::: الريف المصرى .......... إنطباعات عابرة !!!! + ( صور ) :::

**BRAZILI** · 05-09-2011 08:39 PM

بسم الله الرحمن الرحيم

قضيت أجازة العيد ( أسبوع ) فى احدى قرى مصر المحروسة

فى المجمل كانت رحلة جميلة خلت الواحد يفك شوية من ضغوط القاهرة

و خلال هذه الرحلة كونت شوية افكار و انطباعات عن التطور اللى حصل فى الريف المصرى

و هى ::::

.... 1 .....

قلة عدد الحمير ( لامؤاخذة ) و الدراجات ..... فالكل هناك اتجه للموتوسيكلات و التريسكلات
لانها ارخص من الحمير ....... و اوفر كمان .... غير انها سريعة و بتنجز خاصة فى طرق القرى
الغير ممهدة .... الكل راكبها .... عيال صغيرة و شباب و شيوخ كبار لدرجة ان فى محيط 3 قرى
شفت معرضين للموتوسيكلات ....... ده غير محلات القطع غيار ....... و غير اللى ما شفتوش أساسا ...!!!

.... 2 ....

مبقاش فى حد بيربى فراخ ..... لارتفاع اسعار العلف .... فالناس بقت بتريح بالها و تشترى
من محلات بيع الفراخ .... لما سألت واحد قالى ( بلا هم يا عم ....... تقعد تشترى علف و تربى
و تتعب و فى الاخر يا يموت يا يعيش ..... الناس بتريح بالها و تشترى ع الجاهز احسن ) !!!

.... 3 ....

بعد الارتفاع الصاروخى فى اسعار الذهب ....... اهل العروسة بقوا بيشاركو فى مبلغ الشبكة !!!

دول اهم 3 حاجات خدت بالى منهم

و دلوقتى نروح للصور مع شرح بسيط

التصوير بكاميرا كانون باور شوت A490 ميجا بيكسل 10
و طبعا شوية فوتوشوب لزوم تصحيح الالوان
.
.
.
الطرمبة ..... فى طريقها للاندثار ..... دى صورة طرمبة مش شغالة
ابنى ( 6 سنوات ) لما شافها قالى ( بابا .... ده اختراع جديد بدل الحنفية !!!!! )

.
.
.
جامع مهجور .... مبنى من زمان ... وسط الحقول فى مكان بعيد عن العمران

.
.
.
اراضى مزروعة كرنب + ذرة

.
.
.
عم ابراهيم ..... راجل طيب قوى ....... غيطه على نهر النيل عدل
حياته كلها فى الغيط .... بيحب الهوا و بيقول ان البيوت كلها دوشة و كتمة
لقيته بيشرب سجاير لف .... قلتله لفلى سجارة
كانت سجارة حامية قوى ..... مقدرتش اكمل نصها

.
.
.
طريق الجسر ....... ده بقى عبارة عن جسر ترابى كان معمول زمان عشان يمنع فيضان النيل
حاليا هو لسه مرتفع و الناس عاملاه طريق ... فى منه جزء متسفلت
جماله ... انه مرتفع عن سطح الارض .... و بتشوف منه كل الغيطان
و الشجر الكبير على جنبيه بيديه جمال و هدوء اكتر

.
.
.
صحبة ع الطريق ..... ابنى ( 6 سنوات ) و خاله يسرى ( 10 سنوات )

.
.
.
حديقة البرتقال .... طبعا لسه البرتقال صغير و اخضر

.
.
.
ده بقى فارس ....... لقيته هو و اخوه بيعوموا فى النيل ..... انبسطوا قوى انى صورتهم

.
.
.
طريق ضيق كله شجر ..... كنت بحب امشى فيه كل يوم

.
.
.
البرنس عفيفى ..... اتعرفت عليه و هو شغال على الجرار
و بعدين ركبنا انا و ابنى معاه على الجرار و روحنا معاه الغيط بتاعه
و عزمنا على كوباية شاى على الفحم .... بس ايه اخر مزاج
هى الكوبايات كانت صغيرة شوية بس برضه كان ليها طعم تانى
و عرفت منه ان طيور ابو قردان لما بتسمع صوت الجرار
بتعرف انه حيكون فيه حفر فى الارض و بتنزل تجرى و را الجرار تنقى الدود من الارض

.
.
.
طفل اسمه عبد القادر ( سنة واحدة ) بيمص قصب على نهر النيل

كل عام و انتم بخير
أحمد برازيلى

**Dewo** · 05-09-2011 09:01 PM

متشكرين ياباشا على لتقرير الجامد ده مشاهد الواحد ماشفهاش من زمااااااااان

**BRAZILI** · 05-09-2011 09:02 PM

المشاركة الأصلية كتبت بواسطة Dewo

متشكرين ياباشا على لتقرير الجامد ده مشاهد الواحد ماشفهاش من زمااااااااان

العفو يا باشا

**alfath8** · 05-09-2011 09:30 PM

يا راجل كنت بتتتفسح فى العيد بجد الواحد نفسه فى اجازة شهر يغير جو المدينة والقرف والشغل ويروح الريف بجد حسستنى انى كنت هناك دى امنية بتمناها من وانا صغير ارض صغيرة وازرعها وابعد عن الدنيا كلها فكرتنى بحلمى ليه بس

**naser_56** · 05-09-2011 09:48 PM

هههههههه واضح ان برازيلي الصغير متكيف خالص من الشاي علي الفحم .... ربنا يحفظهولك ويبارك لك فيه

**ganash** · 05-09-2011 10:04 PM

الحمد لله انى عايش فى ارياف كل الى حضرتك قولت عليه مظبوط بس الطرمبه لسه شغاله d:

**Mohamed_Rashad** · 05-09-2011 10:16 PM

موضوع جميل و صور أجمل, شكراً لك
بس لي عتاب على الريف المصري, آخر زيارة لي شفت جبال من القمامة في كل شارع و أمام كل بيت بدون مبالغة! و لسه البنات و الستات بيغسلوا الأطباق و الحلل في مياه الترع الملوثة بالرغم من وجود المياه في المنازل بس هي شكلها عادة و مش هتندثر للأسف!

**HOSSAM99** · 05-09-2011 10:41 PM

كل سنة و حضرتك طيب
و موضوع جميل و صور جميلة جدا

**BRAZILI** · 06-09-2011 01:32 AM

المشاركة الأصلية كتبت بواسطة alfath8

يا راجل كنت بتتتفسح فى العيد بجد الواحد نفسه فى اجازة شهر يغير جو المدينة والقرف والشغل ويروح الريف بجد حسستنى انى كنت هناك دى امنية بتمناها من وانا صغير ارض صغيرة وازرعها وابعد عن الدنيا كلها فكرتنى بحلمى ليه بس

ده مش حلمك بس يا محمد ....... ده حلمى انا كمان و الله و اعتقد انه حلم كل الناس

المشاركة الأصلية كتبت بواسطة naser_56

هههههههه واضح ان برازيلي الصغير متكيف خالص من الشاي علي الفحم .... ربنا يحفظهولك ويبارك لك فيه

شكرا يا ناصر باشا و ربنا يبارك فيك

المشاركة الأصلية كتبت بواسطة ganash

الحمد لله انى عايش فى ارياف كل الى حضرتك قولت عليه مظبوط بس الطرمبه لسه شغاله d:

شكرا يا باشا على مرورك ..... لكن انا قلت عن الطرمبة ( فى طريقها للإندثار )
خالص تحياتى و كل سنة وانت طيب

المشاركة الأصلية كتبت بواسطة hossam99

كل سنة و حضرتك طيب
و موضوع جميل و صور جميلة جدا

و حضرتك طيب .... شكرا لمرورك الكريم

**BRAZILI** · 06-09-2011 01:40 AM

المشاركة الأصلية كتبت بواسطة mohamed_rashad

موضوع جميل و صور أجمل, شكراً لك
بس لي عتاب على الريف المصري, آخر زيارة لي شفت جبال من القمامة في كل شارع و أمام كل بيت بدون مبالغة! و لسه البنات و الستات بيغسلوا الأطباق و الحلل في مياه الترع الملوثة بالرغم من وجود المياه في المنازل بس هي شكلها عادة و مش هتندثر للأسف!

يا محمد باشا ..... القمامة مش فى الارياف بس ....... دى بقت فى كل حتة
بالنسبة للغسيل فى الترع انا لاحظت السنة دى ان الموضوع ده بقى اقل من السنة اللى فاتت
يمكن عشان العيد ......... الله أعلم

خالص تحياتى ليك

الموضوع: ::: الريف المصرى .......... إنطباعات عابرة !!!! + ( صور ) :::

LinkBack

أدوات الموضوع

عرض

::: الريف المصرى .......... إنطباعات عابرة !!!! + ( صور ) ::: - انشر الموضوع فى :

-

-

-

-

-

-

-

المواضيع المتشابهه

رينو داستر...إنطباعات أولية

بيتنا اللى فى الريف اتسرق وعايز اركب كاميرا

حكاية أم صابر ..... حدوتة من قلب الريف المصري

اسئلة عابرة

الكلمات الدلالية لهذا الموضوع

المفضلات

المفضلات

ضوابط المشاركة