عملت صيانة ال60 ألف للالنترا في فرع قليوب

السلام عليكم ورحمة الله

الحمدلله عملت النهارده صيانة ال60 الف كيلو للالنترا في فرع قليوب ودي كانت أول مره أروح هناك.

حجزت أول امبارح ولقيت أول ميعاد متوفر هو النهارده على الساعه 9.
وصلت الساعه 9 وربع عشان تهت في الطريق شوية واستلموا مني العربيه الساعه 9 ونص.
واستلمت في الساعه 1 ونص. طبعا يعتبر وقت قياسي مقارنة بأبو رواش
الي تم في صيانة ال60 الاتي:

- تغيير فلتر الهواء.
- تغيير البوجيهات.
- تغيير سير الدينامو .
- طبعا زائد تربيط العفشه وما إلى ذلك..

قبل ما استلم العربيه قلت أسأل على موضوع السير عشان عارف انهم مجموعة سيور, وعرفت ان سير الكاتينه جنزير وده مابيتغيرش خالص في الالنترا.

التكلفه الكليه 770 جنيه. بدون تغيير الزيت عشان لسه مغيره من يومين.
يعني التكلفه الكليه حوالي 1000 جنيه

وأحب اقترح على الاخوه الزملاء نعمل موضوع شامل بالصيانات عشان كل واحد يبقى عارف هيدفع كام في الصيانه الي هوا عاوزها.

تحياتي

قابلت المهندس هاني؟
و مبروك يا حوده عقبال ال 100,000 ان شاء الله

اقتباس:

---

المشاركة الأصلية كتبت بواسطة nfs_206

قابلت المهندس هاني؟
و مبروك يا حوده عقبال ال 100,000 ان شاء الله

---

كيمو باشا :grin21: .. عامل ايه ؟
لأ والله ماقبلتهوش. انا قولت لو في حاجه مش عجباني في الصيانه هقابله انما الحمدلله الصيانه مشيت كويس وراضي عنها الا حد ما عشان في حاجات طلبت منهم يشوفوها بس ماعملوش فيها حاجه. اخدت 4 ساعات بس احسن من ابو رواش كان ممكن يقولولي فوت علينا بكره :grin21:

ونضفولي الموتور على فكره ! عمره ما اتنضف في ابو رواش
شكلي هروح كل مره لفرع قليوب.
ومتشكر قوي يا كيمو على نصيحتك اني اروح فرع قليوب

لو سمحت يا باشا هو بالنسبة لتغيير الزيت ممكن اغيرة برة التوكيل هو و الفيلتر عشان يوفر معايا في تمن الصيانة و لا اية رايك

و معلش عايز اعرف التفويلة بتاعت بنزين 92 بتمشيك كام كيلو

لاني قبل ما اروح فرع ابو رواش كانت التفويلة بتمشيني 640 كيلو دلوقتي بتعمل 500 كيلو بالعافية و دة بعد ما غير البوجيهات و فلتر البنزين و الهوا في صيانة ال 20 الف مش عارف لية بتاكل بنزين كدة
؟؟

اقتباس:

---

المشاركة الأصلية كتبت بواسطة dr_abooody

لو سمحت يا باشا هو بالنسبة لتغيير الزيت ممكن اغيرة برة التوكيل هو و الفيلتر عشان يوفر معايا في تمن الصيانة و لا اية رايك

و معلش عايز اعرف التفويلة بتاعت بنزين 92 بتمشيك كام كيلو

لاني قبل ما اروح فرع ابو رواش كانت التفويلة بتمشيني 640 كيلو دلوقتي بتعمل 500 كيلو بالعافية و دة بعد ما غير البوجيهات و فلتر البنزين و الهوا في صيانة ال 20 الف مش عارف لية بتاكل بنزين كدة
؟؟

---

ممكن عادي تغير الزيت بره التوكيل. انا عملت كده
وعملت كمان حركه جريئه بس يارب ماتكونش مضره. بعد كل مره بغير زيت بيتفضل حوالي نصف لتر في العبوه. احتفظت بيهم لغاية لما جمعت كمية وغيرتها من اسبوع و وفرت ثمن عبوه كامله. بس كان في نقص في نصف لتر قمت اشتريت عبوة 1 لتر ب75 جنيه حطيت نصفها وشلت الباقي. انا على حسب ما قريت في المنتدى انها مش مضره و ان شاء الله كلامهم يبقى صح.

بالنسبه لاستهلاك البنزين, انا مش حاسبهم بالظبط وكمان انا سواقتي كلها بجري فوق ال120 بالتالي مش هبقى مقياس. و كمان مش عارف ليه دايما تغيير البوجيهات في صيانة ال20 في ابو رواش لازم تبوظ حاجه ! انا برضه لما غيرتها في ال20 في ابو رواش العربيه بقت تترج ! انما قبلها العربيه كانت هاديه جدا ولما امشي ورا حد ماشي على رجليه ماكنش بيحس بالعربيه !