المفروض ان الموضوع ده للمتعة ولاضفاء حالة ذهنية جميلة مش كدة ؟
اللى حصل معايا عكس كدة خااالص الله يسامحكو بقى على نقل التجارب دى لاخواتكم المصريين اللى كلهم هايجيلهم انهيار عصبى بعد مايقروا الموضوع
عرض للطباعة
المفروض ان الموضوع ده للمتعة ولاضفاء حالة ذهنية جميلة مش كدة ؟
اللى حصل معايا عكس كدة خااالص الله يسامحكو بقى على نقل التجارب دى لاخواتكم المصريين اللى كلهم هايجيلهم انهيار عصبى بعد مايقروا الموضوع
عارف الى بجننك اية فى موضوع عيشتهم و عيشتنا
ان اهل البلاد دى مش بالذكاء و لا الفطنة الى معظم الناس متخيلها بالعكس دول على قدهم
و ذكاء و ديناميكية المصرى برقبتهم بس و اة من بس دى
1- همة منظميين و دة بيوفر وقت معاهم بنضيعة احنا فى الهرجلة مع شغل المصريين ما انتو عارفيين
2- لما بيجى الواحد منهم يشتغل بيعمل 1 ثم 2 ثم 3 ثم 4 و لو اليوم يكفى 4 مهام يبقى مفيش 5 او 6
و كمان متلقيش 3 خلصت قبل 2 و بالمرة شغال فى 4 على السكة علشان اوفر بقيت اليوم و اريح و انتخ - مفيش الكلام دة
3- زى ما الاخوة قالو - بريك ( راحة ) يعنى بريك لو معاة مناقصة بتاعة ابوة بيسيبها و يروح الراحة بتاعتة
4- الاجازات مقدسة عندهم - اجازاتة السنوية بياخدها كلها قبل نهاية السنة و لا عندهم اصل حاجة العمل لا تسمح او لا مفيش اجازة و لا شيلو بعض و لا الهجايص دى
دى بعض النقط الى مخلياهم متفوقيين فى العمل على الرغم ان احنا اذكى منهم و اكثر ديناميكية
و النقطة الاهم هى تطبيق مبدا كن سعيد فى العمل تكن سعيد فى البيت لتعود سعيد مرة اخرة للعمل
موضوع ان احنا اذكى منهم ابسط بالعشرين عليها
وانا راجل زرت تسع دول اجنبية
احنا اذكى منهم هم اتعلموا ادنا 50 مرة
فعلا الموضوع إن هنا الفرد صعب قوي يمشي عكس التيار
هناك سهل إنك تكون كويس عشان معظم الناس كده
هنا .. ماظنش الموضوع بهذا القدر من السهولة
أنا شايف أن أحنا عندنا فهلوية زيادة عن اللزوم .......... و لكن هما مش أغبياء و أحنا أذكى منهم .
و في الآخر برضه مش مهم مين أذكي من مين
المهم كيفية استخدام الذكاء و تطويره وتطوير البلد به .
أحنا اهل الفهلوة .......... و دهان الهواء دوكو
أنا سافرت ألمانيا لمدة شهر و نص , رجعت مصر قعدت سنة و نص متعقد و في حالة نفسية سيئة من كل شىء حواليا
أنا مش مستعر من بلدي و لا قرفان منها , بالعكس أنا بحبها جدا و مقدرش أبعد عنها
أنا بس دايما بسأل نفسي سؤال , هم الناس دي ليه كده ؟ وإحنا ليه مش كده ؟؟
لله الأمر من قبل و من بعد
علي رأي رياض الخولي في فيلم طيور الظلام ( فيلم سيرة حياة الشعب المصري )
تركيا
غالبية ما ذكر من السادة الاعضاء انا شوفتوه هناك
بالرغم ان فى ناس كتير تقول ان الاتراك وحشين
انا عمرى ما شفت منهم غير كل ادب واحترام
وان كان اخر زيارة سواق تاكسى عاوز يا خد اكتر من العداد
طبعا لم ارضى وعطيته مثل العداد تماما
فلما نزلت شتمنى تييييييييت
طبعا قولتله انت الى تيت انت والى جابوك
انا عارف تركى بس هو ماخدش باله
بس عموما بلد ممتازة
من وجهة نظرى
في المانيا و آآآههه من المانيا
أول مانزلت من المطار كانت الساعة 11 بالليل و عاوز أروح الفندق في بلدة قريبة من المطار اسمها ارلنجن لقيت الست سواقة التاكسي و معاها مرسيدس عيون و انا مبعرفش الماني بس هي عملت قرد علشان تفهمني بمنتهى الذوق. المهم ركبت و هي شغلت الجي بي إس و كتبت اسم الفندق و انطلقنا. رغم ان مكانش فيه حد خالص في الشارع لكنها مزودتش كيلو واحد عن السرعة القانونية و وقفت في كل الإشارات الحمرا.
المهم وصات الفندق و أخدت أد العداد بالضبط و اديتني الباقي و كمان وصل.
وصلت الفندق متأخر كتير عن الميعاد لأن الطيارة أصلا كانت فاتتني و حجزت الطيارة اللي بعدها. كنت هناك يوم الجمعة بالليل و ده بداية الأجازة عندهم (بيروحوا الديسكو و يسهروا و يقضوها) لكن الراجل اللي في الرسيبشن فضل مستنيني و لما دخلت رحب بيا ولا كأني معطله ووصلني للجناح بتاعي ولا طلب بقشيش ولا أي خدمة يا أستاذ ولا حمد الله على السلامة. لأ دخلني الغرفة و خلاص.
تاني يوم نازل أتفرج على البلد و اتمشى شوية و بعدي شارع صغير لقيتني في نص الشارع و الناس واقفة ورايا و بتبصلي كأني من كوكب تاني. أتاري المشاه بيقفوا في الإشارة !!!!!!!! طبعا كملت تعدية و أنا في نص هدومي.
دخلت صيدلية أجيب دوا كان ناس موصياني عليه الدكتور في الأول رفض علشان الروشتة لازم تكون معتمدة من دكتور الماني و بعد كده بايني صعبت عليه و قرر يديني الدواء. الكلام ده أخد حوالي 15 دقيقة كلام و كان ورايا واحد الماني عاوز يشتري دواء.... طبعا مسمعتش كلام زي "ما تخلص ياعم" أو "مشيني أنا الأول، ده أنا هشتري حاجة صغيرة" ولا حتى بصلي بصة وحشة... بالعكس ده كان يعرف شوية انجليزي و كان بيحاول يترجم كلامي للدكتور.
المحلات هناك بتبقى عارضة بضاعتها برة المحل و المحل بابه مقفول و الكاشير جوه. يعني اللي عاوز ياخد حاجة و يمشي من غير ما يحاسب هيعملها و محدش هيعرف. لكن الناس كانت بتاخد الحاجة من برة و تدخل جوة تقف في طابور علشان تدفع.
زي ما الزملاء قالوا... تذكرة القطار بتشتريها من مكنة و تاخد الباقي و تركب و محدش بيطلع يفتش. ده غير النظافة و النظام في الركوب و النزول. حاسس أني مش راكب قطار، ده طيارة.
كنت رايح هناك تبع سيمنز فقلت للست بتاعة الفندق و أنا بحاسب أني عاوز تخفيض علشان تبع سيمنز. مقالتليش "ايه يثبت. مش ممكن تكون بتشتغلني". أو "طب استنى هكلمهم و اتأكد" أو "يا سمييييررر.. عندنا زبون من اياهم هنا"... لأ راحت عملت التخفيض من غير كلام.
الشحات هناك (الباشا الشحات) بيطلب الفلوس عن طريق إما عزف على الكمان أو الجيتار أو عمل عرض بانتوماين أو أي افتكاسة فنية ولا شريهان في زمانها. و بيبقى حاطط الطاقية بتاعته على الأرض اللي عاوز يديله حاجة بيديله و اللي مش عاوز هو حر. الشحات هناك وي البه عندنا تحس أن عنده كرامة و عاوز ياخد الفلوس عن استحقاق.
فضلت عندي صدمة حضارية و قرفان من كل المصريين و العرب لحد دلوقت... الكلام ده من 3 سنين. حاجة تقرف.
كنت فى سنغافورة من 8 سنين و نزلت أتمشى شوية على كورنيش نهر عندهم.......المهم بعد ما خلصت واقف فى منطفة غالباً كانت مقطوعة أو مفيهاش حركة كتير بالليل.......ما فيش و لا تاكسى معدى لمدة 15 دقيقة تقريباً....و بعدين الإشارة اللى أنا واقف عندها قفلت.....و جت عربية ليموزين وقفت........السواق فتح الشباك و قالى أنت مستنى حد.....قولتله مستنى تاكسى.....الراجل قالى صعب جداً تلاقى تاكسى هنا دلوقتى.....طبعاً الفهلوة المصرية اشتغلت و قولت ده أكيد بيشتغلنى علشان يوصلنى.....شكرته و خلاص.......خصوصاً ان التاكسى كان غالى أصلاً عندهم.....بيفتح بحوالى 10 جم و المشوار اللى كنت رايحه كان هيتكلف حوالى 50 جم.
لقيت الراجل قالى طيب تعالى أنا هوصلك.......قولتله بس أنت مش تاكسى.....قالى مش مشكلة تعالى......دخلت الليموزين و قعدت و هو شغل العداد على بنديرة التاكسى و أنا الفك السفلى عندى مدلدل لتحت من الصدمة.
ما شاء الله الاخوة لم يتركوا شيئا إلا وتكلموا عنه
فقط اردت ان أضيف ملحوظة صغيرة ولكن في رأيي هي عظيمة الشأن
وهي الاهتمام بالمعاقين وذوي الاحتياجات الخاصة
فهم يعيشون حياة طبيعية تماما ويشاركون المجتمع في التنمية والبناء سواء كان بالدراسة أو العمل في جميع المجالات ولهم حق في الحياة تماما مثل نظيره المعافى في جسده وليس عبئا على اهله ويجلس ينتظر الموت حتى يرتاح ويريح اهله منه
والحمد لله...
ومش بس الأتوبيس ده المطاعم والحمامات واماكن الركنه وكل حاجه
آه بس مثلا احنا عندنا اماكن للمعاقين بس الناس بتستخدمها عادي وبتنفضلهم
لكن موضوع الأتوبيس ده بقى عايز قرن
دحنا هنا لو الواحد سليم برده ممكن ميلحقش الأتوبيس وهو بيجري وراه
بالاضافة للي اتقال في موضوع المعوقين و طبعا موضوع ان كل رصيف فيه رامب للمعوق ولعربية الاطفال
هنا قي الاسانسيرات في بانيل بالعرض على ارتفاع متر من الارض ده غير البانيل الطولية العادية , علشان اللي على كرسي يعرف يدوس على الدور بتاعه لوحده بدون مساعدة
أهلا بالزميل , حضرتك في قسم إيه؟ , أنا في Energy Sector - Power Transmission
وكنت في إرلانجن برضه , وبمناسبة الكلام عن التاكسي حصل معايا موقف هناك كنت واخد تاكسي و مديله ورقة فيها العنوان , فالراجل إتلخبط في الشارع و دخل شارع غلط قبل اللي المفروض يدخله
فعمل إيه ؟ وقف العداد لغاية مايرجع للشارع الصح عشان مايحسبش عليا مسافة زيادة ماليش ذنب فيها
ولما رجع للشارع شغل العداد تاني . تفتكر ممكن حد يعمل كده في مصر ؟!!