الموضوع: عرض من أحدى توكيلات السيارات على صديق لى .... يقبل و لا يرفض "رجاء النصيحة "

السلام عليكم ورحمة الله وبركاته

عايز آخد رأيكم فى عرض من أحدى توكيلات السيارات من فترة

صديقى يمتلك سيارة موديل 2011 و تم عرض الموضوع عليه كالآتى من التوكيل :

* يلتزم صديقى بالذهاب الى التوكيل يوميا لفحص السيارة و الشكوى عن أى شىء مش مضبوط فى السيارة

* يحافظ على مواعيد تغيير الزيوت و التيل و الكاوتش و السيور

* يحافظ على تعليمات المصنع الخاصة بعدم وضع سولار بدل البنزين او عدم وضع زيت أكل بدل زيت الموتور او الفتيس


* و يلتزم المصنع بتصليح اى عطل و تغيير اى قطع غيار ببلاش و مدى الحياه ( مش 100 الف كم فقط )


* و اشترط التوكيل شرط واحد و هو الحضور الى التوكيل 5 مرات يوميا لضمان المتابعة اول بأول و التاكد ان صاحبى استخدامه كويس للعربية .....
_

_

_

طبعا فى الاول صاحبى فرح جدا و خصوصا ان التوكيل فى اول الشارع اللى هو ساكن فيه ...فقال دا شىء فى منتهى البساطة و هحافظ على عربيتى جديدة مدى الحياة دول ييجى 10 دقائق فى المرة ... كأنى واقف فى اشارة مثلا !!


اول كام يوم كان فيه هجوم رهيب على التوكيل لدرجة ان صاحبى كان بالعافية بيلحق مكان فى التوكيل قبل ما يقفل و استمر الموضوع كام يوم على الحال دا


بعد كام يوم لاحظ صديقى ان التوكيل بدأ يكون فاضى نسبيا عن ذى قبل ففرح شوية علشان كان بيخلص موضوع الصيانه على طول و مش بيتأخر فى التوكيل


بعد حوالى اسبوعين عمل التوكيل اعلان عن اختياره لفائز من ضمن المترددين على التوكيل ليفوز بسيارة بحوالى مليون جنيه .... فبدأ صاحبى يلاحظ ان التوكيل بقى عليه ضغط غير عادى لعل و عسى ان يفوز أحدهم بالسيارةالهدية ...


و بعد حوالى 10 ايام بدأ صاحبى يزهق و يقول لنفسه ... على ايه وجع الدماغ و اروح التوكيل و اعطل نفسى 5 مرات فى اليوم ... مش كفاية مرة و لا اتنين

و بعدين ميعاد الفجر دا صعب قوى اروح التوكيل فيه علشان شغلى الصبح !!

- مهى العربية لسه جديدة و بحالتها ...و ليها عمر افتراضى على الاقل 5 سنين بعدها يحلها حلال

- و تعليمات المصنع انا مش مقتنع بيها يبقى هعملها ليه ... يعنى ليه اغير الزيت كل 10 الاف كم مهو لسه زيت اهه و منقصش و لا حاجة

- و التيل ليه أغيره مهو كده كده الطنابير هتتغير يبقى اسيبهم لما يأكلوا فى بعض و ابقى اغيرهم

- و زيت فتيس ايه يا عم اللى بيقوللك كل 40 الف كم دا لسه بحالته وموش شايط و لزوجته تمام متسمعش كلام بتوع التوكيل اللى بيخلوك تصرف و خلاص

- و سير كاتينه ايه اللى اغيره ..دا بتاع بلاده يا معلم يبقى سيبه لما يتقطع و احط واحد غيره

- و بصراحة انا نفسى أخمس و ادوس و اقرص على العربية و هى لسه بحالتها قبل ما تقدم و صحتها تتعب ....و لما الموتور يضعف بقى ابقى احافظ عليها و التزم بالصيانات و اروح التوكيل اياه ...منا هبقى فضيت و معدش ورايا شغل وقتها و هروح التوكيل حتى لو عشرين مرة فى اليوم.......



و بينما هو غارق فى افكاره و استمتاعة بالسيارة و هو على سرعة عالية وهو ناسى لتعليمات المصنع اذ به يجد السيارة لا تستجيب له .... يحاول يدوس بنزين لكن لا شىء يحدث ..... يحاول يدوس فرامل فلا تستجيب له الفرامل .... و فجأة اذا به يفيق من غفلته و تفريطه فى حق سيارته و يقول يا ليتنى سمعت كلام التوكيل ...يا ليتنى حافظت على الصيانه الدورية ....ووجد انه هالك لا محاله .....


لماذا يصر الكثير منا على هذا التفريط فى حق نفسه بعد ان جرب الالتزام بأوامر الله فى رمضان و قرر ان يرجع الى المخالفات و المعاصى مرة اخرى و لا ينفذ اوامر الله التى قد نفذها و قدر عليها

ووجد انه فى معية الله و يجدد ايمانه 5 مرات كل يوم يشكو الى الله همومة و احزانه و لا يرده الله خائبا ....

لماذا نهرب من الله بعد رمضان اليس رب رمضان هو رب كل الشهور

لماذا نصلى كل الصلوات و خصوصا الفجر فى رمضان و بعد رمضان بخ....خلى اللى يصلى يصلى احنا مالنا و نشوف المساجد شبه مهجورة

لماذا يصر الكثير منا على مخالفة رب البشر الذى ارشدنا الى مافيه الخير من اتباع اوامره و اجتناب نواهيه و يقول انا مش مقتنع بأن الاغانى حرام او مش مقتنع بأنى اصلى فى المسجد او مش مقتنعه بالحجاب و مش و مش ................



يقول الله تعالى " يَا أَيُّهَا الَّذِينَ آمَنُوا اسْتَجِيبُوا لِلَّـهِ وَلِلرَّسُولِ إِذَا دَعَاكُمْ لِمَا يُحْيِيكُمْ وَاعْلَمُوا أَنَّ اللَّـهَ يَحُولُ بَيْنَ الْمَرْءِ وَقَلْبِهِ وَأَنَّهُ إِلَيْهِ تُحْشَرُونَ ﴿الأنفال: ٢٤﴾



وعبادة بن الصامت قال أشهد أني سمعت رسول الله صلى الله عليه وسلم يقول

" خمس صلوات افترضهن الله تعالى من أحسن وضوءهن وصلاهن لوقتهن وأتم ركوعهن وخشوعهن

كان له على الله عهد أن يغفر له ومن لم يفعل فليس له على الله عهد إن شاء غفر له وإن شاء عذبه"


اللهم ارزقنا الالتزام بشرعك و المحافظة على الصلاة و اتباع الاوامر و اجتناب النواهى