لقيت ستاير كبس ووش فانوس لوجان

**ghosty1313** · 02-09-2011 03:44 PM

يوم الوقفه طلبت معايا انزل التوفيقيه اسأل على ستاير كبس

سألت فى كذا محل من بينهم محلات قطع غيار رينو ومحدش عنده.. وكله يقولى اللوجان جديده ولسه مااتعملش ليها ستاير كبس وتعالى بعد العيد اعملها تفصيل ب 80 جنيه

لغاية ما لقيت ولد صغير واقف على الرصيف فى الشارع الصغير المتفرع من شارع التوفيقيه قدام المول الجديد

قولتله وانا يائس عندك ستاير كبس لوجان
فوجئت بيه بيخرجها من وسط كذا نوع وبيقولى اتفضل يابيه

عادى يعنى ولا كانها مش موجوده

قولتله متاكد انها لوجان

بصلى كأنى شارب حاجه وقاللى ايوه لوجان طبعا

جيبتها ب 50ج وقاللى ان فيه ب 40 بس خامات اضعف

بس طبعا كانت للإزاز اللى ورا والشباكين اللى وار

سألت على الشباكين اللى قدام قاللى دول بيتعملوا مخصوص ب 40ج برضه لوحدهم

وانا ماشى من عنده وشايل الستاير دخلت شمال فى الشارع الموازى لشارع التوفيقيه
لقيت محل مكتوب عليه شركه........ لتصنيع البلاستيك
بس مش فاكر اسمه للاسف

لقيته عارض وشوش فوانيس كل انواع العربيات

انا عندى وش الفنوس اللى ورا شمال اتكسر من عيل كان بيلعب بمتوسيكل لبس فيا

دخلت المحل ومتخيل انه هايقولى ان مفيش وشوش فوانيس لوجان لانها لسه جديده

الرد المعتاد يعنى

سألته على وش فانوس لوجان .. قاللى يمين ولا شمال؟

سبحان الله .. اجابه غير متوقعه

ب 40 جنيه

هو طبعا الخامه اضعف من الاصلى بس شكله مايفرقش حاجه

خرجت من التوفيقيه مبسوط جدا وبحمد ربنا

**omran80eng** · 02-09-2011 04:07 PM

جزاك الله خيرا

انا عندى شرخ فى الفانوس الامامى و عاوز اغير الوش بس
ممكن تقولى اسم المحل اللى جبت منه

**ayman1204** · 02-09-2011 04:26 PM

ممكن صور يا جميل للستاير والواد دا معرفتش تقفشه وتجيب رقمه مثلا او اوصفلنا شكلوا علشان ننزل

**ghosty1313** · 02-09-2011 05:20 PM

بالنسبه للفوانيس
انا بجد مش فاكر اسم المحل

بس هو فى الشارع اللى بعد شارع التوفيقيه
هتلاقيه على اليمين لو جاى من شارع رمسيس
مكتوب عليه شركة ( كذا ) لانتاج البلاستيك

بجد مش فاكر الاسم

هحاول بكره اعدى تانى فى السريع

اما بالنسبه للواد بتاع الستاير فهو فى أول تقاطع شمال لو ماشى فى التوفيقيه وجاى من ناحية شارع رمسيس

اول ما تدخل شمال هتلاقى مول جديد على ايدك اليمين وبعده محلين لاكسسوارات الفيات واللادا
هتلاقى الواد ده فارش على الرصيف الناحيه التانيه قدامهم
هو صغير فى السن عنده حوالى 15 سنه

برضه هابص عليه بكره

اما بالنسبه للصور.. فاهصورها وارفعها بالليل