سيات ايبيزا 1999 كامله ... برجاء المساعده!!!

السلام عليكم ورحمه الله وبركاته...

معروض عليا سيات ايبيزا مو 1999 - 1000 سي سي كااامله (باور، تكييف شغال ، سنتر، انزار ومفتاح بريموت اصلي بس بايظ بس الانزار شغال ، اربعه زجاج كهرباء، مرايات كهرباء، كاسيت الفابريكه، جنوط ، دواخل فابريكه، رشه بره نظافه)

مطلوب في السياره 36000 نهائي .... السياره من الخارج حالتها نظيفه و العداد عامل 145000كم ، هيا بس من جوا تحس انها متبهدله شووويه (يعني مثلاً الجراب الجلد بتاع عصايه الفتيس جربان ومقشر وكذلك الطاره جربانه ومقشره .... فتحات التكييف فيها ريش مكسوره/ والبلاستيك الاسود اللي في التابلوه الوسطاني مشروخ فا مخليه مش ثابت كله "الجزء الاوسط فقط") بس الفرش والابواب كويسيين.

فيها حاجه لاحظتها لما جربتها ان الموتور بيوطي اول ما اشغل التكييف بس السحب مقبول مش مخنوق، هل وطي الموتور دا عادي ولا عيب؟

حاجه كمان ... في صوت جاي من الموتور زي مايكون في بليه خشنه، صوت حديد في حديد كدا ... هوا الصوت جاي من ناحيه السيور اللي هيا في جنب الموتور علي الشمال ... والغريب ان الصوت راح اول ما شغلت التكييف ... وبيرجع لما بطفيه ... عندكوا فكره دا ايه ؟؟؟

بالنسبه للعفشه حسيت لما جربتها انها كويسه جداً ... مفيش اصواات غريبه او تخبيط او او ... والمساعدين كويسين. جدا في المطبات ... بالبلدي شايلين العربيه تمام في المطبات

انا اسف اني طولت عليكوا في العيد :grin21: انا عايز رأيكوا في السعر مع كل اللي انا ذكرته هل دا مناسب ولا غالي .... انا حسيت انه كتير بس انا بصراحه مش خبره في الايبيزا فياريت اراكوا علشان لو كويسه ممكن اخلص فيها بعد العيد ان شاء الله ...

شكراً للمساعده وكل عام وانتم بخير

حاجه كمان ... ابص علي ايه تاني فيها (الحاجات المشهورة في الايبيزا اللي لازم الواحد يتأكد منها) .... وشكرا جدا ليكوا

الف الف مبرووووووووووووكك

انزل دلوقتي حالا خلص فيها

اولا الكماليات دي نادرة في العربية دي (انا كمان عربيتي نفس الكماليات دي بالظبط) والعربية السيات الكاملة دي نادرة جدا

ثانيا السعر دة كويس جدا بس محمل سنة يعني او تضغط عليه في 500 ولا 1000 كمان تبقي تمام

ثالثا كل العربيات الفتيس بتاعها مقشر لأنه مش جلد طبيعي وكمان فرامل اليد

رابعا الموتور وطي مع التكييف دة ظبط خفيف اوي هتعمله علي الكمبيوتر او هتنظف بوابه

خامسا لما تغير السيور والسيرفيس بتاعك الأصوات هتختفي الا لو خشونة في طرمبة المياة

توكل علي الله

العربيات دي حلوة اوي اوي اوي

كل الأبيزا والبولو الطابلوه مشرخ من الكونسول الوسطاني ودة امر عادي جدا

والله المستعان
،
،

الف شكر علي رد حضرتك،
انا في ناس قالولي ان الموتور ال 1000 سي سي دا ضعيف اوي وبيبوظ بسرعه ... هل اللي مع حضرتك دي 1000 برضه؟ وايه رأيك في الموتور دا ؟؟

عيد سعيد عليك وعلي الاسره ان شاء الله :)

ماشاء الله فعلا نادرة زي ما البشمهندس سيد قال...بالنسبة للموتور اكشف عليه بالبنزينة واللي اعرف ان فيها كشف كبس موتور ب25 ج ف شيل شارع دمشق,مصر الجديدة ولازم ميقلش عن 75 % لكن لا قدر الله لو قل ممكن تسقط اخوه او تعلي السي سي بموتور اعلي ال1000 سي سي موتور فاضي من غير طرمبة باور ولا دينامو ولا رشاشات بنزين ب1500 او اعلي تقريبا برشاشات ب1700 او اعلي وعلي فكرة انا عربيتي زي دي بالظبط ماعدا الباور(دي نادرة فمصر) مكنش فيها باور وكنت جايبها المكنة كانت مفوته وسقطت غيرها,الموتور ال1000 50 حصان علي ماافتكر ومش ضعيف عالعربية هو مقبول وتوفير في استهلاك بنزين رهيب انت مش هتحطلها 80 طبعا بس اهتم بالسرفيس بتاعه من بوجيهات وفلتر هواء وزيت وزيت موتور كويس من الزيوت نصف التخليقية والتخليقية الكاملة... ركعتين استخارة بعدين توكل علي الله وشوف هتعمل ايه....ايهاب

شكرا يا استاذ ايهاب علي ردك الجميل ... كل سنه وانت طيب :)

اقتباس:

---

المشاركة الأصلية كتبت بواسطة modygemy86

الف شكر علي رد حضرتك،
انا في ناس قالولي ان الموتور ال 1000 سي سي دا ضعيف اوي وبيبوظ بسرعه ... هل اللي مع حضرتك دي 1000 برضه؟ وايه رأيك في الموتور دا ؟؟

عيد سعيد عليك وعلي الاسره ان شاء الله :)

---

انا عربيتي فيها الموتور ال1000 سي سي 55 حصان
الماتور ال1300 كاربراتير 55 حصان

1400 8 صباب 60 حصان
1400 16 صباب 75 حصان

الفروقات مش كتير قوي وان كان اخر موتور ال75 حصان بسمع عنه انه رهيب وادائه رائع وموفر ايضا في البنزين

لكن ال1000 عندي متحمل باور وتكييف بشرط عدم القرص عليه طول ماانت مشغل التكييف والا هتجيب اجله بسرعة ولو دماغك شد وجري وقرص وتفحيت يبقي عليك وعلي ال1400 هتقولي طب مانا اجيبها ال1400 وخلاص هقولك لا العربية لما بتنزل بتكييف بلادها بتبقي حاجة تانية خالص غير الي متركبلها
لذلك هات العربية دي انشاء الله وهات اخر الموتور بتاعها وبعد كدة سقط الي انت عايزه انت ودماغك
معاك 1300
1400
1600
1800
2000

وعلي فكرة كل موتور من دوول نزل منه كذا اصدار زي المثال كدة بتاع ال1400

ربنا يوفقك

والله المستعان
،
،

طبعا الرجاله فوق قالولك كل حاجه
ولكن عايز أقلك ان الموتور ال 1000 سيسي ده و 50 حصان فضل شغال معايا في الابيزا اللي بعتها من فترة حتي 300 الف كيلومتر دون ادني مشكلة و سحبه و تسارعه ممتاز و استهلاكه للبنزين اكثر من رائع

المهم انك تكشف كويس علي العربية و تتأكد انها سليمة و فبريكة لكل اللي فيها و بعدين تستخير ربك و هو الموفق ان شاء الله
وبعدين حاول تنزل السعر شوية لأنه عالي شويتين

اقتباس:

---

المشاركة الأصلية كتبت بواسطة ehab_mansour

طبعا الرجاله فوق قالولك كل حاجه
ولكن عايز أقلك ان الموتور ال 1000 سيسي ده و 50 حصان فضل شغال معايا في الابيزا اللي بعتها من فترة حتي 300 الف كيلومتر دون ادني مشكلة و سحبه و تسارعه ممتاز و استهلاكه للبنزين اكثر من رائع

المهم انك تكشف كويس علي العربية و تتأكد انها سليمة و فبريكة لكل اللي فيها و بعدين تستخير ربك و هو الموفق ان شاء الله
وبعدين حاول تنزل السعر شوية لأنه عالي شويتين

---

اسمع كلام الراجل دة بيجيب من الأخر
بس انا ياباشمهندس حاسس العربية تحت رجلي 55 حصان مش 50 حصان ابدا ههههههههه

انا قولتله فعلا ان السعر محمل حبتين بس مش كتير في مقابل انها كاملة وحالتها نظيفة

تأكد ان التكييف بتاعها مش متركب وكمان تستلمه شغال

ربنا يوفقك

والله المستعان
،
،

بجد انتوا ناس زي الفل ... جزاكم الله كل خير علي اهتمامكم ومساعدتكم
انا بصراحه لما جربت العربيه سحبها كان كويس جدا حتي مع التكييف ودا اللي استغربتله لاني كنت متوقع اني حسوق توكتوك وانا مشغل التكييف ولكن بجد عربيه جديرة بالاحترام ...

انا ان شاء الله حاخدها واكشف عليها بس لو ياريت تقولولي اكشف عليها فين عند حد يكون متخصص في مدينه نصر للقرب من مكان عملي وعمل صاحب السياره.

رأيكوا لو بعد الكشف طلعت كويسه وحالتها تمام ومفيهاش مشاكل يبقي اخدها بالسعر دا ومطولش مع صاحبها؟

اقتباس:

---

المشاركة الأصلية كتبت بواسطة modygemy86

بجد انتوا ناس زي الفل ... جزاكم الله كل خير علي اهتمامكم ومساعدتكم
انا بصراحه لما جربت العربيه سحبها كان كويس جدا حتي مع التكييف ودا اللي استغربتله لاني كنت متوقع اني حسوق توكتوك وانا مشغل التكييف ولكن بجد عربيه جديرة بالاحترام ...

انا ان شاء الله حاخدها واكشف عليها بس لو ياريت تقولولي اكشف عليها فين عند حد يكون متخصص في مدينه نصر للقرب من مكان عملي وعمل صاحب السياره.

رأيكوا لو بعد الكشف طلعت كويسه وحالتها تمام ومفيهاش مشاكل يبقي اخدها بالسعر دا ومطولش مع صاحبها؟

---

حاول قدر المستطاع تنزل فيها لأنها قيمتها 35 الف او اقل قليلا
و ربنا يوفقك لما فيه الخير

اقتباس:

---

المشاركة الأصلية كتبت بواسطة modygemy86

بجد انتوا ناس زي الفل ... جزاكم الله كل خير علي اهتمامكم ومساعدتكم
انا بصراحه لما جربت العربيه سحبها كان كويس جدا حتي مع التكييف ودا اللي استغربتله لاني كنت متوقع اني حسوق توكتوك وانا مشغل التكييف ولكن بجد عربيه جديرة بالاحترام ...

انا ان شاء الله حاخدها واكشف عليها بس لو ياريت تقولولي اكشف عليها فين عند حد يكون متخصص في مدينه نصر للقرب من مكان عملي وعمل صاحب السياره.

رأيكوا لو بعد الكشف طلعت كويسه وحالتها تمام ومفيهاش مشاكل يبقي اخدها بالسعر دا ومطولش مع صاحبها؟

---

ياباشا كتر الف خيرك انت الي راجل ذوق

طب دة مؤشر كويس، وهي فعلا مش بتتأثر كتير بتشغيل التكييف

الصراحة مش عارف تكشف عليها عند مين في مدينة نصر

بس هي سعرها محمل شوية يعني حاول تنزل معاه 1000 جنيه بحد أقصي انا شاري عربيتي ب 34500 وكمان كنت مقسطله حوالي 10,000 يعني لو كنت دفعت فوري كنت خدتها ب33500 او 34000 بالكتير اوي

ربنا يوفقك في الشراء

والله المستعان
،
،

أولا: كل عام وأنتم كلكم طيبيين
ثانيا: أستاذ modygemy86 لو لسه مخلصتش فيها ادينى بس موبايل صاحبها و أنا اشيل ... هههههههه بهزر طبعا. ألف مبروك عليك يا باشا
و أنا حموت على عربيه زى دى فلو حد قدامو واحده حالتها حلوه انا ممكن اخلص و لو على 37000
دلونى عليها و ليكو البسكويت و الحلاوه :d

اقتباس:

---

المشاركة الأصلية كتبت بواسطة mo7madbakr

أولا: كل عام وأنتم كلكم طيبيين
ثانيا: أستاذ modygemy86 لو لسه مخلصتش فيها ادينى بس موبايل صاحبها و أنا اشيل ... هههههههه بهزر طبعا. ألف مبروك عليك يا باشا
و أنا حموت على عربيه زى دى فلو حد قدامو واحده حالتها حلوه انا ممكن اخلص و لو على 37000
دلونى عليها و ليكو البسكويت و الحلاوه :d

---

للأسف العربية دي نادرة
ومحدش بيعرف ان عربيته نادرة غير الي فاهم فقط فيها
فدي مسألة حظ وبختك يا ابو بخيت
لكن انت لو بتتكلم صح العربية دي تسوي 40,000 بس للأسف بتتظلم مع العربيات الباقية الفاضية او الباور بس

والله المستعان
،
،