الموضوع: ليه العربيات الجديدة والمستعمله غالية في مصر(دعوة مفتوحة للنقاش)

بسم الله الرحمن الرحيم

ملحوظة : ياريت الكل يقرا الموضوع كله ونتناقش فيه علشان بجد دي حاجة عمري ماشوفت حد يتكلم فيها .

- طبعاً كلنا هنا بنتكلم في العربيات وعن كل شئ فيها بس ماحدش عمره اتكلم عن حال اسعار العربيات في مصر وخصوصاً ان المنتدى اغلب اللي فيه مصريين وحاسين زي بالازمة دي , وانا هادخل في الموضوع على طول .

سؤال واحد ملخص للموضوع كاكل (ليه العربيات الجديدة والمستعمله غالية في مصر)

معروف من زمان ان الشعب المصري غير اى شعب والحكومة المصرية غير اى حكومة في العالم كله يعني اللي ماشي بيه العالم كله احنا المصريين ماينفعش عندنا مش موضوعنا دلوقتي


انا هاتكلم عن السيارات بس ,طبعاً في كل العالم ماعدا قله من الدول منها مصر العربيات فيها غاليه بشكل مبالغ فيه وطبعاً ده بيرجع لعده أسباب اهمها

1- ان الشعب المصري كله لسه بياخد على قفاه ومش بيتكلم
2- الحكومة بتمص في دم المستوردين وبتاخد جمارك مبالغ فيها
3- المستوردين بالتالي بيمصوا في دم الشعب ولازم يكسبوا
4- سعر الجنيه المصري اللى بقى في الارض قريب هايتباع بالكيلو

وياريت ماحدش يزعل من السبب الاول وانا هاقولكم مثال يوضح كلامي في سنه 2004 وتحديداً في 25 فبراير قامت الحكومة بتاعت العصر البائت بالتوقيع على اتفاقيه اغادير ودي اتفاقيه اقامة سوق عربية مشتركة بين مجموعة من الدول وهما مصر تونس المغرب والاردن بتنص الاتفاقيه بالاختصار انه يتم ازالة الجمارك من الصادرات والواردات من السيارات بين الدول دول وده شرح الاتفاقية من موقع ويكيبيديا

http://ar.wikipedia.org/wiki/%D8%A7%D8%AA%D9%81%D8%A7%D9%82%D9%8A%D8%A9_%D8%A3% D8%BA%D8%A7%D8%AF%D9%8A%D8%B1

دلوقتي المغرب الحمد لله صنعت عربيه رينو لوجان الفرنسية مش صنعتها كلها بس صنعت فيها بنسبه اكتر من 40% يعني عدل ربنا يقول ان العربية تدخل مصر من غير جمارك يعني الحكومة مش بتمص في دم المستورد هنا يعني المستورد مش هايمص في دم الشعب لحد كده تمام نشوف بقى سعر العربيه في مصر من موقع كونتاكت كار

عمار يامصرررررر

ده سعر العربيه في مصر بيبدا من 66 الف حتى 114 الف في وقت ان السعر العالمي فيها بيبدا من 5900 يورو بالمصري 50 الف جنيه مصري وفي الغالب اللي هاتكون متصنعه في المغرب هاتكون ارخص من سعرها العالمي ده , والمستورد هنا وهى شركة EIM واخد مكسب له في العربية اكتر من 16 الف واكتر لانه لما واحد يشتري عربيه مش زي الوكيل في سعر العربية بس المستورد معذور لانه لو نزل العربيه مثلا بـ 50 الف هنا باقي الشركات الباقيه مش بعيد تقتله وتمحيه من السوق لانه هايوقف حركة بيع سيارتهم المبالغ فيها , وده موضوع يوضح كلامي

http://www.contactcars.com/News_ViewStory.asp?NewsID=2325


مثال تاني

مثلا عربيه فيات 128 العربيات اللي انقرضت من العالم كله ماعدا مصر ليه سعرها في مصر بيبدا من 12 الي 25 الف في الوقت اللي ممكن مبلغ زي ده يركبك عربيه آخر حلاوة في السعودية هو يعني حلال عليهم وحرام علينا وقيس على كده باقي العربيات المستعمله وامثله كتير لو فكرنا في اسعار العربيات في مصر بصراحة حاجات تجيب شلل

الغريب في الامر ان سعر العربيات كده وبرده العربيات بتكتر في مصر والشعب عامل فيها عبيط ولا عمره فكر في حاجة زي كده زي علبه السجاير اللي كل يوم بتغلى وبرده بيشربها وعمره ماقال لا احنا هانفضل لحد امتى شعب بياخد على قفاه

وبالمناسبه اانا فرحت بالثورة والحمد لله بس النتيجة اللي حسيت بيها من الثورة لحد دلوقتي انه توقيت مصر بقى واحد لا بقى في توقيت صيفى ولا توقيت شتوي زي زمان

دلوقتي بقى نحل الموضوع ده ازاي نعمل ثورة تاني علشان موضوع العربيات ولا نخلى العربيات للطبقه اللي معاها فلوس وبس والطبقة المتوسطه اللي هى معظم الشعب تقضيها ميكروباص واوتوبيس ومترو وتاكسي وتكتوك وموتوسيكل ولا نرضى ونسلم بالامر الواقع ولا نولع في نفسنا ولا ايه بالظبط ؟؟؟؟؟

معلش طولت عليكم بس بجد حاجة تحرق الدم شايف الظلم وساكت عليه

ف السعوديه العربيه الي بتطلع من المعرض بتنزل نص تمنها علي طول
تعدي عليها سنتين تتباع بتلت تمنها و ربع تمنها

كورولا 2006 كانت ب 42 الف اول فئه مانيوال دلوقتي يوم ما تبيعها مابتجيبش 20 الف !!
غير البي ام و المرسيدس الي بيستوردوها من اوروبا و امريكا مستعمله بتتباع ب 40 الف و 30 الف و بتبقى عربيات ماشيه حاجات بسيطه

لكن يبقى العقل المصري الي مفيش حد فاهمه لغايه دلوقتي
القانون المصري قايم علي الاستبدات و عبوديه المواطن
دايما بيخلي الحكومه دايسه علي رقبه المواطن و مش سايباله متنفس يرفه علي نفسه
مع ان وظيفتها ماهي الا اداره البلد و لكن بيحللو لناس و يحرمو علي ناس و الكلام دا كله يتلغي لان دا مش عصر عبوديه
خلاص ايام مص دماء الشعب انتهت
المفروض نعمل جمعه لالغاء الجمارك او تقليلها و وضع اليه لإلغائها

يعني اوروبا عامله اتفاقيه مع مصر كل سنه بيتخفض 10% علي جمارك البضاعه الاوروبيه و لكن لغايه دلوقتي اسعار الاوروبي بتزيد مابتقلش !!!!!!!!!!