و قانع بجد جدا باللى حصل و شايف ان ربنا من عليا فيه بنعم كتير قوى

بس اللى محزنى فعلا الفوضى الرهيبة اللى احنا بقينا فيها - ربنا يستر بجد على البلد دى

و الحمد لله أولا و أخيرا على كل حال

و ألف شكر لكل الاعضاء على الردود.
كل عام و أنتم بخير و بصحة يا رب

**egyptiandiver** · 30-08-2011 06:36 PM

حمد لله على السلامة

**Al-Farooq** · 30-08-2011 08:43 PM

الحمدلله على سلامتك يا باشا ، هدي السرعة الشوية ، هو صحيح 120 هتحس اكنك ماشي على 20 ولو ماشي على 90 هتحس انك ماشي سلانسية ،
بس دة مش مبرر انك تزود السرعة مادام مش حاسس ان العربية بتجري ،
الحمدلله انها جات فى حاجات بسيطة ، وفى الظروف اللى احنا فيها دي لازم الواحد ياخد إحتياطاته اكثر .