الموضوع: مركز صيانة ميتسوبيشى - العبور - الرواس

المشاركة الأصلية كتبت بواسطة basemsaeed

شكرا يا استاذ شريف على التقييم المحايد و الرائع
فعلا سعر العدسة غاااااااااااالي جداااااااااااااااااا
هي العربية بتنزل بسينسور,,صح؟؟؟
طب لو بتنزل بسينسور و انا شايف انها باجيرو 2010,,هل هي بش ضمن الضمان؟؟؟

و بعد اذنك ياريت تقولنا بما ان حضرتك كنت في الكويت
تقولنا على مراكز الخدمة اللي في الكويت عاملة ازاي و الخدمة ماشية ازاي هناك

و اسف للاطالة و شكرا مقدما

سعر العدسه خزعبلي مش غالي بس
و انا بعت اسال عليه في الكويت
اومال لو عرفت اني عشان اطلع نسخه علي المفتاح الريموت هدفع باكو تقول ايه

السينسور نازل مع العربيه فعلا بس العربيه منزلنها من الكويت فملهاش ضمان
ده غير ان المشكله ان العدسه شكلها مخبوط يعني كده كده هيتتعبر سوء استخدام

و بالنسبه لمراكز الصيانه في الكويت فانا هتكلم عن الميتسوبيشي برضه عشان المقارنه تبقي واقعيه و بلاش بتاع البورش و لا المرسيدس عشان دول استحاااااله يبقي في زيهم في مصر في راي الشخصي

مبدايا في اكتر من مركز متوزعين علي البلد بس كلهم نسخه طبق الاصل من بعض
و عامه المركز بيبقي مقسوم جزئين جزء ال express و ده للسيرفيس السريع و جزء المركز نفسه و ده بيتعمل فيه الصيانات الكبيره زي ال 40 و ال 80 و هكذا (و دول اصلا العربيه فيهم بتبات في التوكيل) و السمكره و لو العربيه فيها اي مشكله

طبعا كلامي هيبقي عن جزء ال express لان في المركز انت بتسيب العربيه و بتمشي
اللي بيحصل انك يتخش علي الريسبشن و معاك دفتر (رخصه) العربيه و كتاب الصيانه و بتقولهم انت عايز تعمل انهي صيانه بيطلع المهندس يستلم العربيه و يمضيك علي وصل الاستلام و ده طبعا عشان لو فيها خبطات او حكات الخ الخ و بعدين بتاخد دور و لما يجي دورك المهندس بيسلم العربيه للعامل اللي بيكون ليه station خاص بيه فيها كل الادوات و عدته و خلافه يعني ملوش حجه يسيب المكان و هناك بالمناسبه الزيت و الميه و الهوا يبيقوا متوصلين بخراطيم لكل ال stations و الزيت بالذات ليه جهاز مخصوص عشان يحط بالقدر المناسب لكل عربيه و لما السيرفيس تخلص العامل بيملي checklist بالحاجات اللي اتعملت و يسلم العربيه للمهندس اللي بيشيك علي كل حاجه و يسلمك العربيه و يختملك دفتر الصيانه دمتم
طبعا في حالة العربيه احتاجت قطعه غيار زياده زي التيل او خلافه العامل بيبلغ المهندس و هو بيبلغك و عند موافقتك هو اللي بيوفرها للعامل
طبعا اهم حاجه في ده الدور و كل عربيه بتاخد وقتها كامله و مفيش حاجه اسمها يسيب العربيه و يبص في حاجه تانيه او يسيب مكانه و طبعا انسي الشاي و السجاير لان دول في البريك بس و اللي بالمناسبه بتبقي 10 دقايق كل ساعه تقريبا و مبتتاخدش لو العامل لسه في ايده شغل و بياخدها لما يخلص
طبعا الاستراحات ده شيء مفروغ منه و الضيافه ببلاااااش مش زي هنا

طبعا في المركز الرئيسي انت برضه بتسلم العربيه و بتقول عايز تعمل ايه و بيديك وقت تقريبي للاستلام و طبعا تلفونك متسجل عندهم عشان يبلغك باي حاجه تحتاجها العربيه لانه لازم موافقتك و لما بتخلص بيكلمك تيجي تستلمها

و مؤخرا بقوا بيبعتوا sms بيفكرك بمعاد السيرفيس او بالعروض اللي بيعملوها زي

المشاركة الأصلية كتبت بواسطة moataz59

============
إيه رأيك بقى فى فرع العبور

مهو كلامي ده كان عنه يا زعيم

على فكرة زى ماحضرتك بتقول بالضبط إن مهندس الإستقبال كان بشوش
بس صدمنى لما سألته ليه صوت العربية الشارك عالى شوية............!!!!!!!!!!
رد عليا وقال لى عشان موتورها ضعيف ده 1500 أما البومة 1600
إسترسلت معاه شوية فى الكلام عن هذه الجزئية ..بس لقيت مفيش فايدة من الكلام معاه..
وده كان أول إنطباع عن المركز.

هههه عادي يا باشا تلاقيه مش مذاكر
و علي فكره سبب علو صوت الشارك هو ان فيه عازل بين المتور و المقصوره تقريبا بيتشال في الموديلات اللي نازله مصر و كده كده المايفيك صوته عالي في الطلعه و تبقي نعره كده و موجوده في الباجيرو برضه بس الحق يقال بتظهر في الحرق بس

خرجت من غرفة الاستقبال بعد أما إدانى الورقة اللى فيها الحاجات اللى هاتتعمل فى العربية
صيانة الثلاثين يعنى ..ووقفت جنب العربية لقيت واحد لابس يونيفورم لونة أخضر متجه الى باب السيارة ومعاه الريموت عشان يسوقها ويوديها عند الكوريك.
وقفته وقولت له هو حضرتك مهندس ؟
فقاللى لا أنا ميكانيكى
قولت له هو مش المفروض الى يسوق العربية هنا فى المركز يبقى المهندس ده أنا سمعت إن فيه واحد ميكانيكى إتفصل عشان هو اللى ساق العربية....لقيته زعل وتوجه لمهندس الاستقبال وإداله الريموت .
راح المهندس جايب الغطاء النايلون وحطه على كرسى السائق وقام هو بقيادة العربية لحد الكوريك.(وطبعا لو كان الميكانيكى هو اللى ساقها ماكنش ساعتها هايحط النايلون على الكرسى)
وبدأ الميكانيكى فى رفع السيارة على الكوريك لإجراء خطوات الصيانة المتبعة
طلعت غرفة الانتظار .. ومنها طبعا ممكن تشوف عربيتك بيتعمل فيها إيه
بس طبعا من على بعد
فك الأربع عجلات ونضف أماكنهم بالهواء
كشف على تيل الفرامل
غير زيت الموتور (موبيل وان) والفلتر
نضف الموتور بالاسبراى المخصص لذلك (لم أتحقق من نوعه نظرا لبعد المسافة)
ثم ساق العربية (هو نفس الميكانيكى اللى قولت له مش المفروض مهندس هو اللى يسوقها)
ووداها اللى مكان بعيد قوى على ما يبدو عليه لغسيل السيارة بالمياه.
ماعرفش نضف فلتر الهواء وألا لا !! ونسيت أسأل المهندس .أصلى كنت مستعجل عشان كنت رايح الحرفيين لتلميع العربية.................!!!!!!!!!!!
الحمد لله لم أحس بأى تغيير على الإطلاق فى السيارة لا للأحسن ولا للأسوء.
الصيانة إتكلفت 625جم بالزيت والفلتر واسبراى تنضيف الموتور ومياة تنضيف المساحات
هابقى أكتب لكم الأسعار بالضبط عشان مش معايا الفاتورة دلوقت.

طبعا غلط ان اي حد يركب العربيه بس هما بيصرفوا نفسهم خصوصا ان المهندسين كتير ما كانوا بيخرجوا يجربوا عربيات

و فكرتني بموضوع الغسيل ده
انا طبعا اكمني مكنتش بعمل سيرفيس فمليش غسيل بس بعد ما شفت العربيه متعاصه شحم من جوه قفشت و طلبت غسيلها و قلتلهم بالمره يغسلوا المتور فطلبوا فوم فوافقت يصرفوه علي الجوب و العربيه اتغسلت فعلا بس تنشيفهم كان زي الزفت و الازاز كان كله مليط و مبقع ميه

و علي فكره طالما غسلوا المتور يبقوا نظفوا الفلتر لاني شفتهم عملوا كده في كل العربيات

المشاركة الأصلية كتبت بواسطة basemsaeed

شكرااا جدااا يا استاذ شريف على ردك و على التوضيح و على سعة صدرك
انت كده حببتني في الكويت
شكلي حاخد اول طيارة و اسافر هناك

ربنا يباركلك في عربيتك و يكفيك شرها

تحياتي

العفو يا زعيم
و بدل ما تروح الكويت ما تيجي نشوف صرفه و نخلي الكلام ده موجود في مصر مهو حاجه مش مستحيله يعني و اللي مشي الكلام ده كله في الكويت شويه هنود يعني مش قصه بس تقول ايه في العقليه المصريه

المشاركة الأصلية كتبت بواسطة eng.osama.afifi

هوا أنا لو عايز أكشف على ماتور العربية في التوكيل كشف كمبيوتر ... أدفع كام ؟

حضرتك ارقامهم مكتوبه في احد المشاركات
ممكن تتصل بيهم و تسال
سواء في الرواس فرع العبور او دايموند في ابو رواش