نقييم للسيراتو على سرعات 100 الى 180

الرحله من القاهره لمارينا رايح جاى الصحراوى وطريق العلمين

جنط 16 كوتش مزبوط على 30 - 4 سرعات 2011

الصحراوى
100 العربيه ممتازه ومش حاسس بسرعه
120 العربيه برده ممتازه وكله تمام
140 العربيه تحس فيها بالسرعه ولازم تكون ماسك الدركسيون كويس
160 العربيه طايره وتحس انها هتطير من على الارض
160-180 العربيه مجابتش ال 180 غير لما طفيت التكييف و rpm وصل 5 العربيه مكانتش ثابته خالص بس صوت الموتور مش عالى قوى و العزل شايفوه ممتاز والعربيه جابت 180 بطلوع الروح ومعرفتش اعدى ال 180

العلمين
العربيه مجابتش ال 180 غير لما طفيت التكييف و rpm وصل 5 العربيه مكانتش ثابته خالص بس صوت الموتور مش عالى و العزل شايفوه ممتاز والعربيه جابت 180 بطلوع الروح ومعرفتش اعدى ال 180
الطريق مش متسفلت كويس فالعربيه كانت بتنطط من اول 120 اعتقد علشان العفشه
الهوا كان بيضرب فى المرايه وبيطلع صوت مخيف
وانا راجع للقاهره كان الهوا بيزق العربيه على 140 -160 بشكل تحس ان فى مشكله فى الزوايا وعماله ترمى يمين او شمال

استهلاك البنزين : عديت نص التانك بحاجه بسيطه قوى او نقدر نقول نص التنك و السرعه 120 140 فى المتوسط

تقييمى :
انسب سرعه لو طريق كويس 140 غير كده خطر و محدش يقول السيراتو بتعمل حوادث المشكله فينا :)
معرفش مجابتش اكتر من 180 ووصلت ل 180 فى فتره طويله علشان العربيه مش متفتحه ولا لأ بس اعتقد العربيه بقت بتجيب 0 100 فى وقت اقل دلوقت

وشكرا :)

احنا معانا سيراتو 2011 هاى لاين كاملة فتيس 6 نقلات كنت سايقها حسيت بيها انها خفيفة جدا وهبلة جرى عاوزة تجرى وخلاص فا انا ما حبتهاش

لا يا معلم جرب طريق العين السخنه كده و انت ان شاء الله تجيب 190 و ممكن اكتر
و جبت بيها قبل كده 200 و 205 ,و ياسر السيد جاب بيها 210 ,و فى ناس تانيه كتير جابت بيها 200 كتير
بس اهم حاجه الهوا فى وشك و الا فى ضهرك و الطريق اخباره اه معاك تمام مرايه و الا مش تمام و مطبات هوا جامده و تكسير و كده
و سعات مبتعديش ال 170 ,ليها حسابات كتير
و سعات بتبقى بغزاله و الله تلاقيها جرى و ثبات و نعومه
و سعات نشفه و بطه بلدى و مش ثابته و تخوفك جامد جدا
سبحان الله فى العربيه دى
و ربنا يستر طريقنا و طريقكم يا رب

يمكن فعلا الهوا كان السبب فى انى معدتش ال 180 بس عموما العربيه مش امان بعد 140

بص انا بسافر اسكندرية باستمرار ومابمشيش أأقل من 180 بحس فعلا انها هاطير اول مابجيب من 180 الى 190 المره اللى جبت فيها الميتين دى بقى كانت فعلا بطلوع الروح وكنت حاسس انى هاتقلب فى اى وقت لكن مجملاً العربية على السرعات العالية ماتكسفكش بجد لأنى شديت على الصحراوى مع عربيات مختلفة وكنت دايما بمسحهم
وعموماً السرعات العالية خطر بس جنون لابد منه .

غلط تجرى و ضغط الهوا منخفض لان العربيه هتعوم منك لازم يكون 32 لو بتجرى فوق ال 120 مثلا ,مره جريت بالعربيه و كان الضغط 26 و ده بسبب ان مقياس الضغط كان بايظ عند الراجل و قعد يقلل الهوا ,و سافرت و رجعت العربيه بتعوم جامد منى ,و لما ظبطت الضغط فرقت جامد ,عموما متنفخش الكاوتش غير 32 افضل حاجه فى كل الظروف ,و لما كانت العربيه ضغطها قليل و لبست حفره او مطب عملت بلونه علطول انما من ساعة ما عملته 32 و هى الحمد لله مبتعملش بلالين خالص
الحمد لله و كمان حفظت الطرق بمطباتها و حفرها و كده و مبجريش فى طريق معرفوش .
و الله اعلم و السلام ختام

الطرق في مصر عموما مش بتسمح بالسرعات العالية بسسب سوءها طبعا.
لكن العربية على سرعة لغاية 140 ممتازة. و160 كانت معقولة. غير كدة مش ضروري يا جماعة هايبقى خطر عليك لو سايق فراري,,,,,, طريق الساحل حارتين بس!!! دا غير انك مش لوحدك على الطريق.
دا رأيي الشخصي وربنا يستر طريقنا كلنا.