الموضوع: التقييم الثاني: تيجو العمر سنة و20 ألف كيلو

بسم الله الرحمن الرحيم

كنت قبل كده عملت تقييم للتيجو الاتوماتيك عند 5000 كيلو، ياريت ترجعوه لاني مش عاوز اكرر نفس الكلام ، يعني مش هتكلم غير علي الاختلافات بس والاحداث الجديدة عشان ما اطولش عليكم، وده رابط الموضوع الاول
http://www.nilemotors.net/Nile/191707-5000.html

المهم قولت استني لغاية علي الاقل لغاية 20 الف كيلو عشان اكتب التقييم التاني، وانقل بحيادية "بدون تحامل او مبالغة" كل اللي انا حاسيته في فترة 15000 كيلو اضافية.
نبدأ التقييم التاني:
1-من حيث السواقة: بعد سنة سواقة، ابعاد العربية كويسة جدا، ومش متعبة في السواقة، حتي الحجم مش كبير اوي زي ما يتهيألك، لا مساحتها الخارجية مش كبيرة اوي وتقدر تركن في اغلب الاماكن بسهولة. حاجة من الحاجات البيخة لو ركنت في مكان و وراك عربية ومفيش مساحة مش هتعرف تفتح الشنطة

2-من حيث الصاج ومتانته: طبعا عارفين سنة في الشارع المصري لازم يتعلم عليك، حصل معايا كذا موقف صغير، واحد بعربية بيجو 7 راكب كان بيركن راح داخل في الرفرف الامامي بضهره، عمل شوية انبعاجات، المهم وديتها للسمكري، ردها علي البارد ولا كأن في حاجة، وقالي بسم الله ما شاء الله ما كنتش فاكر كده، قولتله في ايه يا اسطي، قالي صاج العربية ديه محمل واحسن من عربيات كتير في السوق. علي العكس بأه برجع بضهري كان في قالب خرساني محطوط في مكان افتكاسي ، هوب خبط فيه بالفبر اللي ورا يمين، الحتة اللي بارزة من الاكصدام، جابها اتنين!!!، اتاريها محملة علي فراغ. غير كده طبعا ربنا ساترها مع الواحد ويا رب تفضل كده.

3-داخليا: كلنا عارفين ان المواد مش علي المستوي المطلوب، بس مفيش حاجة اتكسرت ولا تابلوه ولا دريكسيون اتشقق وقشر ولا حاجة من ديه، ثانيا الصراحة الكلبسات الداخلية ناشفة جدا لو جيت تفك اي حاجة في العربية هتكسرلك 3 او 4 كلبسات، عموما ممكن تشتري كلبسات كويسة من التوفيقية او شارع دمشق.
4-الكراسي مريحة وقاعدتها كويسة ديه الكراسي الامامية الخلفية ضيقة بالنسبالي، انا طويل نوعا ما، بس عموما بعد ما ركبت الجيب الجديدة، عرفت يعني ايه كراسي ضيقة، انا مش مسببالي مشكلة عشان مفيش حد بيقعد ورا غير الاطفال.
5-فتحة السقف: بعد سنة من استخدامها، عرفت ان وجود فتحة سقف شئ مفيد للعربية خصوصا لو سايق بالليل ومش عاوز تفتح الشبابيك قوي.
6-العزل : العزل متوسط، وخصوصا ان صوت الموتور عالي، وعلي السرعات العالية بيقي عالي بس مش للدرجة الجامده اللي تضايق قوي، بفكر اجيب عازل واركبه انا, بيتهيالي هيفرق كتير.

7-التكييف: التكييف جيد جدا، العربية كبيرة والتكييف بيسقعها كويس، جربته في كل المواقف، في الزحمة علي سفر في الحر الشديد... الحمدلله ما كسفنيش ولا مرة.

8-الكاسيت الفاتحة بتاعت USB باظت روحت فيديو باص، عملوها وانا واقف وما خدوش اي فلوس، كان ناقص في الضمان يومين J، اه وانا زودت Amplifier سوني عشان انا كنت اصلا غيرت السماعات بسماعات سوني 3 واي، والصوت بقي تمام الحمدلله

9-الشنطة: من اكتر الحاجات اللي عاجباني في العربية، الشنطة بتشيل بتشيل، والعربية ما بتتأثرش لما حملت في الشنطة.
10-ارتفاع العربية عن الأرض نفعني في كتير من المواقف البايخة اللي الواحد بيقابلها في المطبات، مع العلم ان في مرة حكيت في مطب من تحت، تفتكروا بأه المطب ده ارتفاعه اد ايه.
الأداء
1-الموتور، في السنة ديه قدرت اختبر الموتور اكتر، عزم الموتور جيد جدا وادائه مثالي بالنسبة للنوع ده من العربيات حجم كبير، وزن تقيل، والايرودينامكس مش زي العربيات السيدان.

2-الفتيس: كان ظهرت عندي علامة الفتيس في التابلوة ورحت الصيانة ما لقوش سبب، عموما انا بحس بنتشة في النقلة ما بين الاولي والتانية، هقول عليها في صيانة الـ 20 واصر عليها.

3-التسارع: زي ما قولت قبل كده، لازم تعرف انك مش سايق عربية سباق، ديه عربية SUV، ومش معمولة للسرعة، بس التسارع عامة كويس خصوصا في النقلتين التانية والتالتة، النقلة الاولي والرابعة تجميعهم مش اد كده.

4-السرعة القصوي: اقصي سرعة وصلتلها 175 علي طريق العين السخنة، الثبات جيد جدا، التجميع بعد ال 120 بطيء بس مش للدرجة القاتلة. فضلت علي طريق الغردقة ماشي انا وعربية فكترا واوكتافيا علي 160 بنسلي بعض علي الطريق، لمدة ساعة او اكتر.

5-العفشة: العفشة جوه البلد ناشفة ، علي طريق السفر مريحة وبتدي ثبات كويس للعربية، ولو محمل العربية من مميزتها ان العربية مش هتلاقيها متأثرة
6-استهلاك البنزين في المعدل طبعا مش زي ال 1600 بس اهو ضريبة الـ 2000 ، الاستهلاك في الداخلي من 150 – 180 لتر في الصفيحة حسب الطرق وعلي السفر، من 180 – 220 حسب السرعة.
8-الفرامل: كذا موقف اتعرضت ليهم، أولهم واحد فرمل مرة واحدة وانا فرملت وراه وكان في رمل، الـ abs اشتغل والعربية ما عومتش والحمدلله ربنا سترها، الفرامل عموما كويسة جدا وديه من النقاط الايجابية في العربية وحصل معايا كذا موقف علي سرعة والعربية مسكت نفسها كويس.
10-قطع الغيار: الحمدلله ما احتجتيش اي قطع غيار لما اعمل صيانة ال 20 هقولكوا الاسعار ايه.
التركيبات الاضافية:
في الفترة ديه تم تركيب الاتي:

• 1- سماعات سوني 3 واي
• 2- Amplifier Sony
• 3- جهاز بلوتوث علي الكاسيت الكينوود
• 4- فرش جلد للكراسي وارضية جلد "فرش مش كسوة"
• 5- جهاز انذار يعمل علي ريموت السيارة الاصلي
• 6- دواسات جانبية

الملخص
1- العربية في مجمل ادائها جيد جدا، لوانت عارف امكانيتها ومش متوقع منها انها X3 او بورش كايين، العربية امكانيتها جيدة، بس هي مش عربية سرعة ولا عربية Off Road. هي عربية للمدينة، مناسبة جدا للطرق المصرية العادية وللشخص اللي مش عاوز يشد ويجري وحرق، وليها شنطة كبيرة مناسبة للعيلة في السفر.

2- لو هتشتري لازم تعرف ان العربية زي اي عربية في رانج السعر ده ، لو صونتها تصونك ولو هنتها هتهينك. التزم بالصيانات، متاخدش في بالك كلمة صيني، لو عندك مشكلة اسال وروح التوكيل، وفي اعتقادي ان في رينج السعر من 90 ل 150 الف، وبالنسبة للنوع ده من العربيات العربية ديه تستحق لقب The Best Value for Money

يا رب اكون قدرت افيدكم. ولو في اي اسأله انا في الخدمة

تقرير اكثر من رائع ... ربنا يبارك لك فيها ويحفظهالك من كل شر وعقبال صيانة ال000 100 ان شاء الله