جدتي الله يرحمها كنت باحبها جدا

كنت باقعد معاها كتير اوي وباسمع منها كلام جميل بيرن في وداني لحد دلوقتي
الناس الكبيرة دي كان عندهم معتقدات ظريفة جدا
كنت باسمعها واضحك عليها
بس بطريقة لا شعورية بالاقيني باعمل زي ما بتقول ولو حاجة تقلقل باخاف اعمل عكسه

مثلا
لما كان ييجيلنا ضيف تقيل .. كانت تقول لي قومي حطي الابرة في المقشة عشان يقوم يمشي
اضحك واقوم فعلا احط الابرة في المقشة .. الاقي الضيف قام مشي

لما كانت تقطف الملوخية كانت تحب تقعد عالارض لو جيت اعدي .. تقول لي ما تخطيش من فوق الملوخية احسن بتجيب النحس.. ومن ساعتها عمري ما عديت من فوق الملوخية

لما بابا كان بييجي مسافر عمرة مثلا .. وطبعا كان بيبقى في ناس جاية تسلم عليه ( طبعا الكلام دة كان زمان دلوقتي نادرا ماحد يسافر ولا يرجع من السفر وحد يروح يسلم عليه ) .. كنت اجي اكنس الشقة بعد ما يمشي .. تقول لي لا ما تكنسيش انهاردة عشان يرجع بالسلامة .. وبردو مش باكنس خالص لو حد من البيت مسافر

عاوزين نفتكر مع بعض باقي العادات والمعتقدات القديمة .. اللي طبعا اغلبنا رافضها .. بس من جوانا بنفذها بس من غير ما نشعر