هحلق للتوكيل

**watzmann** · 05-09-2011 01:12 PM

السلام عليكم

انا بفكر جديا يا جماعة فى انى احلق للتوكيل و شكرا لغاية كدا و بصراحه انا مشوفتش منهم حاجه و حشه بس كمان مشوفتش منهم حاجه حلوة , العربيه عامله 55000 و شغاله كويس الحمد لله

و الصيانه بتعتهم بيعمولها و ماشى الحال , بس انا شايف ان كل حاجه بيعملوها غاليه موووت و اى حد شغال فى النيسان ممكن يعملها

انا بقا ببعت هنا دلوقتى اسأل , فى حد فيكم اتعامل مع حد تانى غير التوكيل و ارتاح , و ياريت لو حد يقولى فين المكان دا

شكرا

**mohamed10** · 05-09-2011 01:54 PM

بصراحة خليك فى التوكيل افضل خصوصا انهم حافظين العربية كويس وعندهم قطع الغيار الاصلية خصوصا اذا كنت لسه فى الضمان علشان مشاكل الضفيرة على سبيل المثال وكمان بصراحة هما بيشيكوا على العربية وعندهم المعدات اللازمة لذلك بعكس لو رحت لحد بره مش هايعملك كل اللى بيتعمل بالصيانة ومش هاتفرق كتيير فى المبلغ المطلوب خصوصا فى الصيانات مش الكبيرة .

**mido51eg** · 05-09-2011 02:10 PM

طالما العربية تستاهل ونضيفة ماتستخسرش فيها الصيانة في التوكيل. ديتها بس العربية تتعك منك بره عند صنايعي مابيفهمش او معندوش ضمير هتتعبك اوي لغاية ما تتظبط تاني.

**Ahmed.TV** · 05-09-2011 03:13 PM

بغض النظر عن قطع الغيار الاصلية اللى فى التوكيل .. لان ممكن يجيب قطع غيار اصلية بردوا من اى منفذ بيع لنيسان معتمد ويركبها عن اى ميكانيكى
المهم فى اللى بيتعامل مع العربية يكون ميكانيكى شاطر وشاطر جدا وعنده ضمير
عشان ميفتحش عليك فتحة
ده غير كمان ان حتسمع منهم كلام عجب .. زى يا بيه هات قطع الغيار التيوانى دى شغالة .. وكويسة .. وتجيب يا معلم .. وطبعا ممكن حاجة تقصر على حاجة .. وعمرها ما حتكون كفائتها زى الاصلى .. وفى الاخر بتمشى ورا الباشا وبتسمع كلامه .. ما هو ميكانيكى بقا

فى ناس كتير اتعملوا مع التوكيل والحمد لله وجدوا معاه حاجات كويسة حتى بعد ال100 الف كيلو .. ولقوا التوكيل وقف معاهم وبيحلوا المشاكل بمنتهى الذوق وبمنتهى الراحة للعميل .. والوقوف فى صفه كمان .. مع ان ممكن ميكنش ليه حق عشان ضمانه خلص .. واحيانا بعض قطع الغيار بيوفقوا يغيروها فى الضمان عليهم .. ومع ان ده مش صح .. بس بيبن انهم يهمهم راحة العميل جدا

ممكن عربيتك تحتاجهم فى اى مشكلة لقدر الله فى اى وقت .. وتغير حاجة على الضمان .. من الحاجات اللى تكلفتها كبيرة جدا .. فحرام تضيع منك الضمان

واذا كان حضرتك مصمم تتعامل مع حد بره التوكيل .. وكمان وعايز تخرج من الضمان .. يبقا بردوا تروح للتوكيل كل فترة .. عشان تكشف على العربية بالكمبيوتر على جهاز الاعطال .. ويعملولك ريست للعربية .. ويظبطولك الحساسات بتعتها .. لان كل ده مش حتلاقيه بره

تحياتى

ولك حرية الراى

**goudamahdy** · 05-09-2011 10:09 PM

السلام عليكم ورحمة الله وبركاته

ازيك يا باشا

كل سنة وحضرتك طيب

أنا شايف نقطة مهمة جدا : ان العربية توصل لغاية الـــ 55000 ( وده حسب كلام حضرتك ) بصراحة ده يحسب للتوكيل " إنه وبكفاءة محافظ على العربية في صياناتها لغاية دلوقتي "

وربنا يباركلك فيها يا باشا وعقبال الخمسمائة ألف إن شاء الله

**Ali_Abo_Amr** · 06-09-2011 11:56 AM

المشاركة الأصلية كتبت بواسطة mido51eg

طالما العربية تستاهل ونضيفة ماتستخسرش فيها الصيانة في التوكيل. ديتها بس العربية تتعك منك بره عند صنايعي مابيفهمش او معندوش ضمير هتتعبك اوي لغاية ما تتظبط تاني.

اؤيدك بشدة ... كلام عشرة على عشرة