الموضوع: نوبيرا زيرو بتعوم مع الفرامل

جبت نوبيرا مانيوال 2008 ويدوبك عاملة 3 الاف كيلو ، بإختصار ماليش تعليق على عيوب فيها لأنى ماكنتش حاطت توقعات عالية ، عشان كدة مبسوط بيها وحاسس إن أدائها أفضل من اللى توقعته

إنما المشكلة اللى محتاج آخد رأيكم فيها إن أول مرة إحتجت أضغط الفرامل بقوة لقيت العربية (عومت) راحت يمين فى شمال فى يمين ، يعنى مش حدفت يمين أو شمال بإستمرار ، إنما رمت يمين وعدلت شمال ورجعت تانى يمين بسرعة (زى كدة: / ثم \ ثم /) ، الحمد لله كان اللى قدامى رجع تانى بعد ما كسر عليا فسبت الفرامل ((وهو ده اللى عدل العربية إنى سبت الفرامل))

الكاوتش طبعاً لسة جديد والتآكل بنفس الدرجة (عرض 185 بالمناسبة) والهوا برضه مظبوط ، والطريق متساوى ومافيش رمل أو مياه جوا نفق الأزهر ، السرعة كانت عالية نسبياً حوالى 100

تفتكروا السبب إيه ؟؟ وإيه العلاج ؟ هل أغير مقاس الكاوتش لمقاس أعرض ؟ ممكن يكون فى هوا فى مواسير الباكم ؟ ولا أتعايش مع المشكلة وما أخبطش راسى فى الصخر لأن هى النوبيرا كدة ؟

بالمناسبة لما بفرمل فرملة متوسطة على سرعة عالية بحس بخبط خفيف وسريع فى دواسة الفرامل ، زى إحساس الإيه بى إس كدة ، وكنت بفسره إن الطنابير لسة جديدة ويمكن فيها (ريجة!) أو محتاجة تطبع أكتر مع التيل ، هل ده ممكن يعطى تفسير ؟

شاكر لكم جميعاً