الموضوع: فتح الشاسية فى السيارة الفيات 128

سيدي الفاضل
فتح الشاسيه بيبقي نتيجه لان المساعدين الاماميه غير سليمه
و دا بيخلي الشاسيه يفتح و بتلاقي الكبالن كل شويه تملص و فروق الابواب مش مضبوطه و تخلف زوايا و العربيه تبهدلك.
لكن انت بالعين المجرده ما تعرفش اذا كانت فاتحه شاسيهات و لا لاء.
لازم عفشجي كويس يبص علي العربيه من فوق و من تحت و يحدد .
و علشان تتجنب الموضوع دا هات جوز مساعدين جداد زيرو مش استعمال و ركبهم و لو ركبت بار كمان يبقي افضل .

بس يا استاذ حازم كتير اوي باشوف عربيات 128 فيها شروخات عند الصوابع و عند لحامات الفخدة بالحوض و بتبقي ملحومة بس باينة انها لحامات صنايعي مش فابريقة ......... فهل الموضوع ده برضه يعتبر فتح في الشاسيه ؟ وهل تلك اللحامات ممكن تفك مرة اخري ؟ وهل اشتري سيارة فيها الشروخات دي ؟ و سعر العربية في الحالة دي بيبقي عامل ازاي ؟ والف شكر

بص يا باشا
اي عربيه راشه دواخل مالهاش امان
دا في اعتقادي و عن تجربه لعربيات كتير سواء معايا او مع اهلي او مع اصحابي.
العربيه الملعوب فيها سواء لحامات او اي شئ بتبقي خلاص لان زي ما انت قولت الصنايعي عمره ما حيطلعها زي الفابريكه.
انت عارف انا ممكن اخد عربيه موتورها متبهدل و مفوت و حالته حاله بس اساسيتها سليمه.
لان الموتور يوم ما احب اغيره حغيره و ترجع العربيه لحالتها تاني.
انما قوايم و اساسيات لا يمكن .
فمن رايي بلاش من العربيات اللي بتبقي حوضها راشش او فيها بارومه في القوايم او السقف سارح فيه البارومه.
اما بالنسبه للاسعار مش عارف لان ال 128 بالذات اصحابها بيطلبوا فيها مبالغ خرافيه

الف شكر علي التوضيح

الأستاذ حازم خضر اشكر حضرتك جداً على سرعة الرد
ولكن لم توضح حضرتك لي هل فتح الشاسيه
1 – يعيب السيارة ويقلل من ثمنها
2 – هل يفضل عدم شراء سيارة الشاسيه بتاعها مفتوح
3 – عند فتح الشاسيه ما هو الحل لإرجاعه إلى حالته الأولى حتى لا يسبب ما قلته من أضرار
( بتلاقي الكبالن كل شويه تملص و فروق الأبواب مش مضبوطة و تخلف زوايا و العربية تبهدلك ) وهل هذا العيب يرجع مرة أخرى بعد معالجته .
وأرجو من السادة الأعضاء إفادتي برأيهم

1 – يعيب السيارة ويقلل من ثمنها

اكيد بيعيب العربيه و ممكن تخليني ما اشتريش العربيه من اساسه .

2 – هل يفضل عدم شراء سيارة الشاسيه بتاعها مفتوح

اكيد منعا للارف و اشتري دماغك احسن

– عند فتح الشاسيه ما هو الحل لإرجاعه إلى حالته الأولى حتى لا يسبب ما قلته من أضرار

\
الحل بتروح للعفشجي يشوفه و يقولك مفتوح من فوق ولا تحت و مفتوح اد ايه و بتروح لسمكري شاطر متخصص في الحاجات دي و يفضل ان العفشجي يدلك عليه لانه بيبقي عارف السمكريه النضاف في الموضوع دا.و السمكري بيقوم بالمهمه .

( بتلاقي الكبالن كل شويه تملص و فروق الأبواب مش مضبوطة و تخلف زوايا و العربية تبهدلك ) وهل هذا العيب يرجع مرة أخرى بعد معالجته .

لما الشاسيه يتعدل كل حاجه بتبقي تمام :)