الموضوع: مصر اسكندرية الصحراوي والبلطجية وانعدام الامن !

انا راجعة دلوقتي من طريق مصراسكندرية...زحمة جدا..ولا كأنه صلاح سالم ف يوم رايق شوية

مصر كلها بصفة عامة
فى حالة انفلات أمنى
ديه محدش ينكرها
قبل كده كان فيه سرقة ونهب وتثبيت محدش ينكرها
ولكن بعد الثورة الموضوع زاد عن حده وانفجر كمان
مش لازم تشوف بعنيك أو تتعرض للموقف ده علشان تصدق !!
ربنا لا يكتبها على حد مننا
شوفنا اعضاء كتير محترمين اتسرقت عربياتهم
واللى اتثبت واتاخد عربيه الشغل منه وشوفنا الاخبار فى كل مكان
انا عن نفسى بمشى قلقان ومتوجس خيفه من اللى جنبى
كلنا مهددين
الماشى بعربيته أو ماشى على رجله أو حتى قاعد فى شقته
ومفيش قاعده ثابته للحراميه بيمشوا عليها
ومفيش قاعده ثابته لأى طريق نقدر نقول عليه آمن أو معرض لهجوم البلطجيه

الطريق بيمشى عليه آلاف السيارات يوميا
الحراميه وقطاع الطرق مش معقولة هيلموا العربيات كلها
بيصطادوا عربيه ولا اتنين من على الطريق وبيختفوا تانى
وبيظهروا على طريق تانى فى وقت تانى وهكذا
اللى حظه زفت هوه اللى بيطلعوله ويثبتوه
وربنا يسترها معانا ويرحمنا برحمته

شاهد عيان ( العبد لله )

انا حضرت الموضوع ده تاني يوم العيد
قررت اني اقضي العيد في العجمي ( ما روحتهاش من سنة 94 و الذكريات بقى بس ماحدش يفتن ) مع ان عملت موضوع هنا و الاعضاء نصحوني اني ما اروحش بس ذكرياتي كانت اقوى !!!
نزلت بعد صلاة الفجر على الساعة 5.30 و كنت عند البوابات الساعة 6 تقريباً و لقيت زحمة مهولة و لسة هبتدي اسأل فيه ايه لقيت عربية جيب شيروكي راجعة من أسكندرية و وقفت و نزل منها واحدة ست لابسة جلابية فلاحة رجالي مقطعة ( واضح انها مش بتاعتها ) و عمالة تصوت و تقول ضربوا عليان نار و خدوا ذهبي و فلوسي و الناس كلها اتلمت عليها
بعديها كذا عربية راجعة وقفت و نصحتنا بالرجوع او اخذ الطريق الزراعي لان البدو قاطعين الطريق و بيضربوا نار و بيسرقوا الذهب و الفلوس و كدة فضلت واقف شوية انا و ناس تانية نستطلع الامر و بعدين خدت القرار اني ارجع و خصوصاً ان 90% من الي واقفين رجعوا فطبعاً لازم الف البوابات لاني كنت دخلت في الحارة
فسألت الراجل الي بيقطع التذاكر الكلام ده صح و لا اشاعة قالي ماعنديش فكرة بس نصيحة بلاش تسافر و خصوصاً ان عربيتك كلها حريم ( أمي و أختي و خالتي و مراتي و أسر أبني و فريدة بنت أختي ) كل دول في الأفيو هههههههه ده غير شنطهم
المهم الراجل ما قطعليش تذكرة و عديت و جاتلي فكرة مجنونة قولت ياض قوي قلبك و روح ( الذكريات ضغطت عليا ) و لو في حاجة في الطريق هتبان أكيد زحمة مثلاً عربيات ماشية عكس اي فوضى يعني
المهم خدت الطريق و في ميكروباص اتشجع و عربية تانية و جم ورايا
وصلنا عند سجن وادي النطرون و الطريق مافيش مشاكل خالص غير انه فاضي إلى حد ما

و إذا بالمفاجئة ...................
عند ماستر بالظبط العربيات كلها راجعة عكس و زحمة غير عادية و دخان كثيف و حوالي 8 عربيات مدرعة للقوات المسلحة و عدد 2 عربية أمن مركزي
و واحد واقف ( ابو العريف الي بيطلع في اي مصيبة ) بيزعقلي اقفل الزجاج بسرعة بقوله في ايه ؟؟ رد بيقولي هما قوللك ايه عند البوابات قولته في ضرب نار و كدة قالي فعلاً ( أستغربت بصراحة و عرفته انه بيزيط لانه واقف في الشارع على رجله )
المهم الطريق واقف و ابتديت استفسر عرفت ان في عربية داست طفل و هما قاطعين الطريق علشان عايزين كوبري مشاه ( و انا راجع انهاردة لقيتهم عملين مطبات الصغيرة الي كذا واحد ورا بعض زي بتاعة محور صفط )
طيب هما معاهم سلاح ؟؟
الصدمة ما معاعمش سلاح هما بس العربيات الي بتدخل فيهم عافية بيحدفوها بالطوب
طيب الست الي كانت لابسة جلابية مقطعة دي أيه !!!!!!!! مش عارف حتى الان

المهم انهم اصلاً ما يكملوش 20 نفر و مولعين كاوتش في الارض و بصراحة كانوا عندهم اخلاق العربية الي فيها مسنين او أطفال كانوا بيعدوها
و كل شوية يفتحوا يعدوا حوالي 15 او 20 عربية و يقفلوا تاني
لحد ما ناس راحوا اتفاوضوا معاهم و فتحوا الطريق تماما و كمان عملوا لجان شعبية منهم شباب و رجال تعدي العربيات علشان ما يحصلش حوادث او شجار على اولوية المرور لان الي كان راكن في ماستر و على جانب الطريق كله هجم عايز يعدي الأول فاكر ان الطريق هيتقفل تاني
الجيش ما لوش دور مطلقاً غير العرض الي كان عاملوا بالمدرعات
الامن المركزي مأنتخين انتخة التنين

دول صورتين من موقع الحدث بموبايلي





ده الي حصل و الله على ما اقوله شهيد