محتاج نصيحة اهل الخبرة من ملاك جين2

**mido229** · 05-09-2011 10:07 AM

السلام عليكم..

أنا عربيتى جين2 موديل 2006 و كانت ماشية معايا زى الفل و فعلا حبيت العربية دى جدا.. لحد ما جه يوم و انا ماشى بالعربية فجاة لقيت العربية مش قادرة تمشى ببص لقيت مؤشر الحرارة وصل للاخر فركنت علطول واستنيت لما العربية تهدى و فتحت غطا الريداتير لقيتها بتفضى المية اللى فيها من تحت... و يصادف انه فى نفس اللحظة ببص لقيت العربية بتنقط من ناحية تنك البنزين نزلت تحت العربية لقيت فى خرطوم مشقق و بتنزل البنزين بس بنسب بسيطة .. طبعا زودت ميه و حاولت ادور لقيت العربية بتنطر الميه اللى فيها و هيا دايرة ... لحد هنا و انا بقول عادى قدر الله و ما شاء فعل ..

بس المشكلة انى كنت فى اكتوبر و انا معرفش حد للاسف هناك يشتغل فيها .. فقطرتها ووديتها لواحد كنت بتعامل معاه زمان ايام الدايو.. المهم طبعا جاى بيدور لقى الريداتير بينطر الميه اللى فيه قالى ده جوان وش السليندر ضرب .. و بصراحة انا كنت متوقع ففك طبعا و بدأ يشتغل و طلب منى اجيب جوانات وش سلندر وغطا تكيهات و فرن و منافولد و طقم جلد صباب .. وخد شغل فيها يومين عقبال ما ودا الوش عند الخراط و انا جبتله الحاجة وقفل و اتعمل اللازم.. تمام كده .. لا مش تمام !!

جيت اطلع بالعربية لقيت العربية تقيله فى السحب فى الاول وبمشى شوية لقيت تنتيشة جامدة طول ما انا ماشى و دايس بنزين وعلى اى غيار ؟؟ رجعتله طبعا قالى ده بسبب الخرطوم بتاع البنزين .. مشيت من عنده و انا غير مقتنع طبعا ومشيت يوم طبيعى من غير التنتيشة دى .. قولت اروح اعمل الخرطو بالمرة ومشيت تمام.. و تانى يوم لقيت التنتيشة رجعت تانى و اكتر من الاول.. روحتله قالى لا ده كده البوجيهات !! جبت بوجيهات جديدة مع انى كنت لسه مغيرها وغيرناها..اطلع بالعربية الاقى التنتيشة دى لسه موجودة .. رجعتله قالى لا دى كده مشكلة فى الكهربا بتاعت العربية ولازم تتحط على الجهاز و نشوف العيب .. و طبعا هيا بعد التنتيش الكتير ده بقت مبتدورش ووقفت مكانها و المفروض انه النهارده نشوف الكهربائى ده

مع العلم انه بعد ما عملت التنتيشة دى تانى مرة انا خليت العربية واقفة و رفعت العجلة اللى قدام يمين ودورت.. لما اوقف العجلة العربية كانت بتبقى دايرة عادى لما اسيبها عند لفة معينة من العجلة الاقى العربية بتبطل.. و بصراحة انا شاكك برده فى التقسيمة

انا مش عارف اعمل ايه و كل اللى نفسى فيه انها تدور و امشيها من عند الراجل ده و اوديها لحد بيفهم فيها لانى واثق انه كده اتلعب فيها و شكلها كده فتحت بقها

محتاج مشورتكو ممكن يكون العيب من ايه و اخلص من الموضوع ده ازاى؟؟؟

انا بجد اسف انى طولت عليكو بس انا فعلا عايش معاناه بقالى اكتر من اسبوع و مش لاقى حل

**أبومعاذ** · 05-09-2011 11:08 AM

روح مركز عصام صفا الناس هناك فاهمين و مش غاليين

**fineart607** · 05-09-2011 02:33 PM

لا حول ولا قوة الا بالله راى حضرتك فى العربيه عامة ايه لانى بدات افكر فيها بس الصراحة كده بخاف ؟؟؟؟؟؟؟؟؟؟؟؟؟؟؟؟؟؟؟؟؟ظ

**m_marmoush** · 05-09-2011 02:43 PM

وديها لميكانيكى يكون فاهم، عندك فى ورشه فى فيصل عند المهندس كريم شفيق وده رقمه 0105885638

**mido229** · 05-09-2011 03:00 PM

المشاركة الأصلية كتبت بواسطة fineart607

لا حول ولا قوة الا بالله راى حضرتك فى العربيه عامة ايه لانى بدات افكر فيها بس الصراحة كده بخاف ؟؟؟؟؟؟؟؟؟؟؟؟؟؟؟؟؟؟؟؟؟ظ

يا باشا اللى حصل ده ممكن يحصل فى اى عربية .. و الحمد لله طبعا على كل شئ
بس مش معنى كده ان العربية وحشة بالعكس الجين2 دى عربية محترمة و كويسة جدا بس هوا نصيب..
متقلقش يا باشا :)

**أبومعاذ** · 05-09-2011 03:05 PM

المشاركة الأصلية كتبت بواسطة m_marmoush

وديها لميكانيكى يكون فاهم، عندك فى ورشه فى فيصل عند المهندس كريم شفيق وده رقمه 0105885638

هل حضرتك دا متخصص بروتون؟

**محمد الشامي** · 05-09-2011 06:55 PM

متنساش يا محمد حكايه مؤشر الـ rpm اللي بينط لاخر العداد وانت بتدور المارش

**mido229** · 06-09-2011 12:20 PM

المشاركة الأصلية كتبت بواسطة محمد الشامي

متنساش يا محمد حكايه مؤشر الـ rpm اللي بينط لاخر العداد وانت بتدور المارش

كانت فى دماغى يا محمد .. كل حاجة قلتله عليها

-

الموضوع: محتاج نصيحة اهل الخبرة من ملاك جين2

LinkBack

أدوات الموضوع

عرض

-

-

-

-

-

المواضيع المتشابهه

سلام عليكم ...محتاج نصيحة من اهل الخبرة

محتاج نصيحة اهل الخبرة !!!

للاسف وقفوا استيراد ال Octavia A4 & A5 ولو سمحتم محتاج نصيحة من أهل الخبرة

بوينتر 2005 محتاج نصيحة ضروري جدا من أهل الخبرة

محتاج نصيحة ملاك الهوندا سيفيك الجديدة

الكلمات الدلالية لهذا الموضوع

المفضلات

المفضلات

ضوابط المشاركة