الموضوع: تفاصيل صيانة 20000كم فى الأسكندرية

اولا السلام عليكم ورحمه الله وبركاتة يمكن دى اول مرة اقوم بسر صيانة ليا او انى اتكلم بالتفصيل عن عمل صيانة لا لشىء الا لأحقاق الحق واعطاء كل ذى حق حقة ومن لا يشكر الناس لا يشكر الله
كنت اشتكيت قبل كدة مرارا وتكرارا من ارتفاع صوت r.b.m وذهبت لصيانة القطامية اكتر من مرة وبرجع زى ما رحت زى ما جيت على مبدأ كلة تمام ياريس وانى انا اللى بتوهم المشكلات اللى عندى دى - واشتكيت قبل كدة لمدة طويلة من ان المساعدين اللى ورا بايظين ورحت هناك اكتر من مرة برضة وقالولى مفيش حاجة لغاية ما ربنا كرمهم وحسوا انى خلاص جبت اخرى وان المشكلة بقت واضحة ادام الأعمى مش ادام مهندسين وفنيين وساعتها غيرولى فردة مساعد واحدة وانا ساعتها قلت الحمد لله رب العالمين اهو نص العمى ولا العمى كلة واشتكيت برضة من التكييف انى بسمع من الناس ان تكييف العربية البى واى دى ثلاجة وانا من يوم ما اشتريت العربية لا شفت تلاجة ولا حتى مروحة وكل ما اروح هناك الاقيهم بيقولولى التكييف زى الفل وبصراحة انا اقتنعت من كلامهم مش عشان دى الحقيقة -لا - لأنى قلت جوايا يبقا دا فعلا مستوى التكييف والناس اللى بتقول انة تلاجة ممكن يكونوا مركبوش سيارات مكيفة قبل كدة وشافوا الفرق بس لما المشكلات عندى زادت شوية لقيت نفسى بتصل بمركز الأسكندرية من خلال الأرقام اللى قام الأستاذ الفاضل عماد حبيب بوضعها هنا فى المنتدى ورد على اخ فاض وطلبت منة اكلم حد من الفنيين فوصلنى بأخ قلتلة على اللى عندى وبعدها وصلنى بالمهندس اسامة مبروك اللى بسمع عنة من هنا من المنتدى وقلت تبقا دى اخر مرحلة اقول اللى عندى ولو اللى انا قلتلة صح يبقا من فضل الله ولو اللى انا بقولة وبشتكى منة غلط يبقا زى ما قالولى فى القطامية دى اوهامك انت اللى بتتوهمها
رد عليا المهندس اسامة وحكيتلة المشكلة ورد بكل ذوق واستمع للمشكلة اكرر تانى استمع للمشكلة --- استمع للمشكلة بتاعتى -- وبكرر الكلمة دى لأن محدش كان بيسمع مشكلتى كنت بتكلم ويقولولى احنا اللى نقول اذا كان فية مشكلة ولا لا وفوجئت برد اثلج صدرى وقال ياباشا المشكلة بتاعتك دى مشكلة بسيطة جدا تعال بالعربية وان شاء الله تتحل علطول ومتقلقش الكلام دا كنا فى شهر رمضان الكريم فأتفقت معاة انى هروح اسكندرية بعد العيد إن شاء الله وانبارح كان الموعد وسافرت

تفاصيل اللقاء والصيانة
وصلت المركز الساعة 8.20 ووجدت الفنيين بييجوا والمركز مفتوح ووجدت 3 سيارات لادا وكنت انا السيارة الوحيدة byd حمدت ربنا وقلت الحمد لله انى جيت بدرى عشان يتعمل الشغل اللى عندى بسرعة والحق اسافر تانى إن شاء الله
جانى المهندس وقالى طلبات حضرتك اية فطلعت الورقة اللى معايا وفيها 13 مشكلة بصراحة انا مشكلتى الأساسية كانت r.b.m وقلت لو ال 12 متحلوش مش مشكلة بس المهم دى تتحل وفؤجئت بأن المهندس كتب فعلا ال 12 مشكلة وقسما بالله ويشهد الله على ذلك ان المهندس كان بيبتسم ابتسامة جميلة وقلت فى نفسى بشرة خير ان شاء الله ومشكلاتى كانت
1 ارتفاع صوت r.b.m وانا على السلانسية او وانا ماشى ومتنزلش
2- ارتفاع صوت المروحة
3-دخول هواء سخن من عند الدواسة وقلة كفاءة التكييف
4- المساعد الخلفى فية مشكلة
5- اكرة الباب الخلفى مشوارها بعيد والباب مش بيفتح ولا بيقفل بشكل حلو
6- حدوث فرق بين الأكصدام الخلفى والبودى
7- زنة فى التسجيل
8- صفارة فى تيل الفرامل وانخفاض فى كفاءة الفرامل عن يوم ما اشتريت العربية
9- لمبة النور فى الفانوس ضعيفة
وكام حاجة تانية انا كنت بطلبهم من نفسى
بعد كدة طلبت اقابل المهندس اسامة فقالولى انة بالداخل ذهبت الة ووجدتة وقابلنى بأبتسامة وعرفتة بنفسى وانى انا اللى كنت كلمتة عن مشكلتى فى التليفون فقال اة ياباشا اهلا وسهلا بيك انا فعلا شفت امر الشغل بتاعك وان شاء الله كل حاجة هتتصلح وتبقا زى الفل فشكرتة وطلعت على الأستراحة فوق وفى هذا الوقت كانت حضرت كمان 3 عربيات او 4 b.y.d من بينهم عربية الأستاذ اسامة اللى معانا هنا فى المنتدى واتقابلنا واتعرفنا على بعض
ماذا تم فى المشكلات
بعد فترة ليست بالطويلة نزلت للمهندس اسامة وسألتة خير ياباشمهندس كان عندى مشكلة فقالى اة الحساس مكربن اوى وكان لازم يعمل المشكلة دى فعلا واحنا طلعناة ونضفناة وان شاء الله المشكلة دى مش هتحصل تانى
وطلب منى تغيير فلتر الهواء وفلتر البنزين ووافقت على الفور
طيب بالنسبة للتكييف قالى فعلا كلامك مضبوط كان بيجيب هوا من الدواسة لأن فية حاجة كانت راكبة غلط والمشكلة دى تخلى هواء التكييف يكون جوا التابلوة مش عليك انت بس خلاص اتحلت بفضل الله
وطلب من احد الفنيين يخرج يجرب العربية عشان يشوف حكاية المساعد فخرج الفنى ورجع وقالة ياباشمهندس المساعد متحجر لا بياخد ولا بيدى يعنى المساعد بايظ فقالة خلاص غيرة
طيب والتيل والفرامل قالى حطيناها على الجهاز وظبطناها وهتحس بفرق ان شاء الله
وبعد كدة الفنيين خدوا العربية عشان يجربوها وبعد فترة رجع الفنيين وقالوا حاجة غريبة انا كنت حاسس بيها بس مقلتهاش فى امر الشغل لأنى مكنتش عارف اقول اية قالوا اية بقا
ياباشمهندس العربية دى فيها قاعدة موتور مفكوكة ودوروا العربية ادامة اكتر من مرة وقام المهندس اسامة بنفسة بتجربة الموضوع وساق العربية بنفسة وجربها وبعد كدة دخل بيها على احد الفنيين اللى صلحوا قاعدة الموتور وبعد كدة خد العربية دخلها على المغسلة واتغسلت العربية
واخدت العربية بعد ما سلمت على المهندس اسامة والناس هناك ورجعت بفضل الله وقالى ابقا طمنى اية الجديد اللى هتلاحظة فى العربية
وانا راجع اول ما دورت العربية لاحظت فرق ان الهزة اللى كنت بسمعها واحسها لما كنت بدور العربية راحت ودا بسبب قاعدة الموتور اللى اتربطت فقلت الحمد لله ومشيت بالعربية ولقيت فية فرق فعلا وقلت اشغل التكييف واشوف هل فية فرق فعلا ولا لا وشغلت التكييف وياريتنى ما شغلتة بسم الله ما شاء الله ولا حول ولا قوة الا بالله العلى العظيم ايوة كدة هو دا اللى اسمة تكييف تلج

اللهم لك الحمد والفضل والشكر والمنة على ما انعمت بة على ولك الحمد والفضل ان سخرت لنا اناس يعملوا بضمير
مهندس اسامة مبروك لك عظيم شكرى وتقديرى وامتنانى على حسن معاملتك وادبك الجم وعلى براعتك وفنيتك فى عملك
فنى مركز الأسكندرية لكم عظيم شكرى وامتنانى وتقديرى لما بذلتموة معى
شىء اخير احببت ان اقولة لأحقاق الحق ان كل من بالمركز ابتسامتهم على وجوههم وقسما بالله ابتسامتهم جمييييييييييييييلة
لكم شكرى وتقديرى

عزيزى استاذ نيرون مش عارف اقلك اية لكن طالما اتفقنا ان هناك فرق بين مهندسى وفنى الأسكندرية والقطامية يبقا نروح اسكندرية ونشكر القائمين عليها ولا نعيب او نغلط فى القطامية وربنا يصلح حالنا جميعا ان شاء الله