الموضوع: أنا أسف .. استطعتم خداعي .. و لكن هل اعود لصوابي؟

بالنسبة بقى لموضوع العربيات الكوري
أنا غير متفق عليه بالمرة .

أولا
الكوري فيه منه الدايو اللانوس ........ و الفيرنا ........ و دول عربيات متوسطة و أسعار قطع غيار شعبية (و أنا شايفهم عربيات ممتازة للي يفهم العربية -- مش يشتريها و فاكرها فيراري )

والله المفروض الواحد مايشتريش العربيات دي لعدة اسباب
الدايو سر نجاحها انها ضمن مجموعة او عائلة gm وبالتالي هي بتاخد من اوبل (اوروبي) وتحط في الدايو (كوري) ودة عموما كان زمان - زاد الطين بلة انها بقت تجميع مصري

و الله يا جماعة مش عارف ليه أنتوا ظالمين التجميع المصري ؟ أنا أعرف تجارب عملية كتير لعربيات دايو تجميع مصري و أول عمرة أتعملت للعربية و هي معدية 300 ألف تقريبا مع العلم أنها ملك قريبي صاحب شركة مقاولات و مش عربيته الخاصة ولكن كل المهندسين في الشركة بيستخدموها .

نفس الشئ في الفيرنا - تجميع مصري - وحتي الي مش تجميع مصري زي الماتريكس تلاقي الوكيل بيطلبها بمواصفات معينة - مواصفات مصري

دي دي تبقى عيوب توكيل مش عيب عربية ؟

تعال شوف العربيات المواصفات الأوروبي تلاقي فيها ايرباج وفرامل abs واحزمة امان خلفية وانوار شبورة ومواصفات تانية كتير اوي مش بتنزل عندنا

الفيات البونتو نازلة من غير أير باج أو فرامل أي بي أس لغاية 2002 علشان دي اللي كانت معايا ... و الفيات السينا نازلة من غير أيرباج و أ بي أس و لا أنوار شبورة و لا أي حاجة أمان و كمان صناعة أيطالي
و دي النقطة اللي أنا بتكلم فيها .......... التعميم

وتعال قارن اللانوس والفيرنا (عائلية صغيرة) بالعربيات الأوروبي نفس الفئة والسعة اللترية
انسب عربية في الفئة دي مش هقولك رينو لوجان 1600 لا الرينو كليو 1400 سي سي
ايهما تفضل ؟؟؟ الفيرنا ولا الكليو ؟؟؟؟
انا معاك ان قطع الغيار غالية شوية في الفرنساوي بس مقابل العمر الأفتراضي والنعومة والثبات والأمان

هأختار اللانوس علشان قطع غيار عند البقال و بتعيش ..... الكليو جميلة ...و لكن ما أشتريهاش لأسباب شخصية علشان مش بحبها

و في أيضا الألنترا و السيراتو ....... و دي عربيات فوق المتوسط في الفئة و أنا شايفهم عربيات ممتازة و كل حاجة لها مميزات و عيوب .

انا شايف ان الألنترا والسيراتو والكروز عربيات اوك ماشي الحال شوية ولكن بردو لا تقارن بالأوروبي الي في نفس مستواهم
يعني هما في فئة العائلية المتوسطة ذات السعة اللترية بين 1600 - 2000
يجي معاهم فولكس جيتا - بي ام الفئة الثالثة - رينو ميجان وفلوانس - بيجو 406 او 407 - اودي a4 - سيات ليون - اوكتافيا - فيات تمبرا - اوبل فيكترا - الخ....

طيب أنا شايف أن الألنترا الجديدة أفضل مثلا 100 مرة من التمبرا أو حتى الألنترا القديمة أفضل برضه و أفضل من الميجان برأي أثنين أعرفهم باعوا العربية بسبب مشاكلها الكتيرة و أشتروا ألنترا و التاني جين 2
ثانيا ..... فروق السعر ما بين الألنترا و العربيات اللي حضرتك ذكرتها عالية قوي و بالتالي المقارنة هايدخل فيها السعر النهائي للسلعة و كل واحد عنده وجهه نظر في الشئ اللي ناوي يشتريه

بردو لما تقارن مش هتلاقي اوجه مقارنة اساسا
يعني لا يمكن تقارن سيراتو ب الجيتا
او الالنترا ب 316

و فين عامل السعر ؟؟

و فيه العربيات العالية في الفئة زي العربية الهيونداي اللي جمهعا غبور و مش فاكر أسمها و كانت 2000 و 2400 سي سي
و دول أعلى شوية في الفئة ...

تعال قارن الهيونداي سوناتا قصدك ؟؟؟ ذات السعة اللترية 2000 وكمان في منها 3000
ومعاها الدايو ليجانزا 2000
والكيا اوبتيما 2000 و 2400

هتقارنها بأيه في الأوروبي
فولكس باسات - اودي a6 و a8 - مرسيدس e- بي ام الفئة الخامسة

أيه المشكلة ...... هاتاخد عربية بمستوى عالي و بسعر أقل تقريبا النصف أو الثلث يبقى عامل السعر دخل معانا في المقارنة .

المشكلة أن الخدعة بتيجي في موضوع قطع الغيار أنها رخيصة
مع أن قطع الغيار الأصلية مش رخيصة تماما خالص
هي بس الدايو و الفيرنا عاملين سمعة حلوة لأسعار قطع الغيار للكوري .

أؤيدك في هذا الرأي


طيب الناس قالت أوروبي
ما هو برضه ما ينفعش نعمم كل الأوروبي و يبقى في سلة واحدة
زي البولو مثلا ما هي أوروبي و لكن الألنترا أحسن منها مليون مرة كعربية و كسعر و كموتور و قطع غيار هو حضرتك بتقارن ايه بأيه ؟؟؟؟
قارن البولو 1000 بال i10 في نفس الفئة

لاةء البولو تتقارن بالجيتز اللي في نفس الحجم
الأي 10 تتقارن بحاجة من عند فيات في نفس الفئة الحجمية بس مش فاكر أسمها و أعتقد البيكانتو و الأي 10 مقطعين الفيات الصغير حتى في أوروبا .
و أنا لما ذكرت البولو مكنش قدي أقارنها بعربيات أكبر علشان أثبت أن الكوري الأكبر أفضل أو شئ أنا قلت أسمها في المقارنة علشان هي أوروبي و الكلام كان فيه تعميم بتاع كوري و أوروبي فقلت أعمم أنا كمان و أهوه تعميم بتعميم لاظهار الفروق و بيان أنه لا يجب التعميم .

و البونتو مثلا
طيب دول من فئة أصغر ... لو أتكلمنا على فئات أكبر زي الألنترا في المقاس معانا عربيات زي الفيات اللينيا .... الألنترا أحسن منها (أنا بتكلم على اللينيا العادية اللي من غير توربو ) ده مثال بس .



مينفعش نعمم الكلام
أنا شايف أن العربيات الكوري أغلبها يتميز بالنعومة في الركوب ......... و ضياع الثبات .
و ده حاجة على حساب حاجة و محدش ييجي يقولي ده عيب
لأن ممكن ببساطة واحدة تاني بيدور على الثبات و مش بيدور على النعومة و بالتالي الكوري أغلبه مش هايكون متوافق معاه .

الفيات عربيات أوروبي و من شركة من أعرق شركات العالم و أوروبا و مع ذلك بتعمل بلاوي
عربيات بتسخن ......... أو حساسة زيادة للسخونة ..... و قطع غيار عمرها مش كبير قوي مقارنة مع ألمانيا مثلا

هو حضرتك بتتكلم عن ال125 ؟؟ ولا 124 ؟؟؟؟
كانت فين هيونداي لما عملوا فيات 100 ولا 128 ولا كيا انا معاك الدايو قديمة

سيبك من كلمة كانت فين هيونداي
و هي كانت فين اليابان لما مصر بنت الأهرامات و أنشأت و أسست أعظم حضارة قديمة ؟؟؟
تعالى كدا أتكلم على مصر دلوقتي ...... دائما تذكر مصر يُذكر التخلف و الهمجية
و بالتالي سيبك من التاريخ علشان و لا له أي لزمة في المقارنة

و على فكرة أنا بتكلم عن فيات بونتو و عن سينا و بترا ........ و كلها أنتاج فوق سنة 2000 و عن تجربة مش كلام و خلاص
يعني مش كلام عن 128 أو 127 أو 125

و كمان فرنسا و عربياتها اللي بتكح تراب لو شمت ريحة التراب و تلاقي الحساسات بتاعتها ضربت و العربية حلفت مين يمين أنها مش هاتدور .


كلامي مش تعميم
و لكن مقصدي
أن أحنا بنعمم الكلام و خلاص ........... و اللي يتطبق على شئ نعممه و نطبقه على كافة الأشياء من نفس النوع .

و ياريت نبقى 1÷ 100 ........... من كوريا الجنوبية .

موضوع الأمان
عربيات هيونداي أصبحت من أعلى العربيات امانا في العالم و بتأخد 5 نجوم في أختبارات أمريكا و أوروبا على سرعة 64 كم - س
محدش بقى يعملي حادثة على سرعة 180 و ييجي يقولي العربية مش أمان

أنا شايف بعيني على الدائري حادثة لعربية بي أم دبليو و العربية أتفعصت بمعنى الكلمة أتفعصت .
و دوروا على حوادث الأوتوبان في المانيا و أتفرجوا على علب السردين الألماني في الحوادث .
و برضه مش معنى كلامي أن الألماني أي كلام بل بالعكس الألماني خصوصا بي أم و مرسيدس و أودي و الفئات العليا من فولكس بيحاولوا يعملوا عربيات متينة و قوية و تقلل الخسائر في الحوادث
و هو ده اللي هيونداي بتعمله برضه مع أختلاف المدارس .

مشكلتنا التوكيل اللي بينفض العربية من وسائل الأمان و بيضع عليها سعر عالي .
و أنا غير موافق بالمرة على أسعار العربيات في السوق المصري خصوصا العربيات اللي سوقها ماشي و فيها أستغلال من الوكلاء

سعدت بالحوار معاك يا فندم